ޕޯޗުގީޒުންނަށް ވަފާތެރި ހިކުމަތްތެރިޔާގެ ގޮތުން ދިވެހި ތާރީހު ދަންނަ ވިޔަޒޯރުގެ ހިކުމަތްތެރިކަން ބޮޑުތަކުރުފާނުގެ ކުރިމަތީގައި "ސުމަކަށް" ވިޔަސް، ޓީމް ވިޔަޒޯރުގެ ހިކުމަތްތެރިކަން ދަ ލަޔަންސްގެ ކުރިމަތީގައި މިރޭ ފެނިގެން ދިޔައެވެ.

ވެލިދޫ ރަމަޟާން ވޮލީބޯޅަ ލީގުގެ ގްރޫޕް-ބީގެ ފުރަތަމަ މެޗުގައި، ދަ ލަޔަންސް އާއި ޓީމު ވިޔަޒޯރު ބައްދަލުކުރި މެޗު ސީދާ 3 ސެޓުން ކާމިޔާބުކުރީ ޓީމް ވިޔަޒޯރެވެ.

މެޗުގެ ފުރަތަމަ ސެޓުގައި ދެ ޓީމުންވެސް ކުދިކުދި ގޯސްތައް ހެދެމުން ދިއުމުގެ ނަތީޖާއަކަށްވީ، ފަސޭހަކޮށް، މާ ބުރަ މަސައްކަތްތަކެއް ނުކޮށް ދެ ޓީމަށް ވެސް ގިނަ ޕޮއިންޓުތަކެއް ލިބުމެވެ. ނަމަވެސް، ޓީމް ވިއަޒޯރުން އެ ޓީމުގެ ތަޖުރިބާކާރު ކުޅުންތެރިޔާ، އިބްރާޙިމް އަޝްރަފް (ޑީރޯ) ބޭނުންކޮށް، ރޭވުންތެރި ޕޮއިންޓުތަކެއް ހޯދިއެވެ. މި ސެޓު 25-23 ޕޮއިންޓުން ކާމިޔާބުކުރީ ވިޔަޒޯރެވެ.

ދެވަނަ ސެޓަށް ވިޔަޒޯރުން ނިކުތީ ކުރިޔަށް ވުރެން ވަރުގަދަ ކޮށެވެ. ދެވަނަ ސެޓުގައި އަސަރޭ އެ ޓީމާ ގުޅުން ވެގެން ދިޔައީ އެ ޓީމަށް ލިބުނު އިތުރު ހިތްވަރަކަށެވެ. އަދި ޓީމަށް މި އައި ބަދަލާއެކު، ވިޔަޒޯރުން ވަރަށް ބޮޑަށް މެޗުގެ ކޮންޓްރޯލް ނެގިއެވެ. މި ސެޓު ތަފާތު ބޮޑުކޮށް 25-16 ޕޮއިންޓުން ވިޔަޒޯރުން ގެންދިޔައެވެ.

ލަޔަންސް އިން ތިންވަނަ ސެޓު ފެށީ ވަރުގަދަކޮށެވެ. އެ ޓީމުން ސެޓުގެ ކުރީކޮޅު 6 ޕޮއިންޓުގެ ލީޑެއް ވެސް ނެގިއެވެ. ނަމަވެސް ވިޔަޒޯރުން ފުލުފުލުން 8 ޕޮއިންޓު ހޯދާ، ސެޓުގެ ކޮންޓްރޯލް ނެގިތަން ފެނުނެވެ. އޭގެ ފަހުން އަނެއްކާވެސް ލަޔަންސް އިން ލީޑު ނެގިއެވެ. ލަޔަންސްއަށް މި ލީޑުގައި މާ ގިނައިރު ހިފަހައްޓާނުލެވުނަސް، އެ ޓީމުން ހިތްވަރުކޮށް، ވިޔަޒޯރަށް ދުލެއްދޭން ބޭނުންނުވިތަން ފެނިގެން ދިޔައެވެ. ސެޓުގެ ފަހުކޮޅު ފަހަރަކު ޓީމަކަށް ޕޮއިންޓު ލިބެމުން ދިޔުމުން، މެޗުގެ ޓެމްޕޯ އުފުލިގެން ދިޔައެވެ. ނަމަވެސް 22 ޕޮއިންޓާ ހިސާބުން ލަޔަންސްއަށް ސެޓުގެ ކޮންޓްރޯލް ގެއްލި، 25-22 ޕޮއިންޓުން ވިޔަޒޯރު މި ސެޓު ކާމިޔާބު ކުރިއެވެ. އެއާއެކު ސީދާ 3-0 ސެޓުން މެޗު ލިބުނީ ވިޔަޒޯރަށެވެ.

މެޗުގެ މޮޅު ކުޅުންތެރިއަކަށް ހޮވުނީ ޓީމް ވިޔަޒޯރުގެ ޖާޒީ ނަންބަރު 10، އިބްރާޙިމް އަޝްރަފްއެވެ.

މެޗުގެ މޮޅު ކުޅުންތެރިޔާގެ މަގާމު ހޯދި އިބްރާޙިމް އަޝްރަފް (ޑީރޯ)އާ ޓްރޮފީ ހަވާލުކުރަނީ--- ފޮޓޯ: ނޫނު ފޮޓޯ

މި މުބާރާތުގައި ފިރިހެން ޑިވިޝަންގެ މެޗެއް ދެން އޮންނާނީ އާދީއްތަ ދުވަހުއެވެ. ހޮނިހިރު ދުވަހުގެރޭ ކުޅޭނީ އަންހެން ޑިވިޝަނުގެ ފައިނަލް މެޗެވެ. މި މެޗުގައި ބައްދަލު ކުރާނީ ސެފަޔާ އަދި ވިކްޓޯރިއަސްއެވެ. މި މެޗު ފެށުމަށް ހަމަޖެހިފައިވަނީ 21:30 ގައެވެ.