ވެލިދޫ ވޮލީބޯޅަ ލީގުގެ އަންހެން ޑިވިޝަނުގައި މިރޭ ކުޅުނު ފުރަތަމަ މެޗު ސީދާ 3 ސެޓުން ވިކްޓޯރިއަސް ކާމިޔާބުކޮށްފިއެވެ. ވިކްޓޯރިއަސް 3 ސެޓުން މެޗު ކާމިޔާބު ކުރިނަމަވެސް، ދެ ޓީމުގެ ފަރާތުން ވެސް މި މެޗުގައި ބަލާހިތްވާކަހަލަ ކުޅުމެއް ފެނިގެން ދިޔައެވެ. 

ވެލިދޫ ނިކަގަސްދޮށުގައި އޮންނަ ވޮލީ ކޯޓުގައި ކުރިޔަށްދިޔަ މި މެޗުގެ ފުރަތަމަ ސެޓުގައި ގިނަ ވަގުތު ލީޑުގައި އޮތީ ސެފަޔާއެވެ. އެ ޓީމަށް މި ސެޓުގައި ލީޑު ފުރަތަމަ ގެއްލުނީ ސެޓުގެ މެދުތެރެއިންނެވެ. ނަމަވެސް ހެދެމުން ދިޔަ ގޯސްތައް މަދުކޮށް، އެ ޓީމުން ލީޑު އަނބުރާ ހޯދިއެވެ. ވިކްޓޯރިއަސްއިން އެ ސެޓުގެ އޮއިވަރު ބަދަލުކުރީ، ސެޓުގެ ފަހުކޮޅުއެވެ. އެގޮތުން 22 ޕޮއިންޓު 18 ޕޮއިންޓުގެ ލީޑަކާއެކު ސެފަޔާއިން ސެޓު ގެންދިއުމަށް ކައިރިވެފައިވަނިކޮށް، ވިކްޓޯރިއަސް ފަހަތުން އަރާ 22 ޕޮއިންޓު 25 ޕޮއިންޓުން ފުރަތަމަ ސެޓު ގެންދިޔައެވެ. 

ދެވަނަ ސެޓުގެ ކުރީކޮޅު ހަމަހަމަ ކުޅުމެއް ފެނިގެން ދިޔަ ނަމަވެސް، މި ސެޓު ލީޑުކޮށްފައިވަނީ ވިކްޓޯރިއަސްއެވެ. އަދި ސެޓުގެ ފަހުކޮޅަށް ދިޔައިރު ލީޑު ފުޅާކޮށް، ވިކްޓޯރިއަސްއިން 25 ޕޮއިންޓު 19 ޕޮއިންޓުން ދެވަނަ ސެޓު ވެސް ގެންދިޔައެވެ. 

ތިންވަނަ ސެޓުގެ ކުރީކޮޅު އާ ހިތްވަރަކާއެކު ސެފަޔާއިން މަސައްކަތް ކުރިތަން ފެނުނެވެ. އަދި ވިކްޓޯރިއަސް އިން ސެޓުގެ ކުރީކޮޅު ހޯދި ލީޑު ގެއްލުވާލާ، ފަހަތުން އަރާ ލީޑު ވެސް ނަގާފައިވެއެވެ. މި ސެޓުގެ ފަހުކޮޅު ދިޔައީ އަނެއްކާ ވެސް ވަރަށް ވާދަވެރިކޮށެވެ. ނަމަވެސް ވަރުބަލިވެފައި އޮތް ސެފަޔާގެ މައްޗަށް 26 ޕޮއިންޓު 24 ޕޮއިންޓުން ވިކްޓޯރިއަސް ކުރި ހޯދައި، ސީދާ 3 ސެޓުން މެޗު ކާމިޔާބުކުރިއެވެ.

ވިކްޓޯރިއަސްގެ ލިއުޝާ ބޯޅަ ފޮނުވާލަނީ --- ފޮޓޯ: ނޫނު ފޮޓޯ

މެޗުގެ މޮޅު ކުޅުންތެރިޔާގެ މަގާމު ހޯދާފައިވަނީ ވިކްޓޯރިއަސްގެ ޖާޒީ ނަންބަރު 11، ލިއުޝާ އީސާއެވެ. 

މި މުބާރާތުގައި މާދަމާ ރޭ ކުޅޭނީ ސެފަޔާއާއި ފްލޭމްސްއެވެ. މި މެޗު ފަށާނީ 20:30 ގައެވެ.