މޫސުމާއި ބެހޭ ޤައުމީ އިދާރާގެ އެސިސްޓެންޓް ޑިރެކްޓަރ ޖެނެރަލް އަލީ ޝަރީފް ވިދާޅުވީ، އެންމެ ފަހުން ރެކޯޑް އަދަދަކަށް ހުޅުލެއަށް ވާރޭ ވެހުނު ކަމަށް ރެކޯޑް ކުރެވުނީ 1977 ވަނަ އަހަރުގެ ޑިސެމްބަރު މަހުގެ 23 ވަނަ ދުވަހުގައި ކަމަށެވެ. އެދުވަހު ހުޅުލެއަށް 175 މިލިލީޓަރުގެ ވާރޭ ވެހުނު ކަމަށާއި، އަދި އިއްޔެ ހުޅުލެއަށް 179.7 މިލިލީޓަރުގެ ވާރޭ ވެހުނު އިރު، މިއީ ހުޅުލޭގެ ތާރީޚުގައިވެސް އެއްދުވަހަކަށް އެންމެ ގިނައިން ވާރޭ ވެހުނުކަމަށް ރެކޯޑް ކުރެވުނު ދުވަސް ކަމުގައި އޭނާ ވިދާޅުވިއެވެ.

މަޝްހޫރު ހަމުގެ ޚާއްޞަ ޑޮކްޓަރަކުން ވިދާޅުވީ، މިފަހަކަށް އައިސް މާލޭގައި، ބުޅަލުގެ ނަޖިހުގެ ސަބަބުން ޖެހޭ ހަމުގެ ބަލިތަކާއި އިންފެކްޝަންތައް ވަރަށް ބޮޑަށް އިތުރުވަމުން އަންނަ ކަމަށެވެ. މިގޮތުން ބުޅަލުގެ ނަޖިސް ސީދާކޮށް ހަމުގައި ނުޖެހުނަސް ނަޖިސް އެކުލެވިފައިވާ ފެނާއި ބުޅަލުގެ ނަޖިސް ހޭކިފައި ހުރި ތަންތަނުގައި ޖެހުމުންވެސް ބަލި އަރާގޮތް މެދުވެރިވެއެވެ.

ނޭޝަނަލް ޑިޒާސްޓަރ މެނޭޖްމެންޓް ސެންޓަރުން ވިދާޅުވީ، މާލޭގެ އިތުރުން، ފ. ނިލަންދޫ، ކ. ގުރައިދޫ، ލ. ގަން އަދި ލ. ފޮނަދޫގެ އިތުރުން ސ. މަރަދޫގައި ފެންބޮޑުވެފައިވާ ކަމަށެވެ. މީގެ އިތރުން މިހާތަނަށް ލިބުނު ރިޕޯޓްތަކަށް ބަލާއިރު، ކ. ގުރައިދޫގެ 20 ގެއަކަށް ފެންވަދެ 3 ގެއަކުން މީހުން ބަދަލުކުރެވިފައިވާ ކަމުގައިވެސް އެންޑީއެމްއޭއިން ވަނީ ބުނެފައެވެ.

މޫސުމާއި ބެހޭ އިދާރާއި ބުނީ، ޔެލޯ އެލާޓްނެރެފައިވާ، މިއަދު ހެނދުނު 9:00 އިން ފެށިގެން މެންދުރުފަހު 1:00އަށް ކަމަށެވެ. އަދި ބޯކޮށްވެހޮ ގުގުރާނެ ކަމަށާއި ވިލާގަނޑުގައި ގަޑިއަކު 45 މޭލަށް ވައިގަދަވާނެ ކަމުގައިވެސް މޫސުމާއި ބެހޭ ޤައުމީ އިދާރާއިން ބުނެފައެވެ.

ސްކޫލް ބަންދާ ދިމާކޮށް ކަނޑުއުޅަނދު ބަލައި ފާސްކުރުމުގެ ޕްރޮގްރާމެއް މެރިން ޕޮލިހުން ފަށައިފިއެވެ. މިއީ ސްކޫލު ބަންދާއި އައު އަހަރާ ދިމާކޮށް މާލެއިން ގިނަބަޔަކު އެކި ރަށްރަށަށް ދަތުރުކުރާނެތީ އާއި ބަނދަރުތަކުން މުދާ ބަރުކޮށްގެން އަތޮޅުތަކަށް ދަތުރުކުރާ އޮޑިދޯނިފަހަރުގެ ސަލާމަތާއި ރައްކާތެރިކަން ކަށަވަރުކުރުމުގެ ގޮތުން ފެށި ޕްރޮގްރާމެއް ކަމަށް ދިވެހި ފުލުހުންގެ ޚިދުމަތުން ވިދާޅުވިއެވެ.

ކުރިއަށް އޮތް 4 ދުވަހުވެސް ރާއްޖޭގެ ބޮޑު ބަޔަކަށް މޫސުން ގޯސްވާނެކަމަށް މޫސުމާ ބެހޭ ޤައުމީ އިދާރާއިން ވިދާޅުވެއްޖެއެވެ. މޫސުން ގޯސްވުމާއިއެކު ދަތުރުކުރާ ފަރާތްތަކުން މޫސުމަށް ސަމާލުވުމަށް މެޓް އޮފީހުން ވަނީ އިލްތިމާސްކޮށްފައެވެ.

އައްޑޫއާ ފުވައްމުލަކަށް، އޮރެންޖް އެލާޓް ނެރުނު އިރު މިއަދުގެ، މެންދުރުފަހު 1:00 އިން ފެށިގެން، ހަވީރު 17:00އާ ހަމައަށް ނ އަތޮޅުންފެށިގެން ދ. އަތޮޅާއި ހަމައަށް ވަނީ ޔެލޯ އެލާޓް ނެރެފައެވެ. މޫސުމާއި ބެހޭ ޤައުމީ އިދާރާއިން ބުނީ، އެވަގުތުތަކުގައި، ގަޑިއަކުން 25 މޭލާއި 30 މޭލާއި ދެމެދުގެ ބާރުމިނުގައި ވައިޖެހޭނެ ކަމަށާއި، ކަނޑުތައް ވަރަށް ބޮޑަށް ގަދަވާނެ ކަމަށެވެ. އެހެންކަމުން ކަނޑު ދަތުރުފަތުރު ކުރައްވާ ފަރާތްތަކުން މޫސުމަށް ބަލައިގެން ދަތުރު ކުރެއްވުމަށް މޫސަުމާއި ބެހޭ ޤައުމީ އިދާރާއިން ވަނީ އިލްތިމާސްކޮށްފައެވެ.