އެމްޑީޕީގެ ރިޔާސީ ޕްރައިމަރީ ރައީސް ނަޝީދަށް ނާކާމިޔާބު ވުމުން، އެމަނިކުފާނަށް ޕާޓީއެއްގެ ރިޔާސީ ޓިކެޓް ހޯއްދަވައި ދެއްވުމަށްޓަަަކައި އެމަނިކުފާނުގެ ގާތް ބޭފުޅުން އުފައްދެވުމަށް މަސައްކަތްކުރައްވަމުން ގެންދަވާ ޕާޓީ، ދަ ޑިމޮކްރެޓްސް އުފެއްދުމުގެ ޖަލްސާ ބުދަ ދުވަހުގެ ރޭ ބޭއްވުމަށް ނިންމާފައިވާ ކަމުގައި، އެޕާޓީ އުފެއްދުމުގެ ހުއްދަ އިލެކްޝަންސް ކޮމިޝަނުން ދެއްވާފައިވާ ޙަސަން ލަޠީފް ވިދާޅުވެއްޖެއެވެ.

އޭނާ ވިދާޅުވި ގޮތުގައި، އެޖަލްސާ އޮންނާނީ، މިހިނގާ ޖުލައިމަހުގެ 5 ވާ ބުދަދުވަހުގެ ރޭ، 8:30ގައި ޣިޔާޘުއްދީން އިންޓަރނޭޝަނަލް ސްކޫލުގެ ހޯލުގައެވެ.

ސިޔާސީ ޕާޓިއެއް އުފެއްދުމަށް ބޭނުންވާ 3000 މެމްބަރުންގެ ސޮއެ ހަމަކޮށްފައިވާތީ، ދަ ޑިމޮކްރެޓްސް އުފެއްދުމަށް ބާއްވާ ޖަލްސާ ބޭއްވުމުގެ ހުއްދަ އިލެކްޝަންސް ކޮމިޝަނުން، އެޕާޓީގެ މަސްޢޫލުވެރިޔާ ޙަސަން ލަޠީފަށް ދެއްވާފައި ވަނީ އިއްޔެއެވެ.

ދަ ޑިމޮކްރެޓްސްއަކީ ސީދާ ރައީސް ނަޝީދަށް ރިޔާސީ އިންތިޚާބުގައި ވާދަކުރުމަށް ޕާޓީ ޓިކެޓެއް ދެއްވުމަށް އުފައްދަވާ ޕާޓީއަކަށްވާއިރު، އެޕާޓީގައި އިސްކޮށް މަސައްކަތް ކުރައްވާ ބޭފުޅުންނަކީ، އެމްޑީޕީގެ ރިޔާސީ ޕްރައިމަރީ ރައީސް ނަޝީދަށް ނާކާމިޔާބުވެވަޑައިގެންނެވުމުން، އެމްޑީޕީގެ ތެރޭގައި ފިކުރެއްގެ ދިރުމުގެ ނަމުގައި އެމްޑީޕީގެ ތެރޭގައި ވަކިފެކްޝަނެއް އުފައްދަވައިގެން އުޅުއްވި ބޭފުޅުންނެވެ.

ރައީސް ނަޝީދުވެސް މިހާރު ވަނީ އެމްޑީޕީން ވަކިވެވަޑައިގެންފައެވެ. އަދި އެމަނިކުފާނު ވަނީ، ދަ ޑިމޮކްރެޓްސް އުފެއްދުމުގެ ޖަލްސާގައި ބައިވެރިވެވަޑައިގަންނަވާނެކަމުގައި، އިއްޔެ އިޢުލާނުވެސް ކުރައްވާފައެވެ. މައުލޫމާތު ލިބިފައިވާ ގޮތުގައި، ދަ ޑިމޮކްރެޓްސް އުފެއްދުމުގެ ޖަލްސާގެ ކުރިން ރައީސް ނަޝީދު އެޕާޓީއަށް ސޮއެކުރައްވާނެއެވެ.