މާލެއަށް ވެހޭ ބޯވާރޭގެ ސަބަބުން ފެންބޮޑުވުން ހުއްޓުވުމަށް ސިފައިން ފެން ހިންދުމުގައި މެދު ނުކެނޑި މަސައްކަތް ކުރާތާ 12 ގަޑިއިރުވެއްޖެއެވެ.

ހެނދުނުން ސުރެ މާލެއަށް ބޯކޮށް ވާރޭ ވެހެމުން ދިޔުމުގެ ސަބަބުން މާލޭގައި އާއްމުކޮށް ފެންބޮޑުވާ ސަރަހައްދުތަކުގައިވެސް ވަނީ އާދަޔާ ޚިލާފަށް ފެންބޮޑުވެފައެވެ.

ހެނދުނުން ފެށިގެން ޕަންޕުތައް ޖައްސައިގެން ފެން ހިއްކުމުގެ މަސައްކަތް ސިފައިން ކުރަމުން ދާއިރު، ވާރޭ ވެހޭލެއް ބޯކަމުން ބައެއް ސަރަހައްދުތަކުން ފެންގަނޑުތައް އަޑިކޮށްލޭ އިރަށް އަނެއްކާ ފެންބޮޑުވެއެވެ. މިގޮތުން ހާލަތު އެންމެ ބޮޑަށް ގޯސްވެފައި ވަނީ މާފަންނުގެ ސަރަހައްދުތަކުގައެވެ.

އެމްއެންޑީއެފުން ބުނީ، މިރޭ 9:30 އާ ހަމައަށްވެސް ސިފައިން، މާލޭގެ 8 ސަރަހައްދެއްގައި 17 ޕަންޕު ބަހައްޓައިގެން ފެން ހިންދުމަށް މަސައްކަތްކުރަމުންދާ ކަމަށެވެ. އަދި މިރޭގެ 9 ޖެހުމާއި ހަމައަށް،  13875 ޓަނުގެ ފެން ބޭރު ކުރެވުނު ކަމުގައިވެސް އެމްއެންޑީއެފުން ބުނެއެވެ.

މީގެ އިތުރުން، މާލެއަށް ބޯކޮށް ވާރޭވެހި، ފެންބޮޑުވުމާ ގުޅިގެން ބައެއް ގެތަކަށް ފެން ވަންނަމުންދާތީ، އެމްއެންޑީއެފް މާލެ އޭރިއާ ކޮމާންޑުގެ ސިފައިން ނުކުމެ 20 ވުރެ ގިނަ ގޭގޭގައި ވެލިބަސްތާ ޖަހައިދީފައިވާ ކަމުގައިވެސް އެމްއެންޑީއެފުން ވަނީ ބުނެފައެވެ.

މާލޭގައި އެންމެ ބޮޑަށް ކުރިން ފެންބޮޑުވަމުން އައީ، އަމީނީ މަގުގައި ކަމަށް ވާއިރު، އެމަގު ޒަމާނީ ފެންވަރަށް ތަރައްޤީކުރުމުގެ މަސައްކަތް ނިމުނީ ބުދަ ދުވަހުއެވެ. ތާރު އަޅައިގެން އެމަގު ޒަމާނީ ފެންވަރަށް ހެދި ނަމަވެސް ފެންބޮޑުވުމުގެ މައްސަލައަށް ހައްލެއް ނުލިބުނެވެ.