ރައީސުލްޖުމްހޫރިއްޔާ އިބްރާހިމް މުހައްމަދު ސާލިހްގެ ވެރިކަމުގެ 2 ވަނަ ދައުރެއްގައި ދުވާފަރަށް ކޮށްދެއްވާނެ ގިނަ ކަންތައްތައް އެމަނިކުފާނު އިއުލާންކުރައްވައިފިއެވެ. މިއާއިއެކު ޖަލްސާގައި ބައިވެރިވި ދުވާފަރު ރައްޔިތުން ވަނީ ވަރަށް ބޮޑަށް އުފާފާޅުކޮށްފައެވެ.

މި ޖަލްސާގައި ރައީސް ވިދާޅުވީ، ރ. ދުވާފަރުގެ ސިއްޙީ މަރުކަޒު ހޮސްޕިޓަލަކަށް ބަދަލުކޮށްދެއްވާނެކަމަށެވެ. އަދި ސްކޫލް ކުދިންނަށް ޚާއްސަކޮށްގެން ދުވާފަރުގައި ބަހުގެ ޚިދުމަތް ފަށްޓަވާނެ ކަމަށެވެ. 

ދުވާފަރުގައި އެއަރޕޯޓެއް އަޅުއްވައިދެއްވާނެކަމުގެ ފެހި ސިގްނަލްވެސް ރައީސް ވަނީ ދެއްވާފައެވެ. އެގޮތުން ދުވާފަރު ރައްޔިތުންގެ އެންމެ ބޮޑު އެއް އެދުމަކީ އެރަށުގައި އެއަރޕޯޓެއް އެޅުންކަމަށާއި އެއަރޕޯޓެއް އެޅުމާ ގުޅޭގޮތުން ކަމާ ބެހޭ ފަރާތްތަކާއެކު މަޝްވަރާކުރެއްވުމަށްފަހު ގޮތެއް ނިންމަވާނެ ކަމަށް މިޖަލްސާގައި ރައީސް ވަނީ ވިދާޅުވެފައެވެ.

"ތިޔަބޭފުޅުންގެ ތިޔަ އެދުމާ އެކީގައި އަޅުގަނޑު ޕްލޭނިން މިނިސްޓްރީ އާއި، ޕޮލިސީ ޓީމު އަދި ފައިނޭންސް މިނިސްޓްރީއާ އެކު އަދި އިށީންނާނަން. ތިޔަބޭފުޅުން އުންމީދު ގެއްލުވާނުލާ. އަޅުގަނޑުމެން ތިޔަބޭފުޅުންނަކަށް ދެރަގޮތެއް ނުހަދާނަން" އެމްޑީޕީގެ ރިޔާސީ ކެންޑިޑޭޓް ރައީސް އިބްރާހިމް މުޙައްމަދު ޞާލިޙް ވިދާޅުވިއެވެ.

މީގެއިތުރުން އެމަނިކުފާނުގެ ދެވަނަ ދައުރެއްގައި ދުވާފަރުގައި މިހާރު ހިއްކާފައިވާ 22 ހެކްޓަރު ބިމުގައި ފްލެޓާއި ރޯހައުސް އަޅުއްވާނެ ކަމަށް ވިދާޅުވެފައިވެއެވެ. އަދި ދުވާފަރަކީ މަސްވެރިކަން ކުރާ ގިނަ އަދަދެއްގެ ބައެއް އުޅޭ ރަށެއްކަމަށާއި މަސްވެރިން އެދޭ ގޮތަށް ދުވާފަރުގައި މަސް ޕްރޮސެސްކޮށް މަސްވެރިން ބާނާ މަސް ރައްކާކުރެވޭނެ އިންތިޒާމްތައް ދެވަނަ ދައުރުގައި ހައްދަވާދެއްވާނެ ކަމަށް ރައީސް ވިދާޅުވިއެވެ. އަދި ދުވާފަރުގައި ނުހަދާ އޮތް މަގުތައްވެސް ހައްދަވައިދެއްވާނެ ކަމަށް ވިދާޅުވިއެވެ.