އިއްޔެ މާލެއަށް ކުރި ވިއްސާރައިގައި 164 ގެއަށް ގެއްލުތައް ލިބިފައިވާ ކަމަށާއި، ލިބުނު ގެއްލުންތައް ވަޒަންކުރުމަށް ސާރވޭކުރުމުގައި ޓީމުތަކުން ހަރަކާތްތެރިވަމުންދާ ކަމުގައި ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީން ވިދާޅުވެއްޖެއެވެ. އެ އޮތޯރިޓީން ވިދާޅުވީ، ގެއްލުންތައް ބަަލައި ސަރވޭ ކުރުމުގެ މަސައްކަތުގައި އެމްއެންޑީއެފާއި، ފުލުހުން އަދި ވެމްކޯ އާއި މޯލްޑިވިއަން ރެޑްކްރެސެންޓުންވެސް އެންޑީއެމްއޭއާއެކު ބައިވެރިވަމުންދާ ކަމަށެވެ.

އިއްޔެ މާލެއަށް ބޯކޮށްވާރޭ ވެހުމުގެ ސަބަބުން ހިނގި ފެންބޮޑުވުމުގެ ހާދިސާގައި، 164 ގެއަކަށް ފެންވަދެ ގެއްލުންތައް ލިބުނު އިރު، މާލޭގެ 11 ގެއަކުން، 54 މީހަކު ވަގުތީ ބޯހިޔާވަހިކަމަށް ބަދަލުކުރަން ޖެހުނު ކަމުގައިވެސް އެންޑީއެމްއޭއިން ވަނީ ބުނެފައެވެ.

ފެންބޮޑުވުމުގެ ސަބަބުން ހާލުގައި ޖެހުނު މީހުންނަށް ބޯހިޔާވަހިކަމާއި ކާބޯތަކެތީގެ އެހީ ސަރުކާރުން ފޯރުކޮށްދީފައިވާއިރު، ވިއްސާރައިގައި ލިބުނު ގެއްލުންތަކުން އަރައިގަތުމަށް ސަރުކާރުން އެހީވެދެއްވާނެ ކަމުގެ ޔަޤީންކަން ރައީސުލްޖުމްހޫރިއްޔާ ވަނީ ދެއްވާފައެވެ. މީގެ އިތުރުން އެމަނިކުފާނު ވަނީ ވިއްސާރައިގެ ސަބަބުން ފެންބޮޑުވެ ގެއްލުންތައް ލިބުނު ގޭގެއަށް ޒިޔާރަތްކުރައްވައި އެގޭގޭގައި ދިރިއުޅޭ މީހުން ހާލަތުވެސް ބައްލަވާލައްވާފައެވެ.