ވެލިދޫ ރަމަޟާން ވޮލީބޯޅަ ލީގުގެ ފިރިހެން ޑިވިޝަނުގެ ފުރަތަމަ މެޗުގައި ނެކޯމާގެ މައްޗަށް ވިންޗަރީމޯއިން ސީދާ 3 ސެޓުން ކާމިޔާބު ހޯދައިފިއެވެ.

ވިންޗަރީމޯއިން ލީޑު ކުރަމުން ދިޔަ މެޗުގެ ފުރަތަމަ ސެޓުގައި، އެ ޓީމަށް ލީޑު ގެއްލުނީ ސެޓުގެ މެދުތެރެއިން އެކަންޏެވެ. ނަމަވެސް، ނެކޯމާއަށް އެ ފަރަގު ދެ ޕޮއިންޓަށް ވުރެން ބޮޑު ކުރެވިފައެއް ނުވެއެވެ. މި ސެޓު ވިންޗަރީމޯ ކާމިޔާބުކުރީ 25-20 ޕޮއިންޓުންނެވެ.

ފުރަތަމަ ސެޓަށް ވުރެން ދެވަނަ ސެޓުގެ ވާދަވެރިކަން ބޮޑުކަން ފާހަގަ ކުރެވުނެވެ. އެގޮތުން ނެކޯމާއިން ދެވަނަ ސެޓު ނެގުމާ ކައިރިވެފައި ވަނިކޮށް، ވިންޗަރީމޯއިން ފަހަތުން އަރާ 2 ޕޮއިންޓުގެ ފަރަގަކާއެކު، 25-23 ޕޮއިންޓުން ދެވަނަ ސެޓުވެސް ގެންދިޔައެވެ.

ނެކޯމާގެ ކުޅުންތެރިއަކު ފޮނުވާލި ޝޮޓެއް ބްލޮކް ކުރުމަށް ވިންޗަރީމޯގެ 3 ކުޅުންތެރިން މަސައްކަތް ކުރަނީ--- ފޮޓޯ: ނޫން ފޮޓޯ

ފުރަތަމަ ދެ ސެޓު ވެސް ގެއްލުމާއެކީ، ނެކޯމާއިން ތިންވަނަ ސެޓު ނެގުމަށް ގިނަ މަސައްކަތްތަކެއް ކުރިތަން ފެނުނެވެ. އެ ގޮތުން އެ ޓީމުގެ ސޮއްފަތު މުޙައްމަދު (ސޮއްޕެ)ގެ ބާރު ހަމަލާތަކާ ވިންޗަރީމޯއިން ކުރިމަތިލާންޖެހުނެވެ. ޖަވާބުގައި ވިންޗަރީމޯގެ އަބްދުﷲ ޝިހާމް (ސެންޗޯ) ދިޔައީ ނެކޯމާ ޓީމަށް ހޫނު ހަމަލާތަކެއް ދެމުންނެވެ. ނަތީޖާއަކަށްވީ، ނެކޯމާއަށް ހިންދެމިލާނެ ފުރުސަތެއް ނުދީ ވިންޗަރީމޯއިން ތިން ވަނަ ސެޓު 25-20 ޕޮއިންޓުން ގެންގޮސް، ސީދާ 3 ސެޓުން މެޗު ކާމިޔާބުކުރުމެވެ.

މި މެޗުގެ މޮޅު ކުޅުންތެރިއަކަށް ހޮވިފައިވަނީ ވިންޗަރީމޯގެ ޖާޒީ ނަންބަރު 13، އަބްދުﷲ ޝިހާމް (ސެންޗޯ)އެވެ.

މެޗުގެ މޮޅު ކުޅުންތެރިޔާއަށް ހޮވުނު އަބްދުﷲ ޝިހާމްއާ ޓްރޮފީ ހަވާލުކުރަނީ--- ފޮޓޯ: ނޫން ފޮޓޯ

މުބާރާތުގައި މިރޭ ކުޅޭނީ ގްރޫޕް-ބީގެ މެޗެކެވެ. މި މެޗުގައި ބައްދަލުކުރާނީ ޓީމް ވިއަޒޯރާއި ދަ ލަޔަންސްއެވެ. މި މެޗު ފަށާނީ 21:30 ގައެވެ.