އިއްޔެއަކީ، 46 އަހަރުގެ ތެރޭގައި ހުޅުލެއަށް އެންމެ ގިނައިން ވާރޭ ވެހުނު ކަމަށް ރެކޯޑް ކުރެވުނު ދުވަސްކަމުގައި މޫސުމާއި ބެހޭ ޤައުމީ އިދާރާއިން ވިދާޅުވެއްޖެއެވެ.

މޫސުމާއި ބެހޭ ޤައުމީ އިދާރާގެ އެސިސްޓެންޓް ޑިރެކްޓަރ ޖެނެރަލް އަލީ ޝަރީފް ވިދާޅުވީ، އެންމެ ފަހުން ރެކޯޑް އަދަދަކަށް ހުޅުލެއަށް ވާރޭ ވެހުނު ކަމަށް ރެކޯޑް ކުރެވުނީ 1977 ވަނަ އަހަރުގެ ޑިސެމްބަރު މަހުގެ 23 ވަނަ ދުވަހުގައި ކަމަށެވެ. އެދުވަހު ހުޅުލެއަށް 175 މިލިލީޓަރުގެ ވާރޭ ވެހުނު ކަމަށާއި، އަދި އިއްޔެ ހުޅުލެއަށް 179.7 މިލިލީޓަރުގެ ވާރޭ ވެހުނު އިރު، މިއީ ހުޅުލޭގެ ތާރީޚުގައިވެސް އެއްދުވަހަކަށް އެންމެ ގިނައިން ވާރޭ ވެހުނުކަމަށް ރެކޯޑް ކުރެވުނު ދުވަސް ކަމުގައި އޭނާ ވިދާޅުވިއެވެ.

މާލެއަށް އިއްޔެ 118.2 މިލިލީޓަރުގެ ވާރޭ ވެހުނު އިރު، މިހާތަނަށް މާލެއަށް އެންމެ ބޯކޮށް ވާރޭ ވެހުނު ކަމަށް ރެކޯޑްކުރެވިފައި ވަނީ 2018 ވަނަ އަހަރުގެ ޑިސެމްބަރުމަހުގައެވެ. އެފަހަރު މާލެއަށް 223 މިލިލީޓަރުގެ ވާރޭ ވަނީ ވެހިފައެވެ. 

އިއްޔެ ހުޅުލެއަށް ވާރޭ ވެހުނުލެއް ބޯކަމުން ބައެއް ފްލައިޓްތައް ޑިލޭވެ އަދި އަނެއްބައި ފްލައިޓްތައް ޑައިވާޓްވެސް ކުރަން ޖެހުނުކަމުގައި އެމްއޭސީއެލްއިން ހާމަކޮށްފައިވެއެވެ.