ދަ ޑިމޮކްރެޓްސް އުފެއްދުމުގެ ޖަލްސާ ބޭއްވުމަށް ޖުލައި 2 ވަނަ ދުވަހު ހުއްދަ ދިނުމަށް ނިންމާފައިވާ ކަމުގައި އިލެކްޝަންސް ކޮމިޝަންގެ ނައިބު ރައީސް އިސްމާއީލް ހަބީބު ވިދާޅުވެއްޖެއެވެ.

ޙަބީބު މިހެން ވިދާޅުވީ، އެކަމާއި ގުޅޭ ގޮތުން މިއަދު ކުރެއްވި ޓުވީޓެއްގައެވެ.

އޭނާ ވިދާޅުވީ، "ދަ ޑިމޮކްރެޓްސް"ގެ ނަމުގައި ސިޔާސީ ޕާޓީއެއް އުފެއްދުމަށް، ޖަލްސާ ބޭއްވުމުގެ ހުއްދަ، ޖުލައި 2 ވާ އާދީއްތަ ދުވަހު ދިނުމަށް، އިލެކްޝަންސް ކޮމިޝަނުން ނިންމާފައިވާނޭ ކަމުގައި، ޕާޓީ އުފެއްދުމުގެ ހުއްދަ އަށް އެދިވަޑައިގަތް، ހ ސީވީޑް އަލްއުސްތާޛް ޙަސަން ލަތީފަށް މިހާރުވާނީ ދަންނަވާފައި ކަމަށެވެ.

ޕާޓީ އުފެއްދުމުގެ ޖަލްސާ ބޭއްވުމަށް ޖުލައި 2 ވަނަ ދުވަހު ހުއްދަ ދިނުމަށް ނިންމައި އިލެކްޝަންސް ކޮމިޝަނުން އެކަން އިޢުލާނު ކުރި އިރު، ޕާޓީ ރަޖިސްޓްރީކޮށް ނުދީގެން ކަމަށް ބުނެ ޖޫން 18 ވަނަ ދުވަހު، ދަ ޑިމޮކްރެޓްސްއަށް ނިސްބަތްވާ ފަރާތްތަކުން ވަނީ، އިލެކްޝަންސް ކޮމިޝަނަށް ވަދެ އަޑު ގަދަކޮށް ނޫސްބަޔާންތައް ދީ ހަދާފައެވެ.

ސިޔާސީ ޕާޓިތައް އުފެއްދުމުގެ މަސައްކަތްތައް ކުރިޔަށް ގެންދާނެ ގޮތުގެ އިޖުރާޢަތްތަކާއި، މުއްދަތުތައް ޤާނޫނުގައި ބަޔާންކޮށްފައި ވަނިކޮށް ދަ ޑިމޮކްރެޓްސްއަށް ނިސްބަތްވާ ފަރާތްތަކުން ވަނީ، ޤާނޫނުގައި ބުނާ ޕާޓީ އުފެއްދުމުގެ ޖަލްސާ ބާއްވައި ހުށައަޅަންޖެހޭ ޑޮކިއުމެންޓްތައްވެސް ހުށަ ނާޅައި، ޤާނޫނުތަކާއި އުސޫލުތަކުން ބޭރުން ޕާޓީ ރަޖިސްޓްރީ ކުރުމަށް ފިއްތުންތައް ކުރިމަތި ކުރުމަށް މަސައްކަތްކޮށްފައެވެ. މިގޮތުން އިލެކްޝަންސް ކޮމިޝަނުން ޕާޓީ ރެޖިސްޓްރީ ނުކޮށްދޭ ކަމަށް ބުނެ ކޮމިޝަނާއި މެދު އާއްމުންގެ އިތުބާރު ގެއްލުވާލައި ރުޅިވެރިކަމާއި ނަފްރަތު ފެތުރުމަށް ނޫސްބަޔާންތަކާއި އިންޓަވިއުތައް ދީ ޙަޤީޤަތާއި ޚިލާފު ވާހަކަތައް ދައްކާފައިވެެއެވެ.