ގައްޒާގެ ދެކުނުގެ އަވަށެއް ކަމުގައިވާ ޚާން ޔޫނިސްގެ އަލް-މަވާސީގައި ފަލަސްތީނުގެ އެތައް ހާސް ބަޔަކު ޓެންޓު ތަކުގައި ވަގުތީ ހިޔާވަހިކަމުގައި އުޅެމުން ދަނިކޮށް، އެތަނަށް ބޮން އަޅައި 40 އަށް ވުރެން ގިނަ މީހުން ޝަހީދުކޮށްލާފައިވާކަމަށް ފަލަސްތީނުގެ މީޑިއާތަކުން ރިޕޯޓު ކޮށްފިއެވެ. ރޭގެ ފަތިހު ދިން މި ހަމަލާގައި 60 އެއްހާ މީހުނަށް އެކިވަރުގެ އަނިޔާތައް ވެސް ވަނީ ލިބިފައެވެ.

ގައްޒާގެ ސިވިލް ޑިފެންސް ފޯހުން ހާމަކޮށްފައިވާ ގޮތުގައި، އިޒްރޭލުން މި ހަމަލާ ދީފައިވަނީ ޓެންޓު ތަކުގައި މީހުން ނިދާފައި ތިއްބައެވެ. އެގޮތުން މި ހަމަލާގައި 20 އަށް ވުރެން ގިނަ ޓެންޓު ހިމެނޭ ސަރަހައްދެއް ވަނީ ގޮއްވާލާފައެވެ. ކަމާގުޅޭ ފަރާތްތަކުން ހާމަކޮށްފައިވާ ގޮތުގައި، މި ގޮވުންތަކުގެ ސަބަބުން 9 މީޓަރު (30 ފޫޓު)ގެ ފުން ތިން ވަޅުގަނޑެއް ވަނީ އެ ސަރަހައްދުގައި އުފެދިފައެވެ.

ގައްޒާގެ ރަފާހް އާއި ޙާން ޔޫނިސްގައި އިޒްރޭލު ސިފައިން ހިންގި ގްރައުންޑު އޮޕަރޭޝަނުގައި އެ ސަރަހައްދުތައް ދޫކޮށް ދިއުމަށް މިދިޔަ މަހު އެންގުމާ ގުޅިގެން، ގިނަ ބަޔަކު ބަދަލުވީ އޭރު އިޒްރޭލު ސިފައިން "ސޭފް ޒޯން" އެއް ކަމަށް ބުނި އަލް-މަވާސީގެ ޓެންޓުތަކަށެވެ. އެހެންކަމުން، މި ޓެންޓުތަކުގައި މީހުން ދިރިއުޅެމުން ދިޔައީ ވަރަށް ބައިބޯ ކޮށެވެ.

މަންޒަރު ދުށް މީހުން ހާމަކޮށްފައިވާ ގޮތުގައި، މިއީ އިޒްރޭލު ސިފައިންގެ ވަރަށް ރަހުމް ކުޑަ ހަމަލާއެކެވެ. އެގޮތުން ގައްޒާގެ ސިވިލް ޑިފެންސް ފޯހުން ވާހަކަ ދެއްކި އެ ފޯހުގެ ތަރުޖަމާނު ހާމަކޮށްފައިވާ ގޮތުގައި، ރޭގެ ހަމަލާއަކީ މިހާތަނަށް އިޒްރޭލުން ދިން އެންމެ ރަހުމް ކުޑަ އެއް ހަމަލާކަމުގައި ވާނެއެވެ. އޭނާ އިތުރަށް ހާމަކޮށްފައިވާ ގޮތުގައި، އިޒްރޭލުން މި ހަމަލާތައް ދީފައިވަނީ ބާރުގަދަ މިސައިލްތަކެއް ބޭނުންކޮށްގެންނެވެ. އަދި "ސޭފް ޒޯން" އެއް ކަމަށް ކަނޑަ އެޅުމަށްފަހު ހަމަލާ ދިނުމުން، މި ސަރަހައްދުގައި ދިރިއުޅެމުން ދިޔަ މީހުން މިހާރު ތިބީ އިތުރަށް ބިރުގެންފައިކަމަށް ވެސް އޭނާ ހާމަކޮށްފައިވެއެވެ.