ޓްރެއިނީ ޑޮކްޓަރެއް ރޭޕް ކުރުމަށްފަހު މަރުލުމާ ގުޅިގެން، އިންޑިއާގެ ސިއްހީ ހިދުމަތްތެރީން ފަށާފައިވާ އިހުތިޖާޖުތައް ހުއްޓާލުމަށް ގޮވާލައި، ޑޮކްޓަރުންގެ ސަލާމަތްތެރިކަން ކަށަވަރު ކުރުމުގެ މަސައްކަތް ފެށުމަށް ގައުމީ ޓާސްކް ފޯހެއް އުފެއްދުމަށް އެ ގައުމުގެ ސްޕްރީން ކޯޓުން އަމުރުކޮށްފިއެވެ. ސްޕްރީމް ކޯޓުން ޑޮކްޓަރުންގެ އަރިހުން އެދުނީ، އިހުތިޖާޖު ހުއްޓާލުމަށްފަހު މަސައްކަތަށް އެނބުރި ރުޖޫއަ ވުމަށެވެ.

ސްޕްރީމް ކޯޓުން ހާމަކޮށްފައިވާ ގޮތުން، އެ ޓާސްކް ފޯހުގައި އިންޑިއާގެ އެކި ހިސާބުތަކުގެ ޑޮކްޓަރުން ހިމެނޭނެއެވެ. އެ ޓާސްކް ފޯހުގެ އަމާޒަކަށް ވާނީ، އިންޑިއާގެ ސިއްހީ ހިދުމަތްދޭ ހުރިހާ މަރުކަޒެއްގައި މަސައްކަތްކުރާ އެންމެންގެ ސަލާމަތްތެރިކަން ކަށަވަރު ކުރެވޭނެ ހަރުދަނާ އުސޫލުތަކެއް ސްޕްރީމް ކޯޓަށް ހުށަހެޅުން ކަމަށް ވެސް އެ ކޯޓުން ވަނީ ބުނެފައެވެ.

މެޑިސިން ކިޔަވާ ދަރިވަރުންނަށް މަސައްކަތު ތަޖުރިބާ ދިނުމަށް ހާއްސަ އާރުޖީ ކާރ މެޑިކަލް ކޮލެޖުގައި މި ހާދިސާ ހިނގާފައިވަނީ އޯގަސްޓު 9 ވީ ހުކުރު ދުވަހުގެ ރެއެވެ. އަދި އުމުރުން 31 އަހަރުގެ ޑޮކްޓަރުގެ މަރުވެފައި އޮތް ހަށިގަނޑު ފެނިފައިވަނީ ހޮސްޕިޓަލުގެ ތެރެއިން، ގިނަ އަނިޔާތަކާއެކުގައެވެ.

މި ހާދިސާއާ ގުޅިގެން ފެށި މުޒާހަރާތަކާއެކު އިންޑިއާގެ ގިނަ ހޮސްޕިޓަލުތަކުން ދެމުން ގެންދިޔަ އިލެކްޓިވް ހިދުމަތްތައް ވަނީ ހުއްޓާލާފައެވެ. އިލެކްޓިވް ހިދުމަތްތަކަކީ ފަސްކުރެވިދާނެ ނުވަތަ މެޑިކަލީ އެހާ މުހިންމު ނޫން ފަރުވާތަކެވެ. މީގެ އިތުރުން، މި މުޒާހަރާތަކާ ގުޅިގެން، އެތައް ހާސް ބަލިމީހުނަށް އަންނަނީ މިކަމުގެ އުނދަގޫ ފޯރަމުންނެވެ.

ޖިންސީ ގޮތުން ދެވޭ އަނިޔާތަކުގެ މައްސަލަތަކަކީ އިންޑިއާގައި ބޮޑު މައްސަލައެކެވެ. އެގޮތުން 2022 ވަނަ އަހަރު އެކަނިވެސް، އެވަރެޖްކޮށް ދުވާލަކަށް 90 ރޭޕް ކޭސް ވަނީ ޕޮލިހަށް ހުށަހަޅާފައެވެ.