ވެލިދޫ ރަމަޟާން ވޮލީބޯޅަ ލީގުގެ އަންހެން ޑިވިޝަންގެ ޗެމްޕިއަންކަން ސެފަޔާއިން ކާމިޔާބުކޮށްފިއެވެ. މުބާރާތް ހުޅުވި މެޗުގައި ވިކްޓޯރިއަސްއިން ސީދާ 3 ސެޓުން ސެފަޔާ ބަލިކޮށްފައިވީނަމަވެސް، ފައިނަލް މެޗުގައި ސެފަޔާ ފެނިގެން ދިޔައީ މިފަދަ މެޗަކަށް ވަރަށް ބޮޑަށް މެންޓަލީ ތައްޔާރުވެފައި އޮތް ޓީމެއްގެ ގޮތުގައެވެ. ފައިނަލް މެޗު ސީދާ 3 ސެޓުން ކާމިޔާބުކޮށް، ސެފަޔާއިން ވިކްޓޯރިއަސްގެ ކިބައިން ބަދަލުހިފީ، ފުރަތަމަ މެޗުގެ ހިތި ތަޖުރިބާ ހަނދާން ނައްތާލެވޭހާ ވަރުގަދަކޮށެވެ.

ޕޯޗުގީޒުންނަށް ވަފާތެރި ހިކުމަތްތެރިޔާގެ ގޮތުން ދިވެހި ތާރީހު ދަންނަ ވިޔަޒޯރުގެ ހިކުމަތްތެރިކަން ބޮޑުތަކުރުފާނުގެ ކުރިމަތީގައި "ސުމަކަށް" ވިޔަސް، ޓީމް ވިޔަޒޯރުގެ ހިކުމަތްތެރިކަން ދަ ލަޔަންސްގެ ކުރިމަތީގައި މިރޭ ފެނިގެން ދިޔައެވެ. ވެލިދޫ ރަމަޟާން ވޮލީބޯޅަ ލީގުގެ ގްރޫޕް-ބީގެ ފުރަތަމަ މެޗުގައި، ދަ ލަޔަންސް އާއި ޓީމު ވިޔަޒޯރު ބައްދަލުކުރި މެޗު ސީދާ 3 ސެޓުން ކާމިޔާބުކުރީ ޓީމް ވިޔަޒޯރެވެ.

ވެލިދޫ ރަމަޟާން ވޮލީބޯޅަ ލީގުގެ ފިރިހެން ޑިވިޝަނުގެ ފުރަތަމަ މެޗުގައި ނެކޯމާގެ މައްޗަށް ވިންޗަރީމޯއިން ސީދާ 3 ސެޓުން ކާމިޔާބު ހޯދައިފިއެވެ. މި މެޗުގެ މޮޅު ކުޅުންތެރިއަކަށް ހޮވިފައިވަނީ ވިންޗަރީމޯގެ ޖާޒީ ނަންބަރު 13، އަބްދުﷲ ޝިހާމް (ސެންޗޯ)އެވެ.

މުބާރާތުގެ ފިރިހެން ޑިވިޝަންގައި މި އަހަރު 6 ޓީމު ކުޅެއެވެ. މި ޑިވިޝަންގެ މެޗުތައް 2 ގްރޫޕަކަށް ބަހާލައިގެން ކުރިޔަށްގެންދަން ނިންމާފައިވާއިރު، މުބާރާތުގެ ފައިނަލަށް ދަތުރުކުރާ ޓީމުތައް ކަނޑައަޅާނީ ސެމީ ފައިނަލް 3 މެޗު ކުޅުމަށްފަހުއެވެ.

ވެލިދޫ ރަމަޟާން ވޮލީބޯޅަ ލީގުގައި އަންގާރަ ދުވަހުގެރޭ ކުޅުނު ސެމީ ފައިނަލް މެޗު 3-2 ސެޓުން ކާމިޔާބުކޮށް، ފައިނަލުގެ ފަހު ޖާގަ ސެފަޔާއިން ހޯދައިފިއެވެ. ފައިނަލުގެ ޖާގަ ކަށަވަރު ކުރުމަށް ދެ ޓީމުންވެސް ބުރަ މަސައްކަތްތަކެއް ކުރިތަން ފެނުނު މި މެޗުގެ ކުޅުން ކުރިޔަށް ދިޔައީ ވަރަށް ވާދަވެރިކޮށެވެ.

ވެލިދޫ ރަމަޟާން ވޮލީބޯޅަ ލީގުގައި ވިކްޓޯރިއަސްއިން ފްލޭމްސްގެ މައްޗަށް ކުރިހޯދައި، މުބާރާތުގެ ފައިނަލުގެ ފުރަތަމަ ޖާގަ ކަށަވަރުކޮށްފިއެވެ. ވެލިދޫ ވޮލީކޯޓުގައި ކުޅުނު މި މެޗު ވިކްޓޯރިއަސްއިން ކާމިޔާބުކުރީ 3-2 ސެޓުންނެވެ.

