އިލެކްޝަންސް ކޮމިޝަނުން ދަ ޑިމޮކްރެޓްސް ސިޔާސީ ޕާޓީއެއްގެ ގޮތުގައި ރަޖިސްޓްރީކޮށްދީފިއެވެ.

އެކޮމިޝަނުން ބުނީ، ޤާނޫނު ނަންބަރު 2013/4 (ސިޔާސީ ޕާޓީގެ ޤާނޫނު) އާއި ގަވާއިދު ނަންބަރު 2019/R-110 (ސިޔާސީ ޕާޓީގެ ގަވާއިދު) ގައިވާ ގޮތުގެ މަތީން "ދަ ޑިމޮކްރެޓްސް" މި ނަމުގައި ސިޔާސީ ޕާޓީއެއް މި ކޮމިޝަނުން ބަލަހައްޓާ ސިޔާސީ ޕާޓީގެ ދަފްތަރުގައި 2023 ޖުލައި 12 ވީ ބުދަ ދުވަހު މިއަދު ރަޖިސްޓަރީކޮށްދީފައިވާ ކަމަށެވެ.

އެކޮމިޝަނުން ބުނީ، " ދަ ޑިމޮކްރެޓްސް” ނަމުގައި، ސިޔާސީ ޕާޓީ އެއް އުފެއްދުމަށް، ހ. ސީވީޑް އަލްއުސްތާޛް ޙަސަން ލަތީފް ހުށަހަޅުއްވާފައިވާ ހުށަހެޅުއްވުމާ ގުޅިގެން، ސިޔާސީ ޕާޓީއެއް ރަޖިސްޓަރީ ކުރުމަށްޓަކައި ފުރިހަމަ ވާންޖެހޭ އިޖްރާއާތު ފުރިހަމަ ކޮށްފައިވާތީ، "ދަ ޑިމޮކްރެޓްސް" ސިޔާސީ ޕާޓީތަކުގެ ދަފްތަރުގައި މިހާރު ހިމަނާފައިވާ ކަމަށެވެ. އަދި ދަޑިމޮކްރެޓްސްގެ ރަޖިސްޓަރީ ޙަވާލުކުރުމުގެ ބައްދަލުވުމެއްވެސް މިއަދު ވަނީ ބާއްވާފައެވެ.

ދަ ޑިމޮކްރެޓްސްއަކީ، 28 ޖެނުއަރީ 2023ގައި ބޭއްވި އެމްޑީޕީގެ ރިޔާސީ ޕްރައިމަރީ، ރައީސް ނަޝީދަށް ނާކާމިޔާބު ވުމުން އެމްޑީޕީގެ ތެރޭގައި، ރައީސް ނަޝީދު އުފެއްދެވި، ފިކުރެއްގެ ދިރުން ފެކްޝަނަށް ނިސްބަތްވާ ފަރާތްތަކުން އުފެއްދި ޕާޓީއެކެވެ. އެޕާޓީ އުފެއްދުމުގެ ބޭނުމަކީ، ރައީސް ނަޝީދަށް ރިޔާސީ އިންތިޚާބުގައި ވާދަ ކުރުމަށް ޕާޓީ ޓިކެޓެއް ހޯދައިދިނުން ކަމުގައި ވަނީ ބެލެވިފައެވެ. ދަ ޑިމޮކްރެޓްސްގެ ރިޔާސީ ކެންޑިޑޭޓުގެ ގޮތުގައި ރައީސް ނަޝީދު ނުކުންނަވާނެ ކަމަށް ބެލެވިފައިވާއިރު، އެމަނިކުފާހު ބުރާސްފަތި ދުވަހުގެ ރޭ ދަ ޑިމޮކްރެޓްސްއަށް ސޮއެކުރައްވާނެ ކަމުގައި އެޕާޓީން ވަނީ ބުނެފައެވެ.