ދަ ޑިމޮކްރެޓްސް އުފެއްދުމާއި އެކު އެޕާޓީއާ ގުޅިވަޑައިގެންނެވި އެމްޑީޕީގެ ދެ ރަށު ކައުންސިލް މެމްބަރުން އެމްޑީޕީއާ އަލުން ގުޅިވަޑައިގެންފިއެވެ.

ދަ ޑިމޮކްރެޓްސް ދޫކުރައްވައި އަލުން އެމްޑީޕީއާ ގުޅިވަޑައިގެންނެވީ، ރަސްދޫ ކައުންސިލްގެ ރައީސް ނާހިދު އަދި އެކައުންސިލްގެ ނައިބު ރައީސް އަނިލްއެވެ. އެބޭފުޅުން ވަނީ، އަލުން އެމްޑީޕީއަށް ސޮއެކުރައްވައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙަށް މެމްބަރޝިޕް ފޯމް އަރުވާފައެވެ.

އެމްޑީޕީގެ ރިޔާސީ ޕްރައިމަރީ ނާކާމިޔާބު ވެވަޑައިގެންނެވުމުން، އެމްޑީޕީގެ ތެރޭގައި ވަކި ފެކްޝަނެއް ހައްދަވައިގެން އުޅުއްވުމަށްފަހުގައި ރައީސް ނަޝީދު ވަނީ އެމަނިކުފާނަށް ވަފާތެރި ބޭފުޅުން ލައްވައި ދަ ޑިމޮކްރެޓްސްގެ ނަމުގައި އައު ސިޔާސީ ޕާޓީއެއް އުފައްދަވާފައެވެ. އަދި ރައީސް ނަޝީދުވެސް ވަނީ އެޕާޓީއަށް ސޮއެކުރައްވާފައެވެ.

ދަ ޑިމޮކްރެޓްސްގެ ހުރިހާ ކޮންޓްރޯލެއް ރައީސް ނަޝީދަށް އޮތް އިރު، އެޕާޓީއާ ގުޅިވަޑައިގެންނެވި އެހެން ބައެއް މެމްބަރުންވެސް ވަނީ އެޕާޓީ ދޫކުރަން ފަށާފައެވެ. އަދި ބައެއް މެމްބަރުން ވަނީ އެއްވެސް ޕާޓީއަކަށް ނިސްބަތްނުވާ މީހުންގެ ގޮތުގައި ތިބުން އިޚްތިޔާރު ކުރަން ފަށާފައެވެ.

ރައީސް ނަޝީދަށްޓަކައި އެމަނިކުފާނުގެ ގާތްބޭފުޅުން އުފެއްދެވި ދަ ޑިމޮކްރެޓްސްގައި އަދި 5000 މެމްބަރުންވެސް ހަމަ ނުވެއެވެ.