ބަނގުލަދޭޝްގައި ކުރިޔަށް ދިޔަ ބޮޑު މުޒާހަރާތަކާ ގުޅިގެން ގައުމު ދޫކޮށް ފިއްލެވި ބަނގުލަދޭޝްގެ ކުރީގެ ބޮޑު ވަޒީރު، ޝެއިހް ހާސީނާ އަނބުރާ އެގައުމަށް ގެނައުމުގެ މަސައްކަތް ފަށާފައިވާކަމަށް، ބަނގުލަދޭޝްގެ އިންޓަނޭޝަނަލް ކްރައިމްސް ޓްރިބިއުނަލް (އައިސީޓީ) އިން ހާމަކޮށްފިއެވެ.

އައިސީޓީ އަކީ 1971 ވަނަ އަހަރު ޕާކިސްތާނުގެ އަތްދަށުން ބަންގްލަދޭޝް މިނިވަންވުމަށް ކުރި ހަނގުރާމައިގައި ހިނގި އަނިޔާވެރި ޢަމަލުތައް ތަޙްޤީޤުކުރުމަށް 2010 ވަނަ އަހަރު ހަސީނާ އުފެއްދި މުއައްސަސާއެކެވެ.

އައިސީޓީގެ ޗީފް ޕްރޮސެކިއުޓަރު އާދީއްތަ ދުވަހު ބުނެފައިވަނީ، ހަސީނާގެ ސަރުކާރުން ހިންގާފައިވާ ޖަރީމާތަކުގެ ޝަރީއަތްތައް ކުރިޔަށް ގެންދިއުމަށްޓަކައި، އިންޑިއާގައި ހުންނެވި ހަސީނާ ބަންގްލަދޭޝަށް އަނބުރާ ގެނައުމުގެ ޤާނޫނީ މަސައްކަތް ފަށާފައިވާ ކަމަށެވެ.

ހަސީނާއާ ދެކޮޅަށް ހަފްތާތަކަށް ބަނގުލަދޭޝްގައި ދެމިގެންދިޔަ ހަމނުޖެހުންތަކާ ގުޅިގެން، އޯގަސްޓު ފަސްވަނަ ދުވަހު އޭނާ ވަނީ މިލިޓަރީ ހެލިކޮޕްޓަރެއްގައި އިންޑިއާގެ ނިއު ދިއްލީއަށް ގޮސް، އެ ގައުމުގެ ހިމާޔަތް ހޯދާފައެވެ. އަދި އިންޑިއާއިން ހަސީނާއަށް ހިމާޔަތް ދިނުމާ ގުޅިގެން އިންޑިއާ އާއި ބަނގުލަދޭޝްއާ ދެމެދު ވަނީ ސިޔާސީ ނުތަނަވަސްކަން އުފެދިފައެވެ.

އައިސީޓީގެ ޗީފް ޕްރޮސެކިއުޓަރ މުޙައްމަދު ތާޖުލް އިސްލާމް ހާމަކޮށްފައިވާ ގޮތުގައި، 15 އަހަރު ވަންދެން ޤައުމުގެ ވެރިކަން ހަސީނާ ކުރައްވާފައިވަނީ ގޮށްމުށުގެ ބާރުން ކަމަށާއި، ހަސީނާ ހޯދަން ބޭނުންވަނީ އޭނާގެ ސަރުކާރުން ހިންގި "ގަތުލުއާންމު" ތަކުގެ ޝަރީއަތާ ކުރިމަތިލެއްވުމަށް ކަމަށެވެ. އަދި މި ޝަރީއަތްތަކަށް ހަސީނާ ބަނގުލަދޭޝްއަށް ގެނައުމުގެ މަސައްކަތް ކުރަނީ، 2013 ވަނަ އަހަރު އިންޑިއާ އާއި ބަނގުލަދޭޝްއާ ދެމެދު ސޮއި ކުރެވުނު ކުށްވެރިން ބަދަލު ކުރުމުގެ އެއްބަސްވުމުގެ ދަށުން ކަމަށް ވެސް އިސްލާމް ހާމަކޮށްފައި ވެއެވެ.