"ދަ ޑިމޮކްރެޓްސް"ގެ ނަމުުގައި ސިޔާސީ ޕާޓީއެއް އުފެއްދުމުގެ ހުއްދަ ހ.ސީވީޑް، ހަސަން ލަތީފަށް ކޮމިޝަނުން އިލެކްޝަންސް ކޮމިޝަނުން މިއަދު ދީީފިއެވެ.

މިއީ ރައީސް ނަޝީދު އިސްވެ ހުންނަވައި އެމްޑީޕީގެ ތެރޭގައި އުފެއްދެވި ފިކުރެއްގެ ދިރުމުގައި އިސްކޮށްތިއްބެވި ބޭފުޅުން އެމްޑީޕީން ވަކިވެ އުފައްދާ ޕާޓިއެކެވެ. އެފެކްޝަނާއި އެކު މަސައްކަތް ކުރި އެމްޑީޕީގެ ރައްޔިތުންގެ މަޖިލީހުގެ 1 މެމްބަރަކު ޕާޓީން ވަކިވެފައިވާ ކަމަށް އެމްޑީޕީގެ ފިޔަވަޅު އަޅާކޮމިޓީން ނިންމާފައި ވާއިރު، މިދިޔަ ބުދަ ދުވަހު އެފެކްޝަންގައި ހިމެނޭ އެމްޑީޕީގެ އިތުރު 12 މަޖިލިސް މެމްބަރަކު ވަނީ އެމްޑީޕީން ވަކިިވެވަޑައިގެންފައެވެ.

ދަ ޑިމޮކްރެޓްސް އަކީ، ރައީސް ނަޝީދަށް ރިޔާސީ އިންތިޚާބުގައި ވާދަކުރުމަށް ޓިކެޓް ހޯއްދަވައިދެއްވުމުގެ ގޮތުން އުފައްދާ ޕާޓީއެއްކަމުގައި ގިނަބަޔަކު ޤަބޫލު ކުރެއެވެ.

ދަ ޑިމޮކްރެޓްސް އުފެއްދުމުގެ ހުއްދަ ދިނުމާއިއެކު މިއަދު އެޕާޓިން ވަނީ ޕާޓީއަށް 3000 މެމްބަރުން ހަމަކުރުމަށްޓަކައި ސޮއެ ހޯދައި ފޯމްފުރަން ފަށާފައެވެ. 

މުރާސިލުން އަންދާޒާކުރައްވާ ގޮތުގައި ރައީސް ނަޝީދު ފިކުރެއްގެ ދިރުމާއި އެކު ޕާޓީ އުފެދުމުގެ މަސައްކަތުގައި ޢަމަލީގޮތުން ބައިވެރިވަވަޑައި ނުގަންނަވާ މައިގަނޑު ސަބަބަކީ، ރައްޔިތުންގެ މަޖިލީހުގެ ރައީސް ކަމުގެ ގޮނޑި އެމަނިކުފާނަށް ގެއްލިވަޑައިގަންނަވާނެތީއެވެ. މަޖިލީހުގެ ރިޔާސަތުގައި ރައީސް ނަޝިދު އިންނެވީ އެމްޑީޕީގެ މެމްބަރެއްގެ ހައިސިއްޔަތުންނެވެ. ރައީސް ނަޝީދު އެމްޑީޕީން ވަކިވެވަޑައިގެންފި ނަމަ، އެމްޑިޕީގެ މެމްބަރުން ރައީސް ނަޝީދު ރައްޔިތުންގެ މަޖިލީހުގެ ރައީސް ކަމުގެ މަޤާމުން ވަކިކުރައްވާނެއެވެ. ރައީސް ނަޝީދާއި ނުލައި ފިކުރެއްގެ ދިރުމުގައި ތިއްބެވީ ރައްޔިތުންގެ މަޖިލީހުގެ 13 މެމްބަރުންނެވެ. ރައީސް ނަޝީދާއި ނުލައި، އަދި އިދިކޮޅު މެމްބަރުންނާއި ނުލައިވެސް އެމްޑީީޕީއަށް މަޖިލީހުގެ ސާފު އަޣުލަބިއްޔަތު އެބަ އޮތެވެ.