މަސައްކަތު ގަޑި ނިމުމުން، އޮފީހުގެ ކޯލުތަކާއި މެސެޖުތަކާއި އަދި އީމެއިލްތަކަށް އަޅާނުލާ ހުރުމުގެ ހައްގު، އޮސްޓްރޭލިޔާގެ މަސައްކަތްތެރިންނަށް ގާނޫނަކުން ފަހިކޮށްދީފިއެވެ. މި ގާނޫނާއެކު، ނުރަސްމީ ގަޑީގައި ފޯނަށް ޖަވާބު ނުދިނުމަކުން މަސައްކަތްތެރިޔާއަށް އޮފީހުން ފިޔަވަޅެއް ނޭޅޭނެއެވެ.

އަލްގައިދާއާ ގުޅުންހުރި ޖަމާއަތެއް ކަމުގައިވާ، ޖަމާއަތު ނުސްރަތު އަލް-އިސްލާމް ވަލް-މުސްލިމީން (ޖޭނިމް) އިން ބުރުކިނާ ފަސޯގެ 200 މީހުން މަރާލައި، 140 އެއްހާ މީހުންނަށް އަނިޔާދިންކަމުގެ ޒިންމާ ނަގައިފިއެވެ. ބުރްކިނާ ފަސޯއަށް މި ހަމަލާ ދީފައިވަނީ ހޮނިހިރު ދުވަހުއެވެ. މި ހަމަލާ އަކީ އެ ގައުމުގެ ސްޓްރެޓެޖިކް ޓައުން ކަމުގައިވާ ކަޔާގެ އުތުރުން ގާތްގަނޑަކަށް 40 ކިލޯމީޓަރު ދުރުގައި އޮންނަ ބާސަލޯގޯ ސަރަހައްދުގައި ދީފައިވާ ހަމަލާއެއް ކަމަށް މައްސަލަ ދިރާސާކުރަ ފަރާތްތަކުން ވަނީ ބުނެފައެވެ.

ލުބުނާނުގެ ދެކުނުގެ ސަރަހައްދަށް އިޒްރޭލުން ދިން ހަމަލާތަކަށްފަހު ބުނީ، އެއީ ހިޒްބުﷲ އިން އިޒްރޭލަށް އާދިއްތަ ދުވަހުގެ ފަތިހު 5 ޖަހާއިރު ހަމަލާ ދިނުމަށް ތައްޔާރުވަމުން ދިޔަކަން އެނގިގެން، އެކަން ހުއްޓުވުމުގެ ގޮތުން އޭގެ ކުރިން ދިން ހަމަލާއެއް ކަމަށެވެ. އިޒްރޭލުން ލުބުނާނަށް ހަމަލާދިނީ 100 ހަނގުރާމަމަތީ މަތިންދާ ބޯޓު ބޭނުންކޮށްގެންނެވެ.

މެސެޖުކުރުމަށް ބޭނުންކުރާ އެޕްލިކޭޝަނެއް ކަމުގައިވާ ޓެލެގްރާމްގެ ފައުންޑަރ އަދި ސީއީއޯ، ޕަވެލް ޑުރޯވް ފްރާންސުގެ ބޯރގެޓް އެއާޕޯޓުން ހައްޔަރުކޮށްފިއެވެ. ފްރާންސްގެ މީޑިއާތަކުން ރިޕޯޓުކޮށްފައިވާ ގޮތުގައި އޭނާ ހައްޔަރުކުރީ ޓެލެގްރާމްއާ ގުޅޭ މައްސަލައަކާ ގުޅިގެންނެވެ.

ދުނިޔޭގައި ދެވަނައަށް އެންމެ ބޮޑު ޑައިމަންޑު އެފްރިކާގެ ގައުމެއް ކަމުގައިވާ ބޮސްވާނާ އިން ފެނިއްޖެއެވެ. އޭގެ ބަރުދަނުގައި 2،492 ކެރެޓު ހުންނަ ކަމަށް، މި ޑައިމަންޑު ހޯދި ކެނަޑާގެ މައިނިން ކުންފުނިން ވަނީ ހާމަކޮށްފައެވެ. އެކްސްރޭ ޓެކްނޮލޮޖީ ބޭނުންކޮށްގެން ހޯދި މި ޑައިމަންޑު ފެނިފައިވަނީ ބޮސްވާނާގެ އިރުއުތުރުގައި އޮންނަ ކަރޯވޭ ޑައިމަންޑު މައިނުންނެވެ.

