މިހާރު ރާއްޖެއަށް ކުރަމުންދާ ވިއްސާރައިގައި ކުރިއަށް އޮތް 12 ގަޑިއިރުވެސް ރާއްޖޭގެ ބޮޑު ވަޔަކަށް ވައިގަދަވެ ކަނޑުތައް ގަދަވާނެކަމަށް މޫސުމާއި ބެހޭ ޤައުމީ އިދާރާއިން ވިދާޅުވެއްޖެއެވެ. އެހެންކަމުން ކޮންމެހެން ކުރަންޖެހޭ ދަތުރުތައް ނޫނީ ނުކުރުމަށް އެ އިދާރާއިން ވަނީ އިލްތިމާސްކޮށްފައެވެ.

މިވިއްސާރައިގައި ބައެއް ސަރަހައްދުތަކަށް ބައެއް ގަޑިތަކުގައި ބޯކޮށް ވާރޭވެހޭނެތީ ފެންބޮޑުވެގެން ހިނގާފާނެ ހާދިސާތަކަށް ދުރާލާ ތައްޔާރުވުމަށްވެސް މޫސުމާބެހޭ އިދާރާއިންވަނީ އިލްތިމާސްކޮށްފައެވެ. ރާއްޖެއަށް މިހާރު ކުރަމުންދާ ވިއްސާރައަކީ ރާއްޖޭގެ ކައިރީގައި އުފެދިފައިވާ ސަކިއުލޭޝަނަކާ ގުޅިގެން އުފެދިފައިވާ ޓްރަފެއްގެ ސަބަބުން ކުރަމުން އަންނަ ވިއްސާރައެއް ކަމަށް މެޓް އޮފީހުން ވަނީ ބުނެފައެވެ.

ވޭތުވެދިޔަ 2 ދުވަސްތެރޭގައި މިސަރކިއުލޭޝަން ރާއްޖޭގެ ދެކުނަށާއި ހުޅަނގަށްވާ ގޮތަށް ދެމިގެންގޮސްފައިވާ ކަމަށާއި، މިސަރކިއުލޭޝަންގެ ސަބަބުން އުފެދިފައިވާ ޓްރަފް ރާއްޖެ މަތީގައި ހުރުމުގެ ސަބަބުން މިސަރައްހައްދަށް ވިލާ އިތުރަށް ޖަމާވެފައިވާ ކަމަށް މެޓް އޮފީހުން ބުނެއެވެ. އެހެންކަމުން ކުރިއަށް އޮތް 24 ގަޑިއިރުވެސް ބައެއް ހިސާބުތަކަށް ގަދަވަޔާއެކު ބޯކޮށް ވާރޭވެހޭނެ ކަމަށް މެޓް އޮފީހުން ވަނީ ލަފާކޮށްފައެވެ. 

މިއަދު ކުރަމުންދާ ވިއްސާރައިގައި އެންމެ ބޯކޮށް ވާރޭވެހިފައިވަނީ މާލެއަށްކަމަށެވެ. އެއީ 89.5 މިލިމީޓަރުގެ ވާރެއެވެ. ދެން އެންމެ ބޯކޮށް ވާރޭވެހިފައިވާ ހުޅުމާލެއަށް 74.3 މިލިމީޓަރުގެ ވާރޭ، ހުޅުލެއަށް 76 މިލިމީޓަރުގެ ވާރޭ، އދ.މާމިގިއްޔަށް 62.5 މިލިމީޓަރުގެ ވާރޭ، އއ.ތޮއްޑުއަށް 64 މިލިމީޓަރުގެ ވާރޭ، މ.މުއްޔަށް 46 މިލިމީޓަރު، އަދި ކާށިދޫއަށް 32 މިލިމީޓަރުގެ ވާރޭ ވެހިފައިވާ ކަމަށް މެޓް އޮފީހުން ވިދާޅުވެއެވެ.