ވެލިދޫ ވޮލީބޯޅަ ލީގުގެ އަންހެން ޑިވިޝަނުގެ ދެވަނަ މެޗުގައި ހޮނިހިރު ދުވަހުގެރޭ ސެފަޔާ އަދި ފްލޭމްސް ބައްދަލުކުރި މެޗު ސީދާ 3 ސެޓުން ސެފަޔާ ކާމިޔާބުކޮށް، މުބާރާތުގެ ފައިނަލަށް އެ ޓީމުން ކުރާ އުއްމީދު އާކޮށްފިއެވެ.

ފުރަތަމަ މެޗުން ވިކްޓޯރިއަސްއާ ދެކޮޅަށް ކުޅެ ސެފަޔާއަށް ކުރިމަތިލާންޖެހުނު ނާކާމިޔާބީއަށްފަހު، ކޮންމެވެސްވަރެއްގެ ވަރުބަލިކަމަކާއެކު އެ ޓީމުގެ ދެވަނަ މެޗަށް ނިކުމެފައި މިވަނީ އޭގެ 24 ގަޑިއިރުފަހުންނެވެ. ނަމަވެސް ސެފަޔާއިން މިވަނީ މުބާރާތުގައި ފްލޭމްސް ކުޅުނު ފުރަތަމަ މެޗުން އެ ޓީމު ބަލިކޮށްފައެވެ.

ފުރަތަމަ ސެޓު 25 ޕޮއިންޓު 10 ޕޮއިންޓުން ސެފަޔާ ފަސޭހަކަމާއެކު ގެންދިޔަ ނަމަވެސް، ފަހު ދެ ސެޓު ދިޔައީ ވަރަށް ވާދަވެރިކޮށެވެ. ދެވަނަ ސެޓު 25 ޕޮއިންޓު 24 ޕޮއިންޓުން ހޯދިއިރު، ފަހު ސެޓު ކާމިޔާބުކުރީ 25 ޕޮއިންޓު 22 ޕޮއިންޓުންނެވެ.

މި މެޗުގެ މޮޅު ކުޅުންތެރިޔާގެ މަގާމު ހޯދާފައިވަނީ ސެފަޔާގެ ޖާޒީ ނަންބަރު 14، ފާތުމަތު ރިޒްވީނެވެ.

ސެފަޔާގެ ޖާޒީ ނަންބަރު 14، ފާތުމަތު ރިޒްވީން ކުއީން އޮފް ދަ މެޗު ޓްރޮފީއާ ހަވާލުވަނީ، ފޮޓޯ: ނޫނު ފޮޓޯ

މި ނަތީޖާއާއެކު ސެފަޔާއިން ދެން ތިބެން ޖެހޭނީ އާދީއްތަ ދުވަހު ވިކްޓޯރިއަސް އާއި ފްލޭމްސް ކުޅޭ މެޗުގެ ނަތީޖާގެ އިންތިޒާރުގައެވެ. އެ މެޗުގެ ނަތީޖާ ނިކުންނަ ގޮތަކުން ސެފަޔާ ސީދާ ފައިނަލަށް ދަތުރު ކުރުމުގެ ފުރުސަތު ވެސް އޮންނާނެއެވެ.

ވިކްޓޯރިއަސް އާއި ފްލޭމްސް ބައްދަލުކުރާ މެޗު އޮންނާނީ އާދިއްތަ ދުވަހުގެރޭ 20:30 ގައެވެ.