އިޒްރޭލުން ގާޒާ ސިޓީއަށް ދިން ހަމަލާތަކުގައި އިއްޔެ އެކަނިވެސް 35 މީހުން ޝަހީދުކޮށްލާފައިވާއިރު، ގާޒާގެ މުޅި ހެލްތު ސެކްޓަރ މިހާރު އޮތީ އެއްކޮށް ހުއްޓާލަން ޖެހޭ ހާލަތުގައި ކަމަށް، ގާޒާގެ ސިއްހީ ދާއިރާގައި މަސައްކަތްކުރާ މީހުން ބުނެފިއެވެ. އެގޮތުން، ތެޔޮ ނެތުމުގެ ސަބަބުން ހޮސްޕިޓަލްތައް ހިންގުމަށް ދަތިވެ، އަނިޔާ ތަކުގައި ފަރުވާ ހޯދަމުންދާ ގިނަ ކުޑަކުދިންތަކެއްގެ ފަރުވާ ހުއްޓި، އެ ކުދިން މަރުވެދާނެކަމުގެ ބިރުބޮޑުކަމަށް ވެސް ހާމަކޮށްފައި ވެއެވެ.

ގާޒާގައި އިއްޔެ ޝަހީދުކޮށްލި މީހުންގެ ތެރެއިން މަދުވެގެން 9 މީހުންނަކީ އ.ދ.ގެ ޝަތީ ރެފިއުޖީ ކޭމްޕަށް ދިން ހަމަލާއެއްގައި ޝަހީދުކޮށްލާފައިވާ މީހުންނެވެ. އަދި އުތުރު 4 މީހުންނަކީ، ގާޒާގެ އަވަށްޓެރި ހިސާބެއް ކަމުގައިވާ އައް-ޒަރްގާގެ އާންމު ރައްޔިތެއްގެ ކާރަކަށް ދިން ބޮމުގެ ހަމަލާއެއްގައި ޝަހީދުވި މީހުންކަމަށް، ފަލަސްތީނުގެ އިންފޯމޭޝަން ސެންޓަރުން (ޕަލިންފޯ) ވަނީ ހާމަކޮށްފައެވެ.  

ގާޒާގެ އަވަށްޓެރި އެހެން ހިސާބެއް ކަމުގައިވާ ސަބްރާގެ އާންމުން ދިރިއުޅޭ ގެތަކަކަށް އިޒްރޭލުގެ ހަނގުރާމަވެރި މަތިންދާބޯޓުތަކަކުން ބަޑިޖަހާފައިވާކަމަށް ވެސް ޕަލިންފޯއިން ވަނީ ބުނެފައެވެ.

ގާޒާގެ ކަމާލް އަދުވާން ހޮސްޕިޓަލްގެ ޑިރެކްޓަރ، ހުއްސާމް އަބޫ ސާފިޔާ ބުނީ، އެ ހޮސްޕިޓަލުގައި ފަރުވާ ހޯދަމުންދާ 11 ކުޑަކުދިން ތިބީ މަދު ގަޑިއިރުކޮޅެއްގެ ތެރޭގައި މަރުވެދާނެ ފަދަ ހާލަތެއްގައެވެ. އެއީ، ތެޔޮ ލިބުން ދަތިވެ، އެ ހޮސްޕިޓަލުގެ ނާސަރީ އާއި އައިސީޔޫގެ އޮޕަރޭޝަންތައް ހުއްޓާލަން ޖެހިފައި އޮތުމުންނެވެ.

ހުއްސާމް އިތުރަށް ބުނީ، ވޯލްޑް ހެލްތު އޯގަނައިޒޭޝަން (ޑަބްލިޔުއެޗްއޯ) ގެ ކޮންވޯއީއެއް، ބެހާއި ތެލާއެކު ގާޒާއަށް އައުމުގެ މަސައްކަތް ކުރަމުންދާކަމަށާއި، ނަމަވެސް އެ އެހީގެ ތަކެތި ގާޒާއަށް ފޯރާފައި ނުވަނީ، އެ އެހީގެ ޓްރަކްތައް ޗެކްޕޮއިންޓުތައް ފަހަނާއަޅާ ދިއުމަށް އިޒްރޭލު ސިފައިން ހުއްދަ ދީފައި ނުވާތީ ކަމަށެވެ.