ޔުނައިޓެޑް ސްޓޭޓްސް އޮފް އެމެރިކާއަށް ޑްރަގް ޓްރެފިކް ކުރުމުގައި ބައިވެރިވެފައިވާކަމަށް ތުހުމަތު ކުރެވިގެން، ހެއިޓީގެ ކުރީގެ ރައީސް، މައިކަލް ޖޯސެފް މާޓެލީއަށް ދަތިކުރުމުގެ ފިޔަވަޅު އެޅުމަށް އެމެރިކާއިން އަންގާރަ ދުވަހު ނިންމައިފިއެވެ.

އެމެރިކާގެ މި ނިންމުމަށް ފަހު އެ ގައުމުން ހާމަކުރި ގޮތުގައި، މާޓެލީ ވަނީ އޭނާގެ ބާރުތައް ނަހަމަ ގޮތުގައި ބޭނުންކޮށް، ކޮކެއިން ހިމެނޭހެން ނުރައްކާތެރި ޑްރަގުގެ ބާވަތްތައް އެމެރިކާއަށް އެތެރެކުރުމަށް އެހީތެރިވެދީފައެވެ.

އެމެރިކާއިން އިތުރަށް ހާމަކޮށްފައިވާ ގޮތުގައި، ހެއިޓީގެ ރައީސްކަން 2011 އިން 2016 އަށް ކޮށްފައިވާ މާޓެލީ ވަނީ ހެއިޓީގައި ޑްރަގް ޓްރެފިކްކުރާ ގްރޫޕްތަކާއެކު މަސައްކަތްކޮށް، ގިނަ ގޭންގުތަކެއް އޮޕަރޭޓު ކުރުމުގައި އެހީތެރިވެދީ އަދި ބޭނުން ކުރުން މަނާ ޑްރަގުގެ ބާވަތްތައް ލޯންޑާރ ކުރުމަށް އެހީތެރިވެދީފައެވެ.

އެމެރިކާގެ ޓްރެޝަރީ އެކްޓިން އަންޑަރ ސެކްރެޓަރީ ފޯރ ޓެރަރިޒަމް އެންޑް ފައިނޭޝިއަލް އިންޓެލިޖެންސް، ބްރެޑްލީ ސްމިތު ބުނީ، ހެއިޓީގެ ރައީސަކާ ދެކޮޅަށް އެޅުނު އެ ފިޔަވަޅުން ރަމްޒުކޮށްދެނީ، ހެއިޓީގައި އޮތް ނިކަމެތި ހާލަތުގެ ފަހަތުގައި ތިބީ ކޮރަޕްޓް ސިޔާސީ ފަރާތްތައް ކަމެވެ.

މާޓެލީއާ ދެކޮޅަށް ނިންމި ނިންމުމާއެކީ، އެމެރިކާގައި ހުރި މާޓެލީގެ ހުރިހާ އެސެޓެއް ހިފަހައްޓާނެއެވެ. އަދި އެމެރިކާގެ އެއްވެސް ރައްޔިތަކާ އެކު އެއްވެސް ވިޔަފާރި މުއާމަލާތެއް ކުރުން އޭނާއަށް މަނާވާނެއެވެ.

ހެއިޓީއަކީ އެމެރިކާ ބައްރުގައި އޮތް އެންމެ ފަގީރު ގައުމެވެ. އަދި ގޭންގު ވައިލެންސްއަކީ އެގައުމުގެ ކުރިއެރުމަށް އެޅިފައި އޮތް އެންމެ ބޮޑު ނުރައްކަލެވެ. ގޭންގު ތަކުގެ ހަރަކާތްތައް އިތުރަށް ގޯސްވެގެން ގޮސްފައިވަނީ، ހަތިޔާރު އެޅި ގްރޫޕްތަކުން ނިކުމެ މި އަހަރުގެ ފެބްރުއަރީ މަހު އެ ގައުމުގެ ޕްރައިމް މިނިސްޓަރ، އެރިއެލް ހެންރީ އޭނާގެ މަގާމުން އިސްތިއުފާ ދިނުމަށް މަޖުބޫރުކޮށް، އޭނާ މަގާމުން ދުރުކުރުމަށްފަހުއެވެ.

ހެއިޓީގެ ވެރިރަށް ޕޯރޓު-އޯ-ޕްރިންސްގެ 80 އިންސައްތަ ކޮންޓްރޯލް ކުރަނީ އެ ގައުމުގެ ގޭންގުތަކުންނެވެ. އެހެންކަމުން، އެ ސިޓީގައި މީހުން މެރުމާއި، ރޭޕް ކުރުމާއި، ފައިސާއަށް މީހުން ވަގަށް ނެގުމަކީ އާންމު ކަމެކެވެ.

މީގެ އިތުރުން، ގޭންގު ވައިލެންސް އާ ގުޅިގެން ހެއިޓީގެ 578،000 އަށް ވުރެން ގިނަ މީހުންގެ ގެދޮރު ވަނީ ގެއްލިފައެވެ. އަދި އެ ގައުމުގެ އާބާދީގެ 11.7 މިލިއަން މީހުންގެ ތެރެއިން ގާތްގަނޑަކަށް ދެބައިކުޅަ އެއްބައި މީހުން ވަނީ ބަނޑުހައިހޫނު ކަމުގައި ހޭދަކުރަން ޖެހިފައެވެ. އަދި މީގެ ތެރެއިން 1.6 މިލިއަން މީހުން ބަނޑުހައިހޫނު ކަމުގައި މަރުވެދާނެ ކަމުގެ ބިރު އެބައޮތްކަމަށް، ވޯލްޑް ހެލްތު އޯގަނައިޒޭޝަން (ޑަބްލިޔުއެޗްއޯ) އިން ވަނީ ހާމަކޮށްފައެވެ.