ގާޒާގައި އެކުވެރި ދައުލަތް (އ.ދ.) އިން ދެމުން އައި އެހީތައް ހުއްޓާލަން މަޖުބޫރުވެގެން، އެ ޖަމްއިއްޔާގެ މަސައްކަތްތައް ހުއްޓުމަކަށް އައިސްފާއިވާކަމަށް، އެ ޖަމްއިއްޔާގެ އިސް އޮފިޝަލަކު ހާމަކޮށްފިއެވެ. އ.ދ. ގެ އެހީތައް ގާޒާގައި ހުއްޓާލަން ޖެހުނީ، ދަޔާ އަލް-ބަލާހްގައި ތިބި މީހުން އެ ސިޓީއިން ފޭބުމަށް އިޒްރޭލުން އެންގުމާ ގުޅިގެންނެވެ.

އ.ދ. އިން ބުނެފައިވަނީ، އިޒްރޭލުން ކަން ކުރަމުންދާ އުސޫލުގެ ސަބަބުން، އެ ޖަމްއިއްޔާގެ މަސްއޫލިއްޔަތު އަދާކުރުމަށް ބޮޑު ގޮން ޖެހުމަކަށް ވެފައި ވާކަމަށެވެ. އޭގެ އެއްސަބަބަކީ، އެ ޖަމްއިއްޔާގެ ކޮމާންޑު ވެސް އިރުއިރު ކޮޅުން އެއް ތަނުން އަނެއް ތަނަށް ބަދަލުވާންޖެހި، ރަގަޅަށް މަސައްކަތް ކުރުމުގެ މިނިވަންކަމާއި ފުރުސަތު ލިބިގެން ނުދިއުމެވެ.

މީގެ އިތުރުން، އ.ދ. އިން ބުނީ، އެ ދަތިކުރުންތަކާ އެކުވެސް އެމީހުން ގާޒާ ދޫކޮށް ނުދާނެކަމަށެވެ. ސަބަބަކީ ގާޒާގެ ރައްޔިތުން އ.ދ. ގެ އެހީ އިންތިހާއަށް ބޭނުންވުމެވެ. ނަމަވެސް، މި އުނދަގޫ ހާލަތުގައި އެކަން ކުރަމުން އ.ދ. ގެ އޮފިޝަލުންނަށް ރައްކާތެރިކަން ފޯރު ކޯށްދިނުން ވެސް އޮތީ ދަތިކަމަކަށް ވެފައެވެ.

އިޒްރޭލު ސިފައިން ފަލަސްތީނުގެ ރައްޔިތުން ދަޔާ އަލް-ބަލާހް އިން ފޭބުމަށް އަންގާފައިވަނީ މިދިޔަ އާދީއްތަ ދުވަހުއެވެ. އިންސާނިއްޔަތުކަމެއް ނެތް އިޒްރޭލު ސިފައިން ހާމަކޮށްފައިވާ ގޮތުގައި، އެމީހުން ދަނީ ކުރިން ރައްކާތެރި ތަނެއްގެ ގޮތުގައި ކަނޑައަޅާފައި އޮތް، ދަޔާ އަލް-ބަލާހް ގައި ގްރައުންޑު އޮޕަރޭޝަނެއް ފެށުމަށް ތައްޔަރު ވަމުންނެވެ.

މިކަމުގެ ސަބަބުން އ.ދ. ގެ ވޯލްޑް ފުޑް ޕްރޮގްރާމް ގެ މަސައްކަތްތަކަށް ވެސް ވަނީ ބުރޫއަރާފައެވެ. އެމީހުންގެ ކާއެއްޗެތި ބަހާ ސްޓޭޝަންތަކާއި ބަދިގެތަކުގެ މަސައްކަތްތައް ކުރިޔަށް ގެންދިއުމަށް ވެސް އުނދަގޫވެފައި ވަނީ އެއްތަނުން އަނެއްތަނަށް ބަދަލުވާން ޖެހުމުންނެވެ.