އިންޑިއާ އާއި ބަންގްލަދޭޝްގެ ބައެއް ހިސާބުތަކުގައި ފެންބޮޑުވެ، އިންޑިއާގެ އިރުއުތުރާއި އަވަށްޓެރި ބަންގްލަދޭޝްގެ އިރުމަތީ ސަރަހައްދުގައި ލައްކައެއްހާ މީހުން ތާށިވެއްޖެއެވެ. ބަނގުލަދޭޝްގެ ޑިސާސްޓަރ މެނޭޖުމެންޓް އެންޑް ރިލީފް އިން ހާމަކޮށްފައިވާ ގޮތުގައި، މި ހާދިސާގެ އަސަރު އިރުމަތީ ބަންގްލަދޭޝްގެ ގާތްގަނޑަކަށް 4.5 މިލިއަން މީހުންނަށް ވަނީ ކޮށްފައެވެ. އަދި މި ހާދިސާގައި ހުކުރު ދުވަހާ ހަމައަށް 13 މީހުން ވަނީ އެ ގައުމުން މަރުވެފައެވެ.

އިންޑިއާގެ އަނަކަޕައްލި ކިޔާ ސަރަހައްދެއްގައި ހުންނަ އެސިއެންޝިއާ އެޑްވާންސްޑް ސައިންސަސް އަކީ 40 އޭކަރުގެ ބިމެއްގައި ހިންގަމުންދާ ފެކްޓަރީއެކެވެ. ބުދަ ދުވަހު ހިނގާފައިވާ މި ހާދިސާއާ ގުޅިގެން އަނިޔާ ލިބިފައިވާ މީހުންގެ އަދަދު 40 އަށް އަރާކަމަށް އެ ސަރަހައްދުގެ ޕޮލިސް ސްޕްރިންޓެންޑެންޓު، ދީޕިކާ ވަނީ ހާމަކޮށްފައެވެ.

ޓްރެއިނީ ޑޮކްޓަރެއް ރޭޕް ކުރުމަށްފަހު މަރުލުމާ ގުޅިގެން، އިންޑިއާގެ ސިއްހީ ހިދުމަތްތެރީން ފަށާފައިވާ އިހުތިޖާޖުތައް ހުއްޓާލުމަށް ގޮވާލައި، ޑޮކްޓަރުންގެ ސަލާމަތްތެރިކަން ކަށަވަރު ކުރުމުގެ މަސައްކަތް ފެށުމަށް ގައުމީ ޓާސްކް ފޯހެއް އުފެއްދުމަށް އެ ގައުމުގެ ސްޕްރީން ކޯޓުން އަމުރުކޮށްފިއެވެ. ސްޕްރީމް ކޯޓުން ޑޮކްޓަރުންގެ އަރިހުން އެދުނީ، އިހުތިޖާޖު ހުއްޓާލުމަށްފަހު މަސައްކަތަށް އެނބުރި ރުޖޫއަ ވުމަށެވެ.

ޔުނައިޓެޑް ސްޓޭޓްސް އޮފް އެމެރިކާއަށް ޑްރަގް ޓްރެފިކް ކުރުމުގައި ބައިވެރިވެފައިވާކަމަށް ތުހުމަތު ކުރެވިގެން، ހެއިޓީގެ ކުރީގެ ރައީސް، މައިކަލް ޖޯސެފް މާޓެލީއަށް ދަތިކުރުމުގެ ފިޔަވަޅު އެޅުމަށް އެމެރިކާއިން އަންގާރަ ދުވަހު ނިންމައިފިއެވެ. އެމެރިކާގެ މި ނިންމުމަށް ފަހު އެ ގައުމުން ހާމަކުރި ގޮތުގައި، މާޓެލީ ވަނީ އޭނާގެ ބާރުތައް ނަހަމަ ގޮތުގައި ބޭނުންކޮށް، ކޮކެއިން ހިމެނޭހެން ނުރައްކާތެރި ޑްރަގުގެ ބާވަތްތައް އެމެރިކާއަށް އެތެރެކުރުމަށް އެހީތެރިވެދީފައެވެ.

42 އަންހެނަކުގެ ހަށިގަނޑުގެ ބައިތައް ބުރުކޮށްލުމަށްފަހު މަރާލިކަމުގެ ތުހުމަތުގެ ތަހުގީގުގައި ކެންޔާގެ ނައިރޯބީގެ ރިމާންޑު ޖަލެއްގައި ބަންދުކޮށްފައި ހުރި މީހަކު ފިލައިފިއެވެ. އުމުރުން 33 އަހަރުގެ ކޮލިންސް ޖުމައިޝީ ކަލޫޝާ ވަނީ އޭނާގެ ކުށަށް އިއުތިރާފްވެފައި ކަމަށް ވެސް ފުލުހުން ހާމަކޮށްފައިވެއެވެ.

އިޒްރޭލުން ގާޒާ ސިޓީއަށް ދިން ހަމަލާތަކުގައި އިއްޔެ އެކަނިވެސް 35 މީހުން ޝަހީދުކޮށްލާފައިވާއިރު، ގާޒާގެ މުޅި ހެލްތު ސެކްޓަރ މިހާރު އޮތީ އެއްކޮށް ހުއްޓާލަން ޖެހޭ ހާލަތުގައި ކަމަށް، ގާޒާގެ ސިއްހީ ދާއިރާގައި މަސައްކަތްކުރާ މީހުން ބުނެފިއެވެ. އެގޮތުން، ތެޔޮ ނެތުމުގެ ސަބަބުން ހޮސްޕިޓަލްތައް ހިންގުމަށް ދަތިވެ، އަނިޔާ ތަކުގައި ފަރުވާ ހޯދަމުންދާ ގިނަ ކުޑަކުދިންތަކެއްގެ ފަރުވާ ހުއްޓި، އެ ކުދިން މަރުވެދާނެކަމުގެ ބިރުބޮޑުކަމަށް ވެސް ހާމަކޮށްފައި ވެއެވެ.

