ދަ ޑިމޮކްރެޓްސްގެ ނަމުގައި ސިޔާސީ ޕާޓީއެއް އުފެއްދުމުގެ ޖަލްސާ ބޭއްވުމުގެ ހުއްދަ އިލެކްޝަންސް ކޮމިޝަނުން ދީފިއެވެ.

އިލެކްޝަންސް ކޮމިޝަންގެ ނައިބު ރައީސް އިސްމާޢީލް ޙަބީބު ވިދާޅުވީ، "ދަ ޑިމޮކްރެޓްސް"ގެ ނަމުގައި ސިޔާސީ ޕާޓީއެއް އުފެއްދުމަށް، ޖަލްސާ ބޭއްވުމުގެ ހުއްދަ، އެ ޕާޓީ އުފެއްދުމުގެ ހުއްދަ އަށް އެދިވަޑައިގަތް، ހ. ސީވީޑް އަލްއުސްތާޛް ޙަސަން ލަތީފަށް، އިލެކްޝަންސް ކޮމިޝަނުން މިއަދު ދީފައިވާ ކަމަށެވެ.

އެހުއްދަ މިއަދު ދެއްވާނެކަން ޢީދު ބަންދު ތެރޭގައިވެސް، ޙަބީބު އޮތީ ވިދާޅުވެފައެވެ.

ޕާޓީ އުފެއްދުމަށް 3500 މީހުންގެ ސޮޔާއިއެކު، ދަ ޑިމޮކްރެޓްސްއިން ފޯމްތައް ހުށައެޅީ، ޖޫން 1 ވަނަ ދުވަހުގައެވެ. ފޯމްތައް ޗެކްކޮށް، ޕާޓީ އުފެއްދުމުގެ ޖަލްސާ ބޭއްވުމުގެ ހުއްދަ ދޭން އިލެކްޝަންސް ކޮމިޝަނަށް ލާޒިމް ވަނީ 3 މަސްދުވަހުގެ ތެރޭގައި ނަމަވެސް، ޕާޓީ ރަޖިސްޓްރީ ނުކޮށްދީގެން ކަމަށް ބުނެ، ޖޫން 18 ވަނަ ދުވަހު، ދަ ޑިމޮކްރެޓްސްއިން ވަނީ، އިލެކްޝަންސް ކޮމިޝަންގެ މައި އިދާރާއަށް ވަދެ ހަމަނުޖެހުންތައް ހިންގާފައެވެ.

އަޑު ފެތުރިފައިވާ ގޮތުގައި، ދަ ޑިމޮކްރެޓްސް އަކީ، އެމްޑީޕީގެ ރިޔާސީ ޕްރައިމަރީގައި ވާދަކޮށް ނާކާމިޔާބާއި ކުރިމަތިވެވަޑައިގެންނެވި، ރައީސް މުހައްމަދު ނަޝީދަށް ކުރިޔަށް އޮތް ރިޔާސީ އިންތިޚާބުގައި ވާދަކުރުމަށް ޕާޓީ ޓިކެޓެއް ހޯދައި ދިނުމުގެ ގޮތުން އުފައްދާ ޕާޓިއެކެވެ. ރައީސް ނަޝީދު މިހާރު އެމްޑީޕީން ވަކިވެވަޑައިގެންފައި ވާއިރު، ދަ ޑިމޮކްރެޓްސްގައި އިސްކޮށް މަސައްކަތް ކުރައްވަމުން ދަނީ، އެމްޑީޕީގެ ތެރޭގައި ރައީސް ނަޝީދު އުފެއްދެވި، ފިކުރެއްގެ ދިރުމުގައި ހިމެނޭ ބޭފުޅުންނެވެ.