ވެލިދޫ ރަމަޟާން ވޮލީބޯޅަ ލީގުގައި އަންގާރަ ދުވަހުގެރޭ ކުޅުނު ސެމީ ފައިނަލް މެޗު 3-2 ސެޓުން ކާމިޔާބުކޮށް، ފައިނަލުގެ ފަހު ޖާގަ ސެފަޔާއިން ހޯދައިފިއެވެ.

ފައިނަލުގެ ޖާގަ ކަށަވަރު ކުރުމަށް ދެ ޓީމުންވެސް ބުރަ މަސައްކަތްތަކެއް ކުރިތަން ފެނުނު މި މެޗުގެ ކުޅުން ކުރިޔަށް ދިޔައީ ވަރަށް ވާދަވެރިކޮށެވެ. 

މެޗުގެ ފުރަތަމަ ސެޓު ތަފާތު ބޮޑުކޮށް ގެންދިޔައީ ފްލޭމްސްއެވެ. ފްލޭމްސް އިން މި ސެޓު ގެންދިޔައީ 12 ޕޮއިންޓުގެ ފަރަގަކާއެކު، 25-13 ޕޮއިންޓުންނެވެ. ނަމަވެސް ސެފަޔާއިން ކުޅުން ރަގަޅުކޮށް، ދެވަނަ ސެޓާއި ތިން ވަނަ ސެޓު ކާމިޔާބު ކުރިއެވެ. އެގޮތުން ސެފަޔާއިން އެ ސެޓުތައް ކާމިޔާބުކޮށްފައިވަނީ 25-22 ޕޮއިންޓުންނާއި 25-23 ޕޮއިންޓުންނެވެ. 

ހަތަރު ވަނަ ސެޓުން މެޗު ނިމުނަ ނުދިނުމަށް ފްލޭމްސް އިން ހިތްވަރުކޮށް، 25-22 ޕޮއިންޓުން އެ ސެޓު ގެންދިޔައެވެ. އެއަށްފަހު މެޗުން މޮޅުވާ ޓީމެއް ކަނޑައެޅުމަށް ކުޅުނު، ފަސްވަނަ ސެޓު ވެސް ކުރިޔަށް ދިޔައީ ވަރަށް ވާދަވެރިކޮށެވެ. ފްލޭމްސްއަށް ހެދެމުން ދިޔަ ގޯސްތަކުގެ ފައިދާ ނަގައި، ސެފަޔާއިން ގިނަ ޕޮއިންޓުތަކެއް ހޯދަމުން ދިޔައެވެ. ބަދަލުގައި ފްލޭމްސްއިން ޕޮއިންޓު ހޯދި ނަމަވެސް، މި ސެޓު ސެފަޔާއިން 13-15 ޕޮއިންޓުން ކާމިޔާބުކޮށް، ފައިނަލުގެ ފަހު ޖާހަ ކަށަވަރުކުރިއެވެ.

މި މެޗުގެ އެންމެ މޮޅު ކުޅުންތެރިޔާގެ މަގާމު ހޯދާފައިބަނީ ސެފަޔާގެ ޖާޒީ ނަންބަރި 14، ފާތިމަތު ރިޒްވީންއެވެ. ރިޒްވީން ވަނީ މި ދެ ޓީމު ގްރޫޕް ސްޓޭޖުގައި ބައްދަލުކުރި މެޗުގައި ވެސް މޮޅު ކުޅުންތެރިޔާގެ މަގާމު ހޯދާފައެވެ.

މެޗުގެ މޮޅު ކުޅުންތެރިޔާގެ މަގާމު ހޯދި ރިޒްވީންއާ ޓްރޮފީ ހަވާލުކުރަނީ، ފޮޓޯ: ނޫނު ފޮޓޯ

މުބާރާތުގެ ފައިނަލް މެޗު ކުޅުމަށް ހަމަޖެހިފައިވާ ދުވަހެއް އަދި އިއުލާނެއް ނުކުރެއެވެ. 

ފައިނަލް މެޗުގައި ބައްދަލު ކުރާނީ ސެފަޔާ އާއި ވިކްޓޯރިއަސްއެވެ. މުބާރާތް ހުޅުވި މެޗުގައި މި ދެ ޓީމު ބައްދަލުކޮށްފައިވާއިރު އެ މެޗު ސީދާ 3 ސެޓުން ކާމިޔާބުކުރީ ވިކްޓޯރިއަސްއެވެ.