ދުނިޔޭގައި އެންމެ ރައްކާތެރި އެއް ނެޓްވޯކުގެ ގޮތުގައި ބެލެވިފައި އޮތް ޓެލެގްރާމްގެ ފައުންޑަރ، ޕަވެލް ޑްރޯވް ވަނީ އޭނާގެ 100 އަށް ވުރެން ގިނަ ދަރިން، 12 އަށް ވުރެން ގިނަ ގައުމެއްގައި މިހާރު ދިރިއުޅެމުންދާކަމަށް ބުނެ، އޭނާގެ ޓެލެގްރާމް ޗެނަލްގައި ޕޯސްޓެއް ކޮށްފިއެވެ. އުމުރުން 39 އަހަރުގެ މީހަކު މިހެން ބުނުމުން، ކިޔުންތެރިންގެ ތެރެއިން ގިނަ ބަޔަކު ހިތަށް އަރާނެ އެއް ސުވާލަކީ، އެންމެ ރައްކާތެރި ޗެނަލްގެ ފައުންޑަރަށް، ރައްކާތެރި ގޮތުގައި ދޭތެރެ ދުރުކުރާނެ އުކުޅުތައް ހަމަ ހަގީގަތުގައި ވެސް ނޭންގެނީތޯ ހިތައް އަރާ އުފެދޭ ސުވާލެވެ.

ލުބުނާނުގެ ދެކުނުގައި އޮންނަ ނަބަޓިއޭ ކިޔާ ހިސާބަށް ދިން ހަމަލާގައި މަރުވި މީހުންގެ ތެރޭގައި އަންހެނަކާއި އޭނާގެ ކުޑަ ދެ ދަރިން ވެސް ހިމެނެއެވެ. މި ހަމަލާގައި 5 މީހަކު ޒަހަމްވެފައިވާއިރު، އޭގެ ތެރެއިން ދެމީހަކަށް ބޮޑެތި އަނިޔާތައް ލިބިފައިވާކަމަށް މިނިސްޓްރީ އޮފް ހެލްތުން ހާމަކޮށްފައިވެއެވެ.

އިޒްރޭލާއި ހަމާސްގެ ހަނގުރާމައާ ގުޅިގެން ކުޑަކުދިންނަށް ވެކްސިންޖެހޭނެ ހާލަތެއް ނެތިގެން އެކަން ހުއްޓާލާފައި ވަނިކޮށް، ގައްޒާގެ 10 މަހުގެ ކުއްޖެއްގެ ގައިން ޕޯލިއޯ ފެނިއްޖެއެވެ. ފަލަސްތީނުގެ ހެލްތު މިނިސްޓްރީއިން ހުކުރު ދުވަހު ހާމަކޮށްފައިވާ ގޮތުގައި، މި ކޭސް ފެނިފައިވަނީ ޑެއާ އަލް-ބަލާހް ސިޓީއިންނެވެ.

މިދިޔަ އަހަރުގެ އޮކްޓޯބަރު މަހު ހަމާސްއިން އިޒްރޭލަށް ދިން ހަމަލާއަކަށްފަހު، އިޒްރޭލުން އަނިޔާވެރިކަމާއެކު ފަލަސްތީނުގެ ކުށެއް ނެތް ރައްޔިތުންނާ ދެކޮޅަށް ހިންގަމުންދާ ގަތުލުއާމުގައި މިހާތަނަށް މަދުވެގެން 40،000 މީހުން ޝަހީދުކޮށްލާފައިވާކަމަށް، ފަލަސްތީނުގެ ހެލްތު މިނިސްޓްރީއިން ބުރާސްފަތި ދުވަހު ހާމަކޮށްފިއެވެ.

ސެޕްޓެމްބަރު 21 ވަނަ ދުވަހު ސްރީލަންކާގައި ބޭއްވުމަށް ހަމަޖެހިފައިވާ އެ ގައުމުގެ ރިޔާސީ އިންތިހާބުގައި ވާދަކުރުމަށް، 39 ކެނޑިޑޭޓަކު ކެންޑިޑެންސީ ފޯމު ހުށަހަޅާފައިވާކަމަށް އިލެކްޓޯރަލް ކޮމިޝަނުން ހާމަކޮށްފިއެވެ. އިންތިހާބަށް ކުރިމަތިލި ކެނޑިޑޭޓުންގެ ތެރޭގައި މިހާރުގެ ރައީސް، ރަނިލް ވިކްރަމަސިންގެ ވެސް ހިމެނެއެވެ.