ދާންދޫ ދާއިރާގެ ކުރީގެ މެންބަރު ޔައުގޫބް އަބްދުﷲ ---
ރާއްޖެ އޮތީ ފައިސާ ޗާޕުކުރަންޖެހޭ ހާލަތުގައި ނޫންކަމަށް ޔައުޤޫބު ވިދާޅުވެއްޖެ
ރާއްޖެ އޮތީ ފައިސާ ޗާޕުކުރަންޖެހޭ ހާލަތުގައި ނޫންކަމަށް ދާންދޫ ދާއިރާގެ ކުރީގެ މެންބަރު ޔައުގޫބް އަބްދުﷲ ވިދާޅުވެއްޖެއެވެ.
ރާއްޖެ ޓީވީއަށް ދިން އިންޓަވިއުއެއްގައި ޔައުޤޫބު ވިދާޅުވީ، އެމްޑީޕީ ސަރުކާރުގައި ފައިސާ ޗާޕުކުރީ ކޮވިޑުގެ ދަތި ހާލަތު ދިމާވެގެން ކަމަށާއި، އެއީ މުޅި ދުނިޔެއަށް ކުރިމަތިވި ކަމެއް ކަމަށެވެ. ނަމަވެސް ފައިސާ ޗާޕްކުރަންޖެހޭ ޙާލަތެއް އެމްޑީޕީ ސަރުކާރުން ބަދަލުވެގެން ދިޔަ އިރު މި ޤައުމަކު ނޯންނާނެ ކަމަށް ވިދާޅުވިއެވެ.
އަދި ސަރުކާރުން ޗާޕުކުރީ، ގާތްގަނޑަކަށް އޭރަށް އޭގެ ކުރީ އަހަރުތަކުގައި ޗާޕުކުރި ޖުމުލަ އަދަދަށްވުރެވެސް ދަށުން ކަމަށާއި، މި ސަރުކާރުން އެއަށްވުރެވެސް އެތައް ގުނައެއް އިތުރު އަދަދެއް ޗާޕުކޮށްގެން އުޅެނީ އެ ޙާލަތެއް ނެތް އިރު ކަމަށް ޔައުޤޫބު ވަނީ ވިދާޅުވެފައެވެ.
މީގެ އިތުރުން ޔައުޤޫބު ވިދާޅުވީ، ކުރީ ސަރުކާރުގައި އެކިއެކި އަހަރުތަކުގައި ލިބުނު އާމްދަނީއާއި، މި ސަރުކާރުގައި މިހާރު ލިބެމުންދާ އާމްދަނީ އިތުރުކަމަށެވެ. އެކަމުގެ ސަބަބަކީ ވެސް ކޮވިޑުގެ ދުވަސްތަކާއި އެ ހާލަތުން އަރައިގަތުމަށް ހޭދަކުރަން ޖެހުނު ދުވަސްތަކެވެ.
ޔައުގޫބް ވިދާޅުވީ މިހާރު މި ސަރުކާރުން އައިސް ކުރަނީ ދެކަމެއް ކަމަށެވެ. އެއީ އިސްރާފުކުރުމާއި، ވައްކަންކުރުން ކަމަށާއި، މި ދެ ކަންތައް ބަޖެޠުގައި އިންތިހާއަށް ޖަހާފައި ހުރުމުން ދެން އިތުރަށް ރައްޔިތުންނަށް ބޭނުންވާ ކަމެއް ނުކުރެވޭނެ ކަމަށެވެ. ޔައުގޫބު ވިދާޅުވީ މި ސަރުކާރުގައި ފާހަގަކުރެވޭ ކަމަކީ، މާލީ ކަންކަމަކީ މާ މުހިންމު ކަންކަން ކަމެއްގެ ގޮތުގައި ރައީސް ޑރ. މުހައްމަދު މުޢިއްޒު ގަބޫލުފުޅުނުކުރައްވާ ކަމަށެވެ.