މެސެޖުކުރުމަށް ބޭނުންކުރާ އެޕްލިކޭޝަނެއް ކަމުގައިވާ ޓެލެގްރާމްގެ ފައުންޑަރ އަދި ސީއީއޯ، ޕަވެލް ޑުރޯވް ފްރާންސުގެ ބޯރގެޓް އެއާޕޯޓުން ހައްޔަރުކޮށްފިއެވެ. ފްރާންސްގެ މީޑިއާތަކުން ރިޕޯޓުކޮށްފައިވާ ގޮތުގައި އޭނާ ހައްޔަރުކުރީ ޓެލެގްރާމްއާ ގުޅޭ މައްސަލައަކާ ގުޅިގެންނެވެ.

ފްރާންސްގެ މީޑިއާތަކުން އިތުރަށް ހާމަކުރީ، އުމުރުން 39 އަހަރުގެ ޑުރޯވް ހައްޔަރުކުރީ، އޭނާ ޕްރައިވެޓް ޖެޓެއްގައި އަޒަބައިޖާނުން ގޮސް ފްރާންސަށް ފޭބުމުން، ކޯޓު އަމުރެއްގެ ދަށުން ކަމަށެވެ.

ކުޑަކުދިންނަށް ކުރާ އަނިޔާ ހުއްޓުވުމަށް މަސައްކަތްކުރާ ފްރާންސްގެ އޯއެފްއެމްއައިއެން އިން ޑުރޯވްގެ މައްޗަށް ތުހުމަތުކުރާ ކުށްތަކުގެ ތެރޭގައި މަކަރާއި ހީލަތްހެދުމާއި، މަސްތުވާތަކެތީގެ ވިޔަފާރި އާއި ސައިބަރ ބުލީ ކުރުމާއި އޯގަނައިޒްޑް ކްރައިމް ހިމެނޭކަމަށް، އޭއެފްޕީ ނިއުސް އެޖެންސީއިން ރިޕޯޓުކޮށްފައިވެއެވެ.

މީގެ އިތުރުން، ޓެލެގްރާމް މެދުވެރިކޮށް ހިންގާ ނުރައްކާތެރިކަންކަމާ ދެކޮޅަށް އޭނާ މަސައްކަތް ނުކުރުމަކީ ވެސް އޭނާގެ މައްޗަށް ތުހުމަތުކުރާ ކަމެކެވެ.

އޭނާއާ ދެކޮޅަށް މިހާ ގިނަ ތުހުމަތުތައް ފްރާންސުން ކުރާކަން އެނގިހުރެ، އޭނާ އެ ގައުމަށް ދަތުރުކޮށްފައިވާތީ ގިނަ ބަޔަކު އެކަމާ ސުވާލު އުފައްދައެވެ.

ގިނަ ބަޔަކު އެދޭ އެންކްރިޕްޓެޑް ފީޗާތަކާއެކު، ޑުރޯވް އާއި އޭނާގެ ބޭބެ ޓެލެގްރާމް އުފެއްދީ 2013 ވަނަ އަހަރު ރަޝީއާގައެވެ.