ފުރަތަމަ މެޗުން ވިކްޓޯރިއަސްއާ ދެކޮޅަށް ކުޅެ ސެފަޔާއަށް ކުރިމަތިލާންޖެހުނު ނާކާމިޔާބީއަށްފަހު، ކޮންމެވެސްވަރެއްގެ ވަރުބަލިކަމަކާއެކު އެ ޓީމުގެ ދެވަނަ މެޗަށް ނިކުމެފައި މިވަނީ އޭގެ 24 ގަޑިއިރުފަހުންނެވެ. ނަމަވެސް ސެފަޔާއިން މިވަނީ މުބާރާތުގައި ފްލޭމްސް ކުޅުނު ފުރަތަމަ މެޗުން އެ ޓީމު ބަލިކޮށްފައެވެ.

ވެލިދޫ ވޮލީބޯޅަ ލީގުގެ އަންހެން ޑިވިޝަނުގައި މިރޭ ކުޅުނު ފުރަތަމަ މެޗު ސީދާ 3 ސެޓުން ވިކްޓޯރިއަސް ކާމިޔާބުކޮށްފިއެވެ. ވިކްޓޯރިއަސް 3 ސެޓުން މެޗު ކާމިޔާބު ކުރިނަމަވެސް، ދެ ޓީމުގެ ފަރާތުން ވެސް މި މެޗުގައި ބަލާހިތްވާކަހަލަ ކުޅުމެއް ފެނިގެން ދިޔައެވެ.

ވޮލީބޯޅަ ކުރިއެރުވުމަށް ވެލިދޫގައި މަސައްކަތްކުރާ ޒުވާނުންނާއި، ވެލިދޫ ޔޫތު އެންޑް ކޮމިއުނިޓީ ސެންޓަރު ގުޅިގެން ބާއްވާ މި މުބާރާތުގައި އަންހެން އަދި ފިރިހެން ޑިވިޝަންގެ މެޗުތައް ކުޅުމަށް ހަމަޖެހިފައިވެއެވެ. މިރޭ މުބާރާތް ފަށާއިރު، ފުރަތަމަ ކުޅޭނީ އަންހެން ޑިވިޝަންގެ މެޗުތަކެވެ. ފިރިހެން ޑިވިޝަންގެ މެޗުތައް ކުޅޭނީ އަންހެން ޑިވިޝަންގެ ފައިނަލް ކުޅުމަށްފަހުއެވެ. އަންހެން ޑިވިޝަންގެ ފައިނަލް މެޗު ކުޅޭނީ 13 މާޗު ގައެވެ.

ވެލިދޫގެ ވޮލީއަށް ލޯބިކުރާ ފަރާތްތަކާއި، އެ ރަށުގެ އިޖުތިމާއީ މަރުކަޒުން ގުޅިގެން ބާއްވާ މި މުބާރާތުގައި އަންހެން އަދި ފިރިހެން ޑިވިޝަން ވަކިން ކުޅުމަށް ހަމަޖެހިފައިވާއިރު، އަންހެން ޑިވިޝަންގެ މެޗުތައް ކުޅެން ފެށުމަށް ޝެޑިއުލްކޮށްފައިވަނީ މާޗު 7 ވަނަ ދުވަހުއެވެ. އަދި ފިރިހެން ޑިވިޝަންގެ މެޗުތައް ފަށާނީ މާޗު 13 ވަނަ ދުވަހުއެވެ.

ނ. ވެލިދޫގައި މިފަހަކަށް އައިސް ކޮންމެ ރަމަޟާން މަހަކާއި ދިމާކޮށް ބާއްވަމުން އަންނަ "ވެލިދޫ ރަމަޟާން ވޮލީބޯޅަ ލީގު" މި އަންނަ މާޗު މަހު ބޭއްވުމަށް އިއުލާންކޮށްފިއެވެ. ފާއިތުވި 3 އަހަރުގެ ކާމިޔާބީއާއެކީ، މި މުބާރާތަކީ ވެލިދޫގައި ވޮލީއަށް އޮންނަ ފޯރި މެދުކެނޑުނަ ނުދީ، މި ކުޅިވަރު އުއްމީދީ މަންޒިލަކަށް ގެންދިއުމަށް ވެލިދޫގެ ޒުވާނުންނާއި ވޮލީ ކުޅުމަށް ޝައުގުވެރިވާ ފަރާތްތަކުން އަމާޒުހިފާފައިވާ ދުރުރާސްތާ ޕްރޮޖެކްޓެކެވެ.