އިންޑިއާގެ ބޭސް އުފައްދާ ފެކްޓްރީއެއް ގޮވައި، އެ ފެކްޓަރީގައި މަސައްކަތް ކުރަމުން ދިޔަ 15 މީހަކު މަރުވެފައިވާކަމަށް އެ ގައުމުގެ އޮފިޝަލުން ހާމަކޮށްފިއެވެ. ނަމަވެސް މި އަދަދު އިތުރުވުމަކީ އެކަށީގެންވާ ކަމެއްކަމަށް ވެސް ހާމަކޮށްފައިވެއެވެ.

އިންޑިއާގެ އަނަކަޕައްލި ކިޔާ ސަރަހައްދެއްގައި ހުންނަ އެސިއެންޝިއާ އެޑްވާންސްޑް ސައިންސަސް އަކީ 40 އޭކަރުގެ ބިމެއްގައި ހިންގަމުންދާ ފެކްޓަރީއެކެވެ. ބުދަ ދުވަހު ހިނގާފައިވާ މި ހާދިސާއާ ގުޅިގެން އަނިޔާ ލިބިފައިވާ މީހުންގެ އަދަދު 40 އަށް އަރާކަމަށް އެ ސަރަހައްދުގެ ޕޮލިސް ސްޕްރިންޓެންޑެންޓު، ދީޕިކާ ވަނީ ހާމަކޮށްފައެވެ.  

2019 ވަނަ އަހަރުން ފެށިގެން އޮޕަރޭޓު ކުރަމުން އަންނަ މި ފެކްޓަރީ ގޮވާފައި ވަނީ ބުދަ ދުވަހުގެ މެންދުރު ގަޑީގައެވެ. ފުލުހުން ހާމަކޮށްފައިވާ ގޮތުގައި، މި ހާދިސާ ހިނގީ ކެމިކަލް ރިއެކްޝަނެއްގެ ސަބަބުންނެވެ. އަދި ހާދިސާގައި އަނިޔާ ލިބުނު މީހުންނަށް ކައިރި ހޮސްޕިޓަލްތަކުން ފަރުވާ ދެމުން އަންނަ ކަމަށް ވެސް ހާމަކޮށްފައިވެއެވެ.

މަރުވި މީހުންގެ ހަށިގަނޑަށް ކެމިކަލް ގޮސްފައިވުމުގެ ސަބަބުން ވަރަށް ބޮޑަށް ފިހިފައިވާކަމަށް މަންޒަރުދުށް މީހުން ވަނީ ހާމަކޮށްފައެވެ. އަދި ފިހިގެން އެމީހުންގެ ގައިން ހަންތައް ނައްޓާލާފައިވާކަމަށް ވެސް ވަނީ ބުނެފައެވެ.