ދަ ޑިމޮކްރެޓްސް އުފެއްދުމަށް މަސައްކަތް ކުރާ ފަރާތްތަކުން ޕްރެޝަރު ކުރި ނަމަވެސް، ޤާނޫނުގައި ދީފައިވާ މުހުލަތު އޮއްވައި އަވަސް އަރުވާލައިގެން، އަދި ފޯމްތައް މުޅިން ޕްރޮސެސްކޮށް ނުނިންމައި ޕާޓީ އުފެއްދުމުގެ ޖަލްސާ ބޭއްވުމަށް ދަ ޑިމޮކްރެޓްސްއަށް ހުއްދަ ނުދިނުމަށް އިލެކްޝަންސް ކޮމިޝަނުން ނިންމައިފިއެވެ.

އެކޮމިޝަނުން ބުނީ، 2023 ޖޫން 1 ވަނަ ދުވަހު “ދަ ޑިމޮކްރެޓްސް” ގެ ނަމުގައި ސިޔާސީ ޕާޓީއެއް އުފެއްދުމަށް ކޮމިޝަނަށް ހުށަހަޅާފައިވާ ފޯމުތައް ވެރިފައި ކުރުމުގެ ހުރިހާ މަރުހަލާއެއް ނުނިމެނީސް ޕާޓީ އުފެއްދުމަށް ބާއްވާ ބައްދަލުވުން ބޭއްވުމުގެ ހުއްދަދޭން ކޮމިޝަންގެ މިއަދުގެ ޖަލްސާއިން ފާސްވެފައިނުވާ ކަމަށެވެ.

ދަ ޑިމޮކްރެޓްސް ރަޖިސްޓްރީކޮށް ނުދޭން ނިންމި ކަމަށް މިއަދު ރާއްޖޭގެ ބައެއް ނޫސްތަކުން ރިޕޯޓްކުރީ ރަނގަޅަށް ނޫންކަން ފާހަގަކޮށް، ކޮމިޝަނުން ބުނެފައި ވަނީ، ޕާޓީ ރެޖިސްޓަރީ ކުރުމާ އުފެއްދުމަށް ބާއްވާ ޖަލްސާ ބޭއްވުން އެއީ ދެ މަރުހަލާއެއްގައި ހިނގާ ދެކަމެއް ކަމަށެވެ.

ދަ ޑިމޮކްރެޓްސްއިން ޕާޓީ ރަޖިސްޓްރީ ކުރުމުގެ ފޯމްތައް ހުށައެޅީ މިޖޫން މަހުގެ 1 ވަނަ ދުވަހުގައި ކަމަށްވާއިރު، ބަންދު ދުވަސްތަކާއި އެކު މިއަދަށްވީ 18 ދުވަހެވެ. އިލެކްޝަންސް ކޮމިޝަނަށް ޤާނޫނުން ލާޒިމްކޮށްފައި އޮންނަނީ އެންމެ ގިނަވެގެން 3 މަސްދުވަހުގެ ތެރޭގައި ޕާޓީ ރެޖިސްޓްރީ ކުރުމަށް، ބާއްވާންޖެހޭ ޖަލްސާ ބޭއްވުމުގެ ހުއްދަ ދިނުމަށެވެ.

ދަ ޑިމޮކްރެޓްސްއަކީ، އެމްޑީޕީގެ ރިޔާސީ ޕްރައިމަރީ ރައީސް ނަޝީދަށް ނާކާމިޔާބުވެވަޑައިގެންނެވުމާއިއެކު އެމަނިކުފާނަށް ރިޔާސީ ޓިކެޓެއް ހޯއްދަވައި ދެއްވުމަށް އުފައްދަވާ ޕާޓީއެއް ކަމަށް ވަނީ ބެލެވިފައެވެ. ސެޕްޓެމްބަރު މަހުގެ 9 ވަނަ ދުވަހު ބާއްވާ ރިޔާސީ އިންތިޚާބުގައި، ދަ ޑިމޮކްރެޓްސްގެ ކެންޑިޑޭޓަކު ވާދަކުރާނެ ކަމަށް އެޕާޓީން ބުނި ނަމަވެސް ރިޔާސީ އިންތިޚާބަށް ހުޅުވާލައި، ކެންޑިޑެންސީ ހުށައެޅުމުގެ ވަގުތާއި ހަަމައަށް އެޕާޓީ ރެޖިސްޓްރީ ކުރުމުގެ ހުރިހާ މަރުހަލާއެއް ނިމިދާނެކަމަކަށް މިހާރަކު ނުބެލެވެއެވެ.