އިންޑިއާ އާއި ބަންގްލަދޭޝްގެ ބައެއް ހިސާބުތަކުގައި ފެންބޮޑުވެ، އިންޑިއާގެ އިރުއުތުރާއި އަވަށްޓެރި ބަންގްލަދޭޝްގެ އިރުމަތީ ސަރަހައްދުގައި ލައްކައެއްހާ މީހުން ތާށިވެއްޖެއެވެ.

ބަނގުލަދޭޝްގެ ޑިސާސްޓަރ މެނޭޖުމެންޓް އެންޑް ރިލީފް އިން ހާމަކޮށްފައިވާ ގޮތުގައި، މި ހާދިސާގެ އަސަރު އިރުމަތީ ބަންގްލަދޭޝްގެ ގާތްގަނޑަކަށް 4.5 މިލިއަން މީހުންނަށް ވަނީ ކޮށްފައެވެ. އަދި މި ހާދިސާގައި ހުކުރު ދުވަހާ ހަމައަށް 13 މީހުން ވަނީ އެ ގައުމުން މަރުވެފައެވެ.

އިންޑިއާގެ އިރުއުތުރުގެ ސްޓޭޓެއް ކަމަށްވާ ޓްރިޕޫރާގައި ބޯކޮށް ވާރޭވެހި ފެންބޮޑުވެ، ބިންގަނޑު ކަހާލާފައިވުމުގެ ސަބަބުން، 65،000 އަށް ވުރެ ގިނަ މީހުން ގެދޮރު ދޫކޮށްލަން ޖެހިފައިވާއިރު، 23 މީހުން ވަނީ މިހާތަނަށް މަރުވެފައެވެ.

މި ހާދިސާގައި ގާތްގަނޑަކަށް 1.7 މިލިއަން މީހުންނަށް އަސަރުކޮށްފައިވާ ޓްރިޕޫރާގައި 450 ރިލީފް ކޭމްޕް ވަނީ ހުޅުވާފައެވެ. މީގެ އިތުރުން އެ ސަރަހައްދުގެ އިންފްރާސްޓްރަކްޗާ އާއި ދަނޑުވެރިކަން ކުރާ ބިންތަކަށާއި، ދަނޑުވެރިކަމުން އުފައްދާފައި ހުރި ބާވަތްތަކަށް ބޮޑެތި ގެއްލުންތަކެއް ލިބިފައިވެއެވެ.

ބޯކޮށް ވާރޭ ވެހުމާއި ގުޅިގެން އިންޑިއާގެ ޓްރިޕޫރާގެ އުތުރުން ބޮޑުވެފައިވާ ފެންގަނޑުގެ ސަބަބުން އިރުމަތީ ބަންގްލަދޭޝްގެ ގިނަ ސަރަހައްދުތަކަކަށް ވަނީ ބޮޑެތި ގެއްލުންތައް ލިބިފައެވެ. އެގޮތުން ބަނގުލަދޭޝްގެ ކުމިލާ، ފެނީ އަދި ނޮއަޚާލީ ފަދަ އެންމެ ބޮޑަށް ގެއްލުން ލިބުނު ސަރަހައްދުތަކުން ކަރަންޓް ކަނޑައިގެން ގޮސް، މަގުތައް ވަނީ ބަންދުވެފައެވެ.

މޫސުމީ ވާރޭއާއެކު ދެކުނު އޭޝިއާގެ ހިސާބުތަކަށް ބޮޑެތި ގެއްލުންތަކެއް ކޮންމެ އަހަރަކު ވެސް ލިބޭއިރު، މޫސުމީ ބަދަލާއެކު ކުރިމަތިވާ ހާދިސާތައް ވެސް އަންނަނީ އިތުރުވަމުންނެވެ.