ވެލިދޫ ރަމަޟާން ވޮލީބޯޅަ ލީގުގެ ފިރިހެން ޑިވިޝަނުގެ ފައިނަލު މެޗުގެ ފަހު ޖާގަ ޓީމް ވިންޗެރީމޯއިން ހޯދައިފިއެވެ. ފައިނަލުގެ ފުރަތަމަ ޖާގަ ހޯދުމަށް އެ ޓީމަށް ލިބުނު ފުރަތަމަ ފުރުސަތުގެ ބޭނުން ވަނީ ހިފޭގޮތް ނުވެފައެވެ. ނަމަވެސް ދެވަނަ ފުރުސަތުގެ ބޭނުން އެ ޓީމުން މި ވަނީ ފިސާރި ރަނގަޅަށް ހިފާފައެވެ.

މިރޭ ކުޅުނު މުބާރާތުގެ ތިން ވަނަ ސެމީ ފައިނަލުގައި ބައްދަލުކުރީ ފުރަތަމަ ސެމީއިން ބަލިވި ވިންޗެރީމޯ އާއި ދެވަނަ ސެމީއިން މޮޅުވި ނެކޯމާއެވެ. މި މެޗު ނިމުނީ، މި ދެ ޓީމުން ގްރޫޕް ސްޓޭޖުގައި ކުޅުނު މެޗުގެ ސްކޯރ އަނެއްކާވެސް ތަކުރާރު ވެގެނެވެ. ވިންޗެރީމޯ އިން މި މެޗު ވެސް ކާމިޔާބުކުރީ ސީދާ 3 ސެޓުންނެވެ.

މެޗުގެ ފުރަތަމަ ސެޓާއި ދެވަނަ ސެޓު ވިންޗެރީމޯ އިން ކާމިޔާބުކުރީ 25-20 ޕޮއިންޓުންނެވެ. އަދި ފަހު ސެޓު އެ ޓީމުން ކާމިޔާބުކުރީ 25-14 ޕޮއިންޓުންނެވެ. މެޗުގެ މޮޅު ކުޅުންތެރިއަކަށް ހޮވިފައިވަނީ ވިންޗެރީމޯގެ ޖާޒީ ނަންބަރު 7، އަޙުމަދު އާސިމްއެވެ.

Advertisement

މުބާރާތުގެ ފައިނަލު މެޗު ކުޅުމަށް ހަމަޖެހިފައިވަނީ މާދަމާ (ހުކުރު ދުވަހުގެ) ރެއެވެ. މި މެޗުގައި ބައްދަލުކުރާނީ ވިޔަޒޯރާއި ވިންޗެރީމޯއެވެ. ސެމީ ފައިނަލް ފުރަތަމަ މެޗުގައި މި ދެ ޓީމުން ބައްދަލުކޮށްފައިވާއިރު، އެ މެޗު 3-1 ސެޓުން ކާމިޔާބުކުރީ ވިޔަޒޯރެވެ.