އިޒްރޭލާއި ހަމާސްގެ ހަނގުރާމައާ ގުޅިގެން ކުޑަކުދިންނަށް ވެކްސިންޖެހޭނެ ހާލަތެއް ނެތިގެން އެކަން ހުއްޓާލާފައި ވަނިކޮށް، ގައްޒާގެ 10 މަހުގެ ކުއްޖެއްގެ ގައިން ޕޯލިއޯ ފެނިއްޖެއެވެ. ފަލަސްތީނުގެ ހެލްތު މިނިސްޓްރީއިން ހުކުރު ދުވަހު ހާމަކޮށްފައިވާ ގޮތުގައި، މި ކޭސް ފެނިފައިވަނީ ޑެއާ އަލް-ބަލާހް ސިޓީއިންނެވެ.

ޕޯލިއޯ އާންމު ގޮތެއްގައި ޖެހެނީ 5 އަހަރުން ދަށުގެ ކުދިންނަށެވެ. އަދި މި ބަލި ފެތުރެނީ ތަގައްޔަރުވެފައިވާ ފެނުންނެވެ. މި ބަލި ކޮންޓްރޯލް ނުކުރެވޭ ހަމައެކަނި ދެ ގައުމަކީ ޕާކިސްތާނާއި އަފްގާނިސްތާނެވެ. މި ބައްޔަކީ ނުރައްކާތެރި ބައްޔެކެވެ. އެގޮތުން ބަލި ޖެހިއްޖެނަމަ، މަރުވުމާއި ޕެރަލައިޒްވުމަކީ އާންމުގޮތެއްގައި ދިމާވާ ކަންތައްތަކެވެ.

ފަލަސްތީނުގެ 640،000 ކުދިންނަށް ޕޯލިއޯ ވެކްސިން ދިނުމަށް، 7 ދުވަހަށް ހަނގުރާމަ މެދުކަނޑާލުމަށް އ.ދ. ގެ ކުޑަކުދިންގެ ހައްގުތަކަށް މަސައްކަތްކުރާ އެޖެންސީއިން ވަނީ ގޮވާލާފައެވެ.

އ.ދ. އިން އިތުރަށް ބުނެފައިވަނީ، ފާއިތުވި 25 އަހަރުގައި ޕޯލިއޯ އެއްކޮށް ނައްތާލެވިފައި އޮތް ގާޒާ އިން މިދިޔަ މަހު ވަނީ ޕޯލިއޯ ވައިރަސް ފެނިފައި ކަމަށެވެ.

ވޯލްޑް ހެލްތު އޯގަނައިޒޭޝަން (ޑަބްލިޔުއެޗްއޯ) އިން ހާމަކޮށްފައިވާ ގޮތުގައި، މި މަސް ނިމޭ ހިސާބަށް، 1.6 މިލިއަން ޑޯޒްގެ ވެކްސިން ގާޒާއަށް ފޮނުވޭވަރަށް ތައްޔާރު ކުރެވޭނެއެވެ. ވެކްސިން ކެމްޕެއިން ދެ ބުރަށް ކުރިޔަށް ގެންދަން ޖެހޭއިރު، 10 އަހަރުން ދަށުގެ ހުރިހާ ކުޑަކުދިންނަށް މި ވެކްސިން ދިނުމަށް ޑަބްލިޔުއެޗްއޯއިން ވަނީ ނިންމާފައެވެ. އަދި ވައިރަސް ފެތުރުން ކޮންޓްރޯލް ކުރެވޭނީ ވެކްސިންގެ ކޮންމެ ބުރެއްގައި %95 ޕަސެންޓު ކުދިންނަށް ވެކްސިން ދެވިގެންކަމަށް، އ.ދ. އިން ހާމަކޮށްފައިވެއެވެ.

ނަމަވެސް ގާޒާގެ ހެލްތު މިނިސްޓްރީ އާއި ޑަބްލިޔުއެޗްއޯ އިން ވެސް ބުނެފައިވަނީ، ހަނގުރާމަ މެދުކަނޑާލުމުން ނޫނީ ވެކްސިން ކެމްޕެއިން ކުރިޔަށް ނުގެންދެވޭނެ ކަމަށެވެ.