ދުނިޔޭގައި ދެވަނައަށް އެންމެ ބޮޑު ޑައިމަންޑު އެފްރިކާގެ ގައުމެއް ކަމުގައިވާ ބޮސްވާނާ އިން ފެނިއްޖެއެވެ. އޭގެ ބަރުދަނުގައި 2،492 ކެރެޓު ހުންނަ ކަމަށް، މި ޑައިމަންޑު ހޯދި ކެނަޑާގެ މައިނިން ކުންފުނިން ވަނީ ހާމަކޮށްފައެވެ.

އެކްސްރޭ ޓެކްނޮލޮޖީ ބޭނުންކޮށްގެން ހޯދި މި ޑައިމަންޑު ފެނިފައިވަނީ ބޮސްވާނާގެ އިރުއުތުރުގައި އޮންނަ ކަރޯވޭ ޑައިމަންޑު މައިނުންނެވެ.

މި ޑައިމަންޑުގެ އަގެއް ނުވަތަ އޭގެ ކޮލިޓީއާ ގުޅޭގޮތުން އެއްވެސް މައުލޫމާތެއް ކަމާބެހޭ ފަރާތްތަކުން ހާމަކޮށްފައެއް ނުވެއެވެ. ނަމަވެސް މިކަމާއި ގުޅޭ މައުލޫމާތު އެނގޭ ތަޖުރިބާކާރުން ބުނާގޮތުން މި ޑައިމަންޑްގެ އަގު 40 މިލިއަން ޑޮލަރަށް އަރާނެއެވެ.

މިހާތަނަށް ފެނުނު އެންމެ ބޮޑު ޑައިމެންޑު ފެނިފައިވަނީ 1905 ވަނަ އަހަރު ސައުތު އެފްރިކާ އިންނެވެ. އޭގެ ބަރުދަނުގައި 3،016 ކެރެޓު ހުއްޓެވެ.

ނިމިދޔަ ހަފްތާ ބޮސްވާނާއިން ފެނުނު ޑައިމަންޑަކީ މިހާތަނަށް އެގައުމުން ފެނުނު އެންމެ ޑައިމަންޑެވެ. މީގެކުރިން އެ ޤައުމުން ފެނުނު އެންމެ ބޮޑު ޑައިމަންޑު ފެނިފައިވަނީ 2019 ވަނަ އަހަރުއެވެ. އޭގެ ބަރުދަނުގައި 1758 ކެރެޓް ހުއްޓެވެ. އެ ޑައިމަންޑްވެސް ނަގާފައިވަނީ މިފަހަރުވެސް ޑައިމަންޑް ފެނުނު ކަރޯވޭ މައިނުންނެވެ.

ބޮޓްސްވާނާއަކީ ދުނިޔޭގައި އެންމެ ގިނައިން ޑައިމަންޑް ނަގާ އެއް ޤައުމަށްވާއިރު، ދުނިޔޭގައި ނަގާ ޑައިމަންޑްތަކުގެ 20 އިންސައްތަ އަންނަނީ އެ ޤައުމުންނެވެ. ނަމަވެސް ޑައިމަންޑްތައް ނަގާ މައިންތަކުގެ ހިއްސާ އޮންނަނީ ބޭރު ކުންފުނިތަކުގައިކަމުން، އެ ޤައުމުން އަންނަނީ އެކަމާއި ގުޅޭ ޤާނޫނުތައް ބަދަލުކުރަމުންނެވެ. އެގޮތުން ޑައިމަންޑް ނަގާ ކުންފުނިތަކުގެ 24 އިންސައްތަ ހިއްސާ އެ ޤައުމުގެ ސަރުކާރަށް ނުވަތަ އެ ޤައުމުގެ ކުންފުނިތަކަށް ދޭންޖެހޭ ގޮތަށް ޤާނޫނުތަކަަށް ބަދަލު ގެނައުމުގެ މަސައްކަތް ދަނީ ކުރަމުންނެވެ.