ވެލިދޫ ރަމަޟާން ވޮލީބޯޅަ ލީގުގެ ފިރިހެން ޑިވިޝަނުގެ ސެމީފައިނަލްގެ ފަހު ޖާގަ ވައިޓް ވޫލްސްއިން ހޯދައިފިއެވެ. އެ ޓީމުން ސެމީ ފައިނަލްގެ ޖާގައެއް ކަށަވަރު މިކުރީ، ރޭ ގްރޫޕް-ބީގެ ފަހު މެޗުގައި ދަ ލަޔަންސްއާ ބައްދަލުކޮށް 3-2 ސެޓުން މެޗު ކާމިޔާބުކޮށްގެންނެވެ.

ރޭގެ މެޗަށް ނިކުތްއިރު ދެ ޓީމަށް ވެސް ސެމީ ފައިނަލަށް ދަތުރު ކުރުމުގެ ފުރުސަތު އޮތެވެ. އެހެންކަމުން މި މެޗު ފެނިގެން ދިޔައީ ވަރަށް "ހައި ޓެމްޕޯ" މެޗެއްގެ ގޮތުގައެވެ. 

މެޗުގެ ފުރަތަމަ ދެ ސެޓު ކާމިޔާބުކުރީ ދަ ލަޔަންސްއެވެ. އެ ޓީމުން މި ސެޓުތައް ގެންދިޔައީ ތަފާތު ބޮޑުކޮށް، 25-16 އަދި 25-15 ޕޮއިންޓުންނެވެ. މެޗުގެ އޮއެވަރު ބަދަލުވެގެން ދިޔައީ ތިންވަނަ ސެޓާ ހިސާބުންނެވެ. އަދި އެއީ ދަ ލަޔަންސްއިން މުބާރާތުގައި އިތުރަށް ކުރިޔަށް ދިޔުމަށް ކުރި އުއްމީދު ބަދަލުވި ވަގުތުވެސް މެއެވެ.

އާނިފްގެ ބޯޅަ ބްލޮކުކުރަން ދަ ލަޔަންގެ ދެ ކުޅުންތެރިން މަސައްކަތްކުރަނީ-- ފޮޓޯ: ނޫނު ފޮޓޯ

ވައިޓް ވޫލްސް އިން ތިން ވަނަ ސެޓުން ފެށިގެން ކުޅުން ވަރަށް ބޮޑަށް ރަގަޅުކޮށް، ފަހަތުން އަރާ މެޗު ކާމިޔާބުކުރިއެވެ. ފަހު ތިން ސެޓު އެ ޓީމުން ކާމިޔާބުކުރީ 25-19، 25-22 އަދި 15-13 ޕޮއިންޓުންނެވެ.

މި މެޗުގެ މޮޅު ކުޅުންތެރިއަކަށް ހޮވުނީ ވައިޓް ވޫލްސްގެ ޖާޒީ ނަންބަރު 2، މުޙައްމަދު އާނިފް އިބްރާޙިމްއެވެ. 

މުބާރާތުގެ ސެމީ ފައިނަލް ދެ މެޗު ކުޅުމަށް ހަމަޖެހިފައިވަނީ މިރެއެވެ. އެގޮތުން ފުރަތަމަ މެޗުގައި ބައްދަލުކުރާނީ ގްރޫޕް-އޭގެ އެއްވަނަ ޓީމު ވިންޗެރީމޯ އާއި ގްރޫޕް-ބީގެ އެއްވަނަ ޓީމު ވިޔަޒޯރެވެ. ދެވަނަ ސެމީގައި ބައްދަލު ކުރާނީ ގްރޫޕް-އޭގެ ދެވަނަ ޓީމު ނެކޯމާ އާއި ގްރޫޕް-ބީގެ ދެވަނަ ޓީމު ވައިޓް ވޫލްވްސްއެވެ. ފުރަތަމަ ސެމީ މެޗު ފެށުމަށް ހަމަޖެހިފައިވަނީ 21:30 ގައެވެ.

މެޗުގެ މޮޅު ކުޅުންތެރިއަކަށް ހޮވުނު އާނިފްއަށް ޓްރޮފީ ހަވާލުކުރަނީ-- ފޮޓޯ: ނޫނު ފޮޓޯ