މާލެއަށް މިއަދު ހެނދުނުންފެށިގެން ބޯކޮށް ވާރޭވެހި ފެންބޮޑުވަމުންދާތީ، ސިފައިން ނުކުމެ ފެން ހިއްކަން ފަށައިފިއެވެ.

އެމްއެންޑީއެފުން ވިދާޅުވީ، މާލެއަށް ބޯކޮށް ވާރޭވެހި ފެންބޮޑުވަމުންދާތީ، ފެން ހިންދުމަށްޓަކައި މާލޭގެ އެކި ސަރަހައްދުތަކުގައި ޕަމްޕްތައް ބަހައްޓައިގެން ސިފައިން މިހާރު ފެން ހިންދުމުގެ މަސައްކަތް ކުރަމުންދާކަމަށެވެ.

މިއަދު ހެނދުނުން ފެށިގެން މާލެ ސަރަހައްދަށް ބޯކޮށްދަނީ ވާރޭވެހެމުންނެވެ.

މޫސުމާއި ބެހޭ ޤައުމީ އިދާރާއިން ލަފާކޮށްފައިވާ ގޮތުގައި މި ވިއްސާރަ މާދަމާއަށް ދެމިގެންދާނެއެވެ. އަދި މޫސުމާއި ބެހޭ ޤައުމީ އިދާރާއިން ވަނީ މިއަދުގެ 14:30 އާއި ހަމައަށް، ކ އަތޮޅާއި މ އަތޮޅާއި ދެމެދުގެ އަތޮޅުތަކާއި ރަށްތަކަށް ޔެލޯ އެލާޓު ނެރެފައެވެ. އަދި ކޮޅިގަނޑުގައި ގަޑިއަކު 45 މޭލަށް ވައިގަދަވާނެ ކަމަށާއި، ކަނޑުތައްވެސް ގަދަވާނެ ކަމުގައި މޫސުމާއި ބެހޭ ޤައުމީ އިދާރާއިން ވަނީ ބުނެފައެވެ.

ނޭޝަނަލް ޑިޒާސްޓަރ މެނޭޖްމެންޓް އޮތޯރިޓީން ވަނީ، ބޯކޮށް ވާރޭ ވެހުމާއެކު ގުގުރައި އަދި ވައިގަދަވެ ކަނޑުތައް ގަދަވާނެކަމަށް ނިމުތުކޮށް، މޫސުމާއި ބެހޭ ޤައުމީ އިދާރާއިން، ކ. އަތޮޅުން މ. އަތޮޅަށް ރީނދޫ އިންޒާރު ނެރެފައިވާތީ ވިއްސާރައިގެ ސަބަބުން ލިބިދާނޭ ގެއްލުން ކުޑަކުރުމަށް ދުރާލާ ފިޔަވަޅުއެޅުމަށް އިލްތިމާސްކޮށްފައެވެ.

މޫސުމާއި ބެހޭ ޤައުމީ އިދާރާއިން ހާމަކޮށްފައިވާ ގޮތުގައި ރާއްޖެއަށް މިހާރު ކުރަމުންދާ ވިއްސާރައަކީ، އިންޑިއާކަނޑުގައި އުފެދުނު ކޮޅިގަނޑެއް ރާއްޖެ ހުރަސްކޮށް އަރަބިކަނޑަށް ދަތުރުކުރަމުންދާތީ ކުރަމުން އަންނަ ވިއްސާރައެކެވެ.

ހުސްވި ޑިސެމްބަރު މަހުގެ 31 ވަނަ ދުވަހުވެސް މާލެއަށް ބޯކޮށް ވާރޭވެހި ގޭގެއަށް ފެންވަދެ ގެއްލުންތައް ލިބުނެވެ.