ރައްޔިތުންގެ މަޖިލީހުގެ ތޮއްޑޫ ދާއިރާގެ މެމްބަރު ޙަސަން ޝިޔާން އަލުން އެމްޑީޕީއަށް ސޮއެކުރައްވައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙްގެ ކެމްޕޭން ޓީމާއި ގުޅިވަޑައިގެންފިއެވެ.

ޝިޔާން އެމްޑީޕީއަށް ސޮއެކުރައްވާފައި ވަނީ ރޭގައެވެ.

ރައީސް ނަޝީދަށް ކުރެއްވި ތާއީދު ދޫކޮށްލައްވައި، އެމްޑީޕީއާ ގުޅިވަޑައިގެންނެވުމަށްފަހު، ޝިޔާން ވިދާޅުވީ، އަލުން އެމްޑީޕީއާ ގުޅިވަޑައިގެންނެވީ، އެއީ ދާއިރާގެ ރައްޔިތުންނާއި އަދި މުޅިރާއްޖޭގ ގިނަ ދިވެހި ރައްޔިތުންގެ ވިންދުވެސް ހުރިގޮތަކީ އެއީ ކަމަށްވާތީއެވެ. މީގެ އިތުރުން ތޮއްޑޫދާއިރާ ސާފު ބޮޑު އަޣުަލަބިއްޔަތާއި އެކު، ރައީސުލްޖުމްހޫރިއްޔާ އިބްރާހީމް މުހައްމަދު ޞާލިޙް މި އިންތިޚާބު އެއްބުރުން ކާމިޔާބު ކުރައްވާނެ ކަމުގައިވެސް ޝިޔާން ވަނީ ވިދާޅުވެފައެވެ.

ރައްޔިތުންގެ މަޖިލީހުގެ ތޮއްޑޫ ދާއިރާގެ މެމްބަރު ޙަސަން ޝިޔާންއަކީ، ދަ ޑިމޮކްރެޓްސް އުފެއްދެވުމަށްޓަކައި އެމްޑީޕީން ވަކިވެވަޑައިގެންނެވި، 13 މަޖިލިސް މެމްބަރުންގެ ތެރޭގައި ހިމެނޭ ބޭފުޅެކެވެ. މިހާތަނަށް މަޖިލީހުގެ ދެމެމްބަރަކު ވަނީ ޑިމޮކްރެޓްސް ދޫކުރައްވައި އަލުން އެމްޑީޕިއާ ގުޅިވަޑައިގެންފައެވެ.

އެމްޑީޕީއަށް އަލުން ސޮއެކުރެއްވުމަށްފަހު، ރައްޔިތުންގެ މަޖިލީހުގެ ތޮއްޑޫދާއިރާގެ މެމްބަރު ހަސަން ޝިޔާން ވަނީ، ކެމްޕޭނަށް މިއަދު ދާއިރާއަށް ވަޑައިގެންފައެވެ.