ގިނަ ދަރިން ތިބޭ މީހުން ދުނިޔޭގައި އުޅެފައިވާކަމަށް ތުންތުން މަތިންނާއި ފޮތްތަކުން އަހަރެމެންނަށް އެނގެއެވެ. ނަމަވެސް، އެކި ގައުމުތަކުގެ މީހުންނަށް 100 އަށް ވުރެން ގިނަ ދަރިން ހޯދޭނީ، ހަމަގައިމުވެސް އެއް ގޮތަށް ވުރެން ގިނަ ގޮތްގޮތުން ކާމިޔާބު މީހުންނަށެވެ. މިފަހަރު މި ކިޔާދެނީ އެފަދަ މީހެއްގެ ވާހަކައެވެ.

ދުނިޔޭގައި އެންމެ ރައްކާތެރި އެއް ނެޓްވޯކުގެ ގޮތުގައި ބެލެވިފައި އޮތް ޓެލެގްރާމްގެ ފައުންޑަރ، ޕަވެލް ޑްރޯވް ވަނީ އޭނާގެ  100 އަށް ވުރެން ގިނަ ދަރިން، 12 އަށް ވުރެން ގިނަ ގައުމެއްގައި މިހާރު ދިރިއުޅެމުންދާކަމަށް ބުނެ، އޭނާގެ ޓެލެގްރާމް ޗެނަލްގައި ޕޯސްޓެއް ކޮށްފިއެވެ. އުމުރުން 39 އަހަރުގެ މީހަކު މިހެން ބުނުމުން، ކިޔުންތެރިންގެ ތެރެއިން ގިނަ ބަޔަކު ހިތަށް އަރާނެ އެއް ސުވާލަކީ، އެންމެ ރައްކާތެރި ޗެނަލްގެ ފައުންޑަރަށް، ރައްކާތެރި ގޮތުގައި ދޭތެރެ ދުރުކުރާނެ އުކުޅުތައް ހަމަ ހަގީގަތުގައި ވެސް ނޭންގެނީތޯ ހިތައް އަރާ އުފެދޭ ސުވާލެވެ. ނޫންނަމަ، އޭނާގެ މުދަލުގެ އަގު 15.5 ބިލިއަން ޑޮލަރުގައި ހުރުމުން، ވިސްނުމެއްނެތި ދަރިން ހޯދަމުން ދަނީ ބާއެވެ.

މުޅިއަކުން އެހެނެއް ނޫނެވެ. ޑުރޯވްގެ މިހާ ގިނަ ދަރިން ތިބެނީ، އޭނާގެ ދަރިފަނީގެ ސިއްހަތު ރަގަޅު ކަމުންނެވެ. މިކަން ފެށުނު ހިސާބު ޑުރޯވް ވަނީ އޭނާގެ ޗެނަލްގައި ހިއްސާކޮށްފައެވެ.

ޑުރޯވް ކިޔައިދީފައިވާ ގޮތުގައި، މީގެ 15 އަހަރު ކުރިން އޭނާގެ ރަހްމަތްތެރިއަކު އައިސް އޭނާގެ ކައިރީގައި ވަރަށް އާދަޔާ ހިލާފު ކަމަކަށް އެދުނެވެ. ރަހްމަތްތެރިޔާ އެދުނު ކަމަކީ، އެ ދެމަފިރިންނަށް ދަރިމައިވުމުގެ މައްސަލަ ކުރިމަތިވެ ދަރިއެއް ހޯދުމަށް ކުރަމުންދާ މަސައްކަތް ނާކާމިޔާބުވެފައި ވުމުން، އެކަމަށް އެހީތެރިވެދިނުމުގެ ގޮތުން ޑުރޯވްގެ ސްޕަރމް ކުލިނިކަކަށް ހަދިޔާ ކުރުމަށެވެ. ރަހްމަތްތެރިޔާގެ އެ އެދުމަށް ފުރަގަސްދޭކަށެއް ޑުރޯވްއަކަށް ނުކެރުނެވެ.

ރަހްމަތްތެރިޔާގެ މި އެދުން ފުއްދާ ދިނުމަށް، ސްޕަރމް ހަދިޔާ ކުރުމަށް ކްލިނިކަށް ދިއުމުން، ޑުރޯވްގެ ސްޕަރމްގެ ކޮލެޓީ އެނގި، އެންމެ ފަހުން ކްލިނިކުގެ ވެރިޔާގެ ހާއްސަ ރިކުއެސްޓެއް ވެސް ޑުރޯވް އަށް ލިބުނެވެ. ނަމަވެސް އެއީ އޭނާއަށް ދަރިއަކު ނުލިބިގެން ކުރި ރިކުއެސްޓެއް ނޫނެވެ. ކުލިނިކުގެ ވެރިޔާ އެދުނީ، ރަގަޅު ކޮލިޓީގެ ސްޕާމް ޑޯނަރުން ލިބުމަށް ދަތި ވާހަކައެވެ. އެގޮތުން، ޑުރޯވްގެ ސްޕަރމް ކޮލެޓީ ރަގަޅުވުމުން، ދަރިމައިވުމުގެ މައްސަލަތައް ދިމާވާ މީހުން ބޭނުންކުރުމަށް، އޭނާގެ ސްޕަރމް އިތުރަށް ހަދިޔާ ކޮށްދިނުމަށް އެދުނެވެ.

މި އެދުމަކަށް ވެސް އޭނާ ފުރަގަހެއް ނުދިނެވެ. އަދި ރަސްމީކޮށް ސްޕަރމް ޑޯނަރެއްގެ ގޮތުގައި އޭނާ ރަޖިސްޓްރީވެ، ގިނަ ކްލިނިކްތަކަކަށް ސްޕަރމް ހަދިޔާ ކުރިއެވެ.

އަދި އޭގެ 15 އަހަރު ފަހުން 2024 ވަނަ އަހަރު، އޭނާގެ ސްޕަރމް ބޭނުންކޮށްގެން، މިހާރު 12 ގައުމަކަށް ނިސްބަތްވާ 100 އަށް ވުރެން ގިނަ ދެމަފިރިން މިވަނީ ދަރިން ހޯދާފައެވެ. ޑުރޯވްގެ ސަބަބުން ގިނަ ދެމަފިރިންތަކަކަށް އުފާވެރި ހަޔާތެއް އާރާސްތު ކުރުމުގެ ފުރުސަތު މިވަނީ ލިބިފައެވެ. އޭނާ ހާމަކޮށްފައިވާ ގޮތުގައި، އަދިވެސް އެއް ކްލިނިކެއްގައި މީގެ 15 އަހަރު ކުރިން އޭނާ ހަދިޔާ ކުރި ސްޕަރމް ސާމްޕަލްތައް ރައްކާކޮށްފައި އެބަހުއްޓެވެ. ނަމަވެސް އެއީ ކޮން ގައުމެއްގައި ހުންނަ ކޮން ކްލިނިކެއް ކަމެއް ހާމަކޮށްފައެއް ނުވެއެވެ.