Advertisement
ރައީސުލްޖުމްހޫރިއްޔާ އިބްރާހީމް މުހައްމަދު ޞާލިޙް ---
މެމްބަރުން އެމްޑީޕީއާ އަލުން ގުޅެނީ ރިޝްވަތު ދީގެންކަމަށް ކުރާ ތުހުމަތުތައް ރައީސް ދޮގުކުރައްވައިފި
ރައްޔިތުންގެ މަޖިލީހުގެ މެމްބަރުންގެ ތެރެއިން އެމްޑީޕީން ވަކިވެވަޑައިގެންނެވި މެމްބަރުން، އަލުން އެޕާޓީއާ ގުޅެނީ ރިޝްވަތުދީގެން ކަމަށް ބުނެ ކުރާ ތުހުމަތުތައް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިޙް ދޮގު ކުރައްވައިފިއެވެ.
ރައީސުލްޖުމްހޫރިއްޔާ ކޮޅުމަޑުލަށާއި ހައްދުންމައްޗަށް ކެމްޕޭން ދަތުރުފުޅު ނިންމަވާލެއްވުމަށްފަހު ފުރާވަޑައިގެންނެވުމުގެ ކުރިން ވަނީ، ނޫސްވެރިންނާއި ބައްދަލު ކުރައްވައި ނޫސްވެރިންގެ ސުވާލުތަކަށް ޖަވާބުދެއްވާފައެވެ.
ރައީސް ނަޝީދާއި އެކު ދަ ޑިމޮކްރެޓްސްގައި ތިއްބެވި ބައެއް މަޖިލިސް މެމްބަރުންގެ ތެރެއިން ދެ މެމްބަރަކު ވަނީ، އަލުން އެމްޑީޕީއާ ގުޅިވަޑައިގެންފައެވެ. އަދި އެކަމާ ކޯފާ އިސްކުރައްވަިއ ރައީސް ނަޝީދު ވަނީ އެމެމްބަރުން އެމްޑީޕީއާ އަލުން ގުޅިވަޑައިގެންނެވީ ރިޝްވަތު ދީގެން ކަމަށް ތުހުމަމަތު ކުރައްވާފައެވެ. އަދި ރައްޔިތުންގެ މަޖިލީހުގެ ރައީސްގެ މަޤާމުގައި ނަޝީދު ހުންނެވި އިރު މަޖިލީހުން ވަނީ މެމްބަރުން ރިޝްވަތުގައި ހިފާކަމަށް ބުނެ ފުލުހުންނަށް މައްސަލައެއްވެސް ހުށައަޅާފައެވެ.
ދާދި އަވަހަށް ރައްޔިތުންގެ މަޖިލީހުގެ އިތުރު ދެމެމްބަރަކު އެމްޑީޕީއަށް ސޮއިކުރައްވާނެކަމުގެ އަޑުތައް ފެތުރުފައިވާއިރު، ރައީސުލްޖުމްހޫރިއްޔާ ވިދާޅުވީ، މެމްބަރުން އެމްޑީޕީއަށް ސޮއެކުރައްވަނީ އެއްވެސް ބާވަތެއްގެ ރިޝްވަތެއް އޭގައި އޮވެގެން ނޫންކަމަށެވެ.
ރައިސުލްޖުމްހޫރިއްޔާ ވިދާޅުވީ، ޕީޕީއެމް ފިޔަވައި އެހެން ޕާާޓީތަކާއި އެކުވެސް ސިޔާސީ ގޮތުން މަޝްވަރާތައް ކުރެވެމުންދާ ކަމަށެވެ.
ރައީސުލްޖުމްހޫރިއްޔާ ވަނީ، އެމްޑީޕީއާ ގުޅިވަޑައިގަތުމަށް ޕީޕީއެމް ނޫން ޕާޓީތަކަށް ދައުވަތު ދެއްވާފައެވެ.
