ބްރެޒިލްގެ ސްޕްރީމް ކޯޓަކުން، ސޯޝަލް މީޑިއާ ޕްލްޓްފޯމެއް ކަމުގައިވާ "އެކްސް"، އެ ގައުމުގައި ބޭނުން ނުކުރެވޭގޮތަށް ވަގުތުން ސަސްޕެންޑު ކުރުމަށް އަމުރުކޮށްފިއެވެ. ސްޕްރީމް ކޯޓުން މިގޮތަށް އަމުރުކުރީ، "އެކްސް"ގެ ގާނޫނީ ވަކީލަކު މި މައްސަލައިގައި އައްޔަނު ކުރުމަށް ދީފައިވާ މުއްދަތު ހަމަވުމަށްފަހުއެވެ.

ސްޕްރީމް ކޯޓުގެ މި އަމުރާ އެކީ، ބްރެޒިލްފައި "އެކްސް" ގެ ސްޓާލިންކު ބޭނުން ކުރުން ވެސް މަނާވާނެއެވެ. އެހެންކަމުން ސްޓާލިންކުން ބްރެޒިލްގައި ފައިސާގެ މުއާމަލާތް ކުރާ ބޭންކު އެކައުންޓުތައް ވެސް ފްރީޒް ކުރުމަށްވަނީ އަމުރުކޮށްފައެވެ.

މި އަމުރަކީ ބްރެޒިލްގެ ސްޕްރީމް ކޯޓުގެ ފަނޑިޔާރު، އެލެކްސެންޑަރ ޑި މޮރޭސް އާއި "އެކްސް" ގެ ވެރިޔާ، އޭލޮން މަސްކާއި ދެމެދު އުފެދިފައިވާ ގިނަ ދުވަސްވީ މައްސަލަތަކެއް ނިމުމަކަށް ގެނުވާނެ އަމުރެކެވެ.

"އެކްސް" އާ ދެކޮޅަށް ނެރުނު މި ކޯޓު އަމުރު އުވާލެވޭނެކަމަށް ބުނެފައިވަނީ، އެ ކުންފުންނަށް އަމުރުކޮށްފައިވާ ކަންކަން ފުރިހަމަ ކުރުމަށް ފަހުއެވެ. އޭގެ ތެރޭގައި އެ ކުންފުނިން ދައްކަންޖެހޭ 3.28 މިލިއަން އެމެރިކާ ޑޮލަރުގެ ޖޫރިމަނާ އާއި އެ ކުންފުނިން އައްޔަން ކުރަން ޖެހޭ ގާނޫނީ ވަކީލު އައްޔަން ކުރުން ހިމެނެއެވެ.

މީގެ އިތުރުން، ވާރޗުއަލް ޕްރައިވެޓް ނެޓްވޯކް (ވީޕީއެން) ބޭނުންކޮށްގެން "އެކްސް" ޕްލެޓްފޯމް ބްރެޒިލްގައި ބޭނުން ކުރުމަށް މަގުފަހިކޮށްދޭ ކުންފުނިތައް ވެސް ދުވާލަކު 8،900 އެމެރިކާ ޑޮލަރުން ޖޫރިމަނާ ކުރުމަށް ވަނީ ހުކުމް ކޮށްފައެވެ.