މެލޭޝިއާގެ ކުރީގެ ރަސްގެފާނާ ގުޅުވައި، ފިތުނަ އުފެދޭ ގޮތަށް ވާހަކަ ދެއްކި ކަމުގެ ދައުވާ މިހާރުގެ އިދިކޮޅުގެ ލީޑަރު އަދި އެ ގައުމުގެ ކުރީގެ ޕްރައިމް މިނިސްޓަރު، މުހްޔިއްދީން ޔަސިންގެ މައްޗަށް އުފުލައިފިއެވެ.

މި ދައުވާއާ ގުޅިގެން މުހްޔިއްދީން ވަނީ އަންގާރަ ދުވަހުގެ ހެނދުނު، އެ ގައުމުގެ އިރުއުތުރުގެ ހިސާބެއް ކަމުގައިވާ ގުއާ މުސަންގުގެ ކޯޓަށް ހާޒިރުކޮށްފައެވެ. އަދި މުހްޔިއްދީން ވަނީ އޭނާއާ ދެކޮޅަށް އުފުލާފައިވާ ދައުވާއަށް ދެކޮޅު ހަދާފައެވެ.

މި ދައުވާއަކީ އޮގަސްޓު މަހުގެ 14 ވަނަ ދުވަހު މުހްޔިއްދީން ނިސްބަތްވާ ކޮންޒަވޭޓިވް ޕެރިކަޓަން ނޭޝަނަލް އިއްތިހާދުގެ ކެމްޕެއިން ޖަލްސާއެއްގައި އޭނާ ދެއްކި ވާހަކަތަކަކާ ގުޅިގެން އުފުލާފައިވާ ދައުވާއެކެވެ.

މި ދައުވާ ސާބިތުވެއްޖެނަމަ، 3 އަހަރެއްހާ ދުވަހުގެ ޖަލު ހުކުމެއް އޭނާއަށް އައުން އެކަށީގެންވެއެވެ.

މެލޭޝިއާގެ ނޫސްތަކުން ރިޕޯޓުކޮށްފައިވާ ގޮތުގައި، މުހްޔިއްދީން ވަނީ އެ ޖަލްސާގައި، އޭރުގެ ރަސްގެފާނު، ސުލްތާން އަބްދުﷲ ސުލްތާން އަޙްމަދު ޝާހު، 2022 ގެ އިންތިހާބަށްފަހު އޭނާއަށް ޕްރައިމް މިނިސްޓަރު ކަމުގެ ދައުވަތު ނުދިނުމުން އެކަމަށް ސުވާލު އުފައްދާފައެވެ. އެ ފަހަރު ޕްރައިމް މިނިސްޓަރަށް ވުމުގެ ދައުވަތު ރަސްގެފާނު ދީފައިވަނީ އަންވަރު އިބްރާޙިމްއަށެވެ.

މެލޭޝިއާގެ ރަސްކަން ދެމިގެންދަނީ ތަފާތު ގޮތަކަށެވެ. އެ ގައުމުގެ ދައުލަތް 9 ބަޔަކަށް ބަހައިލައިގެން ކުރިޔަށް ގެންދާއިރު، ކޮންމެ ދައުލަތެއްގެ ވެރިއަކަށް 5 އަހަރަށް ރަސްގެފާނަށް ވުމުގެ ފުރުސަތު ލިބެއެވެ.