އިންޑިއާގައި މަންކީ ޕޮކްސްއަށް ޝައްކު ކުރެވުނު މީހާއަށް ޖެހިފައި ވަނީ އެބަލިކަން ޓެސްޓްތަކުން ކަށަވަރުކުރެވިފައިވާ ކަމުގައި އިންޑިއާ ސަރުކާރުން ހާމަކޮށްފިއެވެ.

އިންޑިއާގެ އިންފޮމޭޝަން ބިއުރޯއިން ނެރުނު ބަޔާނުގައި ބުނެފައި ވަނީ، މަންކީ ޕޮކްސްއަށް ޝައްކު ކުރެވިގެން އެކަހެރިކުރެވުނު މީހާއަށް ޖެހިފައި ވަނީ އެބަލިކަން ކަށަވަރުކުރެވިފައި ވުމާއިއެކު ރައްކާތެރިކަމުގެ ގޮތުން އަޅަންޖެހޭ އިތުރު ފިޔަވަޅުތައް އަޅަމުން ގެންދާ ކަމަށެވެ. އަދި އެބަލި ޖެހިފައިވާ މީހަކު ފުރަތަމަ ފަހަރަށް އިންޑިއާއިން ފެނުނު ނަމަވެސް އެކަމުގައި އާއްމު ސިއްޙަތަށް ނުރައްކާ ހާލަތެއް އަދި ނެތްކަމުގައިވެސް ވަނީ ބުނެފައެވެ.

އިންޑިއާގެ އިންފޮމޭޝަން ބިއުރޯއިން ހާމަކޮށްފައިވާ ގޮތުގައި، މަންކީ ޕޮކްސްއަށް ޕޮޒިޓިވްވެފައި ވަނީ ޒުވާން ފިރިހެނެކެވެ. އޭނާއަކީ އެބަލި ފެތުރެމުން އަންނަ ޤައުމަކުން ދަތުރުކޮށްފައި އައިސް އަލާމަތްތައް ފެނިގެން އެކަހެރިކޮށްފައިވާ މީހެކެވެ. ޖުލައި މަހުން ފެށިގެން މިހާތަނަށް މިބައްޔަށް ޝައްކު ކުރެވުނު 30 މީހަކު އިންޑިއާގައި އެކަހެރި ކުރެވުނު ނަމަވެސް، މިއީ ބައްޔަށް ޝައްކު ކުރެވުނު މީހަކު އެބައްޔަށް އިންޑިއާއިން ޕޮޒިޓިވްވި ފުރަތަަމަ ފަހަރެވެ.

އިންޑިއާއިން މަންކީ ޕޮކްސްއަށް ޕޮޒިޓިވްވި މީހާގެ ހާލު ރަނގަޅު ކަމުގައި އިންޑިއާއިން ހާމަކޮށްފައިވެއެވެ.

ޑިމޮކްރެޓިކް ރިޕަބްލިކް އޮފް ކޮންގޯއިން ފެނިފައިވާ މިބަލީގެ އައި ވޭރިއަންޓް ދުނިޔޭގެ އެހެން ޤައުމުތަކަށް މިހާރު އަންނަނީ ފެތުރެމުންނެވެ. އެއާއެކު ދުނިޔޭގެ ޞިއްޙަތު ޖަމިއްޔާއިން މިހާރު ވަނީ، އެބައްޔާއި ގުޅިގެން މުޅި ދުނިޔެއަށް އާއްމު ސިއްޙަތުގެ ކުއްލި ނުރައްކަލުގެ ޙާލަތު އިޢުލާނުކޮށްފައެވެ.