"އުފާވެރި އަންހެނުން" (ޓީ ވިތް އިބޫ)ގެ ނަމުގައި އެމް.ޑީ.ޕީގެ އަންހެނުންގެ ރޫޙުން ޙާއްސަ ކެމްޕެއިން ހަރަކާތެއް ކުރިއަށް ގެންގޮސްފިއެވެ. މިއީ ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހްގެ ވެރިކަމުގައި އަންހެނުންނަށް ހޯދަވައިދެއްވި ކުރިއެރުންތައް ފާހަގަކުރުމަށް އެ ޕާޓީގެ އަންހެނުންގެ ރޫހުން ކުރިއަށްގެންދިޔަ ހަރަކާތެކެވެ.

މާލެ ސަރަހައްދުގައި މި ހަރަކާތް ފެށުމުގެ ބައްދަލުވުން ކުރިއަށްގެންގޮސްފައިވަނީ އިއްޔެ ހަވީރު ހުޅުމާލެ ފޭސް 1ގެ ރުއްގަޑު އެކެއްގައެވެ. އަތޮޅުތަކުގެ ރަށްތަކުގައިވެސް މި ހަރަކާތް އިއްޔެ ވަނީ ކުރިއަށްގެންގޮސްފައެވެ. 

މި ހަރަކާތުގައި އެމްޑީޕީގެ ރިޔާސީ ކެންޑިޑޭޓް އަދި ރައީސުލްޖުމްހޫރިއްޔާ އިބްރާހިމް ޞާލިހްއާއި އެމަނިކުފާނުގެ އަނބިކަނބަލުން ފަޒްނާ އަޙްމަދު ބައިވެރިވެވަޑައިގެންނެވިއެވެ. މި ހަރަކާތުގައި ބައިވެރިވެވަޑައިގެން ރައީސް ޞާލިހް ވަނީ އެމްޑީޕީގެ އަންހެން ސަޕޯޓަރުންނާ ބައްދަލުކުރައްވާ ވަގުތުކޮޅެއް ހޭދަކުރައްވާފައެވެ.

މިހަރަކާތުގައި ލައިވް މިއުޒިކްއާއި ބޮޑުބެރުގެ ހަރަކާތްތައްވެސް ވަނީ ކުރިއަށްގެންގޮސްފައެވެ.  މި ވެރިކަމުގައި އަންހެނުންނަށް ގިނަ ފުރުސަތުތަކެއް ވަނީ ފަހިކޮށްދީފައެވެ. އެގޮތުން ކައުންސިލްތަކުން ވަކި އިންސައްތައެއް އަންހެނުންނަށް ޙާއްސަކޮށް ފައިވާއިރު، ވިހެއުމާއި ގުޅިގެން އަންހެނުންނަށްދޭ ޗުއްޓީ ވަނީ 6 މަސްދުވަހަށް އިތުރުކޮށްދީފައެވެ. އަދި ކުދި ފަންތިއާއި މެދުފަންތީގެ ވިޔަފާރިތަކަށް ލޯނު ދިނުމަށް އުފެއްދި އެސްއެމްއީ ބޭންކުންވެސް އެންމެ އިސްކަމެއްދީގެން ލޯނު ފޯރުކޮށްދެނީ އަންހެނުންނަށެވެ.

އެސްއެމްއީ ހަބްގެ ގިނަ ކިއޮސްކްތަކެއް އަންހެނުންނަށް ދޫކޮށްފައިވާއިރު އޮތެންޓިކް މޯލްޑިވްސްގައި 197 ސަޕްލަޔަރުން ތިބިއިރު މީގެތެރެއިން 137 ސަޕްލަޔަރުންނަކީ އަންހެނުންނެވެ.