އިލެކްޝަންސް ކޮމިޝަންގެ ނައިބު ރައީސް އިސްމާޢީލް ޙަބީބު ވިދާޅުވީ، "ދަ ޑިމޮކްރެޓްސް"ގެ ނަމުގައި ސިޔާސީ ޕާޓީއެއް އުފެއްދުމަށް، ޖަލްސާ ބޭއްވުމުގެ ހުއްދަ، އެ ޕާޓީ އުފެއްދުމުގެ ހުއްދަ އަށް އެދިވަޑައިގަތް، ހ. ސީވީޑް އަލްއުސްތާޛް ޙަސަން ލަތީފަށް، އިލެކްޝަންސް ކޮމިޝަނުން މިއަދު ދީފައިވާ ކަމަށެވެ. އެހުއްދަ މިއަދު ދެއްވާނެކަން ޢީދު ބަންދު ތެރޭގައިވެސް، ޙަބީބު އޮތީ ވިދާޅުވެފައެވެ.

އޭނާ ވިދާޅުވީ، "ދަ ޑިމޮކްރެޓްސް"ގެ ނަމުގައި ސިޔާސީ ޕާޓީއެއް އުފެއްދުމަށް، ޖަލްސާ ބޭއްވުމުގެ ހުއްދަ، ޖުލައި 2 ވާ އާދީއްތަ ދުވަހު ދިނުމަށް، އިލެކްޝަންސް ކޮމިޝަނުން ނިންމާފައިވާނޭ ކަމުގައި، ޕާޓީ އުފެއްދުމުގެ ހުއްދަ އަށް އެދިވަޑައިގަތް، ހ ސީވީޑް އަލްއުސްތާޛް ޙަސަން ލަތީފަށް މިހާރުވާނީ ދަންނަވާފައި ކަމަށެވެ. ޕާޓީ އުފެއްދުމުގެ ޖަލްސާ ބޭއްވުމަށް ޖުލައި 2 ވަނަ ދުވަހު ހުއްދަ ދިނުމަށް ނިންމައި އިލެކްޝަންސް ކޮމިޝަނުން އެކަން އިޢުލާނު ކުރި އިރު، ޕާޓީ ރަޖިސްޓްރީކޮށް ނުދީގެން ކަމަށް ބުނެ ޖޫން 18 ވަނަ ދުވަހު، ދަ ޑިމޮކްރެޓްސްއަށް ނިސްބަތްވާ ފަރާތްތަކުން ވަނީ، އިލެކްޝަންސް ކޮމިޝަނަށް ވަދެ އަޑު ގަދަކޮށް ނޫސްބަޔާންތައް ދީ ހަދާފައެވެ.

އެކޮމިޝަނުން ބުނީ، 2023 ޖޫން 1 ވަނަ ދުވަހު “ދަ ޑިމޮކްރެޓްސް” ގެ ނަމުގައި ސިޔާސީ ޕާޓީއެއް އުފެއްދުމަށް ކޮމިޝަނަށް ހުށަހަޅާފައިވާ ފޯމުތައް ވެރިފައި ކުރުމުގެ ހުރިހާ މަރުހަލާއެއް ނުނިމެނީސް ޕާޓީ އުފެއްދުމަށް ބާއްވާ ބައްދަލުވުން ބޭއްވުމުގެ ހުއްދަދޭން ކޮމިޝަންގެ މިއަދުގެ ޖަލްސާއިން ފާސްވެފައިނުވާ ކަމަށެވެ. ދަ ޑިމޮކްރެޓްސް ރަޖިސްޓްރީކޮށް ނުދޭން ނިންމި ކަމަށް މިއަދު ރާއްޖޭގެ ބައެއް ނޫސްތަކުން ރިޕޯޓްކުރީ ރަނގަޅަށް ނޫންކަން ފާހަގަކޮށް، ކޮމިޝަނުން ބުނެފައި ވަނީ، ޕާޓީ ރެޖިސްޓަރީ ކުރުމާ އުފެއްދުމަށް ބާއްވާ ޖަލްސާ ބޭއްވުން އެއީ ދެ މަރުހަލާއެއްގައި ހިނގާ ދެކަމެއް ކަމަށެވެ.

މިއީ ރައީސް ނަޝީދު އިސްވެ ހުންނަވައި އެމްޑީޕީގެ ތެރޭގައި އުފެއްދެވި ފިކުރެއްގެ ދިރުމުގައި އިސްކޮށްތިއްބެވި ބޭފުޅުން އެމްޑީޕީން ވަކިވެ އުފައްދާ ޕާޓިއެކެވެ. އެފެކްޝަނާއި އެކު މަސައްކަތް ކުރި އެމްޑީޕީގެ ރައްޔިތުންގެ މަޖިލީހުގެ 1 މެމްބަރަކު ޕާޓީން ވަކިވެފައިވާ ކަމަށް އެމްޑީޕީގެ ފިޔަވަޅު އަޅާކޮމިޓީން ނިންމާފައި ވާއިރު، މިދިޔަ ބުދަ ދުވަހު އެފެކްޝަންގައި ހިމެނޭ އެމްޑީޕީގެ އިތުރު 12 މަޖިލިސް މެމްބަރަކު ވަނީ އެމްޑީޕީން ވަކިިވެވަޑައިގެންފައެވެ.