ވެލިދޫ ރަމަޟާން ވޮލީބޯޅަ ލީގުގެ ފިރިހެން ޑިވިޝަނުގެ ފައިނަލުގެ ފުރަތަމަ ޖާގަ ވިޔަޒޯރުން ހޯދައިފިއެވެ. އެ ޓީމުން ފައިނަލްގެ ޖާގަ ކަށަވަރުކުރީ ސެމީ ފައިނަލް ފުރަތަމަ މެޗުގައި ޓީމް ވިންޗެރީމޯއާ ބައްދަލުކޮށް 3-1 ސެޓުންނެވެ.

މެޗުގެ ފުރަތަމަ ސެޓު ވިންޗެރީމޯއިން 25-23 ޕޮއިންޓުން ގެންދިޔަ ނަމަވެސް، ވިޔަޒޯރުން ވަނީ ދެން ކުޅުނު 3 ސެޓު ކާމިޔާބުކޮށްފައެވެ. ވިޔަޒޯރުން ސެޓުތައް ކާމިޔާބުކުރީ 25-15 ޕޮއިންޓުންނާއި، 25-20 ޕޮއިންޓުން އަދި 25-23 ޕޮއިންޓުންނެވެ. ފުރަތަމަ ސެމީ ފައިނަލްގެ މޭން އޮފް ދަ މެޗަކަށް ހޮވިފައިވަނީ ވިޔަޒޯރުގެ ޖާޒީ ނަންބަރު 10، އިބްރާޙިމް އަޝްރަފްއެވެ.

މި މެޗުން ބަލިވި ކަމުގައި ވީނަމަވެސް ވިންޗެރީމޯއަށް އަދި ފައިނަލަށް ދިއުމުގެ ފުރުސަތު އެބައޮތެވެ. މުބާރާތް ރާވާފައިވާ ގޮތުން، ސެމީ ފައިނަލްގެ 3 މެޗު ކުޅުމަށް ހަމަޖެހިފައިވެއެވެ. ފުރަތަމަ ސެމީ ފައިނަލުން ބަލިވާ ޓީމެއް، ސެމީ ފައިނަލުގެ ތިން ވަނަ މެޗުގައި ބައްދަލުކުރާނީ، ސެމީ ފައިނަލުގެ ދެ ވަނަ މެޗުން މޮޅުވާ ޓީމަކާއެވެ.

ރޭ ކުޅުނު ސެމީ ފައިނަލުގެ ދެވަނަ މެޗުގައި ބައްދަލުކުރީ ވައިޓް ވޫލްވްސް އާއި ނެކޯމާއެވެ. މި މެޗު 3-1 ސެޓުން ކާމިޔާބުކޮށް، ތިން ވަނަ ސެމީ ފައިނަލުން ޖާގަ ހޯދީ ނެކޯމާއެވެ.

މި މެޗުގައި ނެކޯމާއިން ކާމިޔާބުކުރީ ފުރަތަމަ ސެޓާއި، ދެވަނަ ސެޓާއި އަދި ހަތަރު ވަނަ ސެޓެވެ. އެއީ 26-24، 25-19 އަދި 25-19 ޕޮއިންޓުންނެވެ. މެޗުގެ ތިން ވަނަ ސެޓު ވައިޓް ވޫލްސް އިން ކާމިޔާބުކޮށްފައިވަނީ 25-22 ޕޮއިންޓުންނެވެ.  މި މެޗުގެ މޮޅު ކުޅުންތެރިއަކަށް ހޮވިފައިވަނީ ނެކޯމާގެ ޖާޒީ ނަންބަރު 12، ސޮއްފަތު މުޙައްމަދެވެ.

ސެމީ ފައިނަލްގެ ތިން ވަނަ މެޗު އޮންނާނި މިރެއެވެ. މި މެޗުގައި ބައްދަލު ކުރާނީ ވިންޗެރީމޯ އާއި ނެކޯމާއެވެ. މެޗު ފެށުމަށް ހަމަޖެހިފައިވަނީ މިރޭ 21:30 ގައެވެ.

މުބާރާތުގެ ގްރޫޕް ސްޓޭޖުގައި ވެސް މި ދެ ޓީމު ބައްދަލުކޮށްފައިވެއެވެ. އެ މެޗު ސީދާ 3 ސެޓުން ކާމިޔާބުކުރީ ވިންޗެރީމޯއެވެ.