ރިޔާސީ އިންތިހާބުގެ ދެވަނަ ބުރުގެ ވޯޓުލުމަށް ހަފްތާއަކަށްވެފައިވާއިރު، އެމްޑީޕީގެ ރިޔާސީ ކެނޑިޑޭޓު ރައީސުލްޖުމްހޫރިއްޔާ އިބްރާޙިމް މުޙައްމަދު ޞާލިޙް އާއި ޕީއެންސީގެ ރިޔާސީ ކެނޑިޑޭޓު ޑރ. މުޙައްމަދު މުއިއްޒު އަންނަނީ ރައްޔިތުންނަށް ގިނަ ވަޢުދުތަކެއް ވަމުންނެވެ. އެގޮތުން ބޯހިޔާވަހިކަމާއި، ފަރުދީ ފުދުންތެރިކަމާ ގުޅުންހުރި ގިނަ ވަޢުދުތަކެއް، ރިޔާސީ އިންތިހާބުގެ ފުރަތަމަ ބުރަށްފަހު ވެސް މިވަނީ ވެފައެވެ.

ކަން މިހެން އޮތް އިރު، ރައްޔިތުން އެންމެ ބޮޑަށް އުފައްދާ އެއް ސުވާލަކީ، މި ހުރިހާ ވަޢުދުތަކަކީ ފުއްދޭނެ ވަޢުދުތަކެއް ކަމާގުޅޭގޮތުންނެވެ.

މި ބަހުސްގައި ދެ ކެނޑިޑޭޓުންގެ ރާގު ތަފާތެވެ. ޕީއެންސީގެ ރިޔާސީ ކެނޑިޑޭޓު ޑރ. މުޙައްމަދު މުއިއްޒު ވިދާޅުވަނީ ރާއްޖޭގެ އިޤްތިޞާދު އޮތީ ފުނޑުފުނޑުވެފައި ކަމަށެވެ. އަދި އެބޭފުޅާގެ ރިޔާސީ ވަޢުދުތައް ވެސް ބިނާވާނީ އިޤްތިޞާދަށް ގެންނަ ބަދަލުތަކުން ރާއްޖޭގެ އާމްދަނީ އިތުރުވަމުންދާ މިންވަރަށް ބަލައިގެން ކަމަށެވެ.

Advertisement

ނަމަވެސް ރައީސް ޞާލިޙްގެ ކެބިނެޓްގެ ފިނޭންސް މިނިސްޓަރ އިބްރާޙިމް އަމީރު، ގދ ގައްދޫގައި މިދިޔަ އޮގަސްޓް މަހު ބޭއްވި "އުފާވެރި އަމާން ރާއްޖެ" ޖަލްސާގައި ވިދާޅުވެފައިވަނީ، ދުނިޔޭގެ އެހެން ގައުމުތަކާ އެއްގޮތަށް ކޮވިޑާއި ގުޅިގެން ރާއްޖޭގެ އިޤްތިޞާދަށް ދުވަހަކު ވެސް ނާންނަވަރުގެ ބޮޑު ލޮޅުމެއް އައިނަމަވެސް، ރާއްޖޭގެ އިޤްތިޞާދު މިހާރު އަންނަނީ ކުރިއަރަމުން ކަމަށެވެ. އެގޮތުން މިހިނގާ 2023 ވަނަ އަހަރު ނިމޭއިރު ރާއްޖޭގެ އިގްތިޞާދު ގާތްގަނޑަކަށް 107 ބިލިއަން ރުފިޔާއަށް އަރާނެކަމަށް އަމީރު ވިދާޅުވެފައިވެއެވެ.

ރައީސް ޔާމީނުގެ ފަހު އަހަރު، 2018 ގައި، ރާއްޖޭގެ އިގްތިޞާދު ހުރީ 81 ބިލިއަން ރުފިޔާގައެވެ.

ކޮންމެ އަކަސް، ހިސާބުގެ ވާހަކަ މިނިސްޓަރ އަމީރު މި ފާހަގަކުރެއްވީ، ޑރ. މުއިއްޒު ސިފައިންނާއި ފުލުހުންގެ މުސާރަ ޑަބަލް ކުރައްވާނެކަމަށް ވިދާޅުވުމަށްފަހު، އޭގެ 3 ދުވަސްފަހުން އެކަން ކުރެވޭނީ 3 ބުރަކަށް ބަހާލައިގެންކަމާއި، ރާއްޖޭގެ އިޤްތިޞާދަށް އަންނަ ބަދަލާ ގުޅިގެން އާމްދަނީ އިތުރުވާ މިންވަރަށް ބެލުމަށްފަހުކަމުގައި ވިދާޅުވުމުންނެވެ. އަދި ޑރ. މުއިއްޒު ވިދާޅުވެފައިވަނީ، ސަރުކާރުގެ އެހެން މުވައްސަސާތަކުގެ މުސާރަވެސް ބޮޑު ކުރާނީ ރާއްޖޭގެ އާމްދަނީ ކުރިއަރަމުންދާ މިންވަރަށް ބަލައިގެން ކަމަށެވެ.

މިކަމާ ގުޅިގެން މިނިސްޓަރ އަމީރު ކުރެއްވެވި ޓުވީޓެއްގައި ވިދާޅުވެފައިވަނީ، ރައީސް ޞާލިޙް ވައުދުވެ ވަޑައިގަންނަވަނީ ހިސާބުޖަހައި، ދިރާސާކޮށް އަދި ވައުދުތައް ފުއްދޭނެކަމުގެ ޔަގީންކަން ހޯއްދަވައިގެން ކަމަށެވެ.

އެހެންކަމުން، މިނިސްޓަރ އަމީރު އެ ވިދާޅުވާ ހިސާބު ރަގަޅަށް ޖައްސަވާފައިވާނަމަ، ވަރަށް އަވަހަށް ކަރަންޓު ބިލުން ބޮޑު ލުޔެއް ލިބޭނެއެވެ، ރިޓަޔަމަންޓް އެލަވަންސްގެ ގޮތުގައި 7،000ރ. ލިބޭނެއެވެ، ތަންފީޒީ އިދާރާތަކާއި ސިވިލް ސަރވަންޓުންނާއި މިނިވަން މުވައްސަސާތަކާއި މުދިމުންގެ މުސާރަ އެންމެ ކުޑަ މިނުން %40 އަށް ޖެނުއަރީ މަހުން ފެށިގެން ބޮޑުވާނެއެވެ، މަސްވެރިންގެ އަތުން 25ރ އަށް މަސްކިލޯއެއް ގަންނަމުން ދާނެއެވެ، ސްޓޫޑެންޓް ލޯނުނަގާފައިވާ ފަރާތްތަކުގެ ލޯނު ކަނޑައެޅޭ އުސޫލަކުން މާފު ކުރާނެއެވެ، އެސްއެމްއީ ލޯނުގެ އިންޓަރެސްޓް އުނިކުރާނެއެވެ، ގެދޮރު އެޅުމަށް ޙާއްސަ ލޯނެއް ދޫކުރާނެއެވެ، ސެޓްފިކެޓް ލެވެލް އިން ފެށިގެން ޑިގްރީއަށް ހިލޭ ކިޔެވޭނެއެވެ، އަދި މިހެން ގޮސް ވަރަށް ބައިވަރު ކަންތައްތަކެއް ހިމެނެއެވެ.

ޑިމޮކްރަސީއެއްގައި، ރައްޔިތު މިހާ މުހިންމުވެ، އެ މީހާގެ ބާރުވެރިކަން އަންނަ ހިސާބަކީ މިއީ ކަމުގައި މިއޮތީ ޔަޤީންކުރެވިފައެވެ.