ހުކުރު ދުވަހުގެ މެންދުރުފަހު ޢުމްރާއިން މީހުން އެނބުރި އަންނާނެތީ، ވެލާނާ އެއަރޕޯޓު ބާރުބޮޑުވާނެ ކަމަށް ލަފާކޮށް، ފުރަންދާ ފަރާތްތަކުން ދުރާލާ އެއަރޕޯޓަށް ދިއުމަށް މޯލްޑިވްސް އެއަރޕޯޓްސް ކޮމްޕެނީ ލިމިޓެޑް، އެމްއޭސީއެލްއިން އިލްތިމާސްކޮށްފިއެވެ.

އެމްއޭސީއެލްއިން ވަނީ އުމްރާއިން މީހުން އަންނަ ފްލައިޓުތައް ދެ ގަޑިއެއްގައި އަންނާނެކަން ހާމަކޮށްފައެވެ. އެއީ މެނދުރުފަހު 2:00 އާއި ހަވީރު 4:00 ގައެވެ. އެކުންފުނިން ދަތުރުފަތުރުގެ ޚިދުމަތް ދެއްވާ ފަރާތްތަކާއި ޓެކްސީތަކުންވެސް މިގަޑިތަކުގައި އެއަރޕޯޓުގެ ޓްރެފިކް ތޮށްޖެހުން ކުޑަކުރުމަށް އެއްބާރުލުން ދިނުމަށް އެދިވަޑައިގެންފައެވެ.

އެހެންކަމުން އޮޕަރޭޝަންތައް ފަސޭހަކަމާއެކު ކުރިއަށް ގެންދިއުމަށް އެއަރޕޯޓަށްދާ ފަރާތްތަކުން ވީހާވެސް އަވަހަށް ޗެކިން އަދި ސެކިއުރިޓީ ކްލިއަރެންސް ހެދުމަށް ވަނީ އިލްތިމާސްކޮށްފައެވެ.

މި ރަމަޟާން މަހު ޙައްޖު ކޯޕަރޭޝަންގެ ހަވާލުގައި ޖުމްލަ 577 މީހުން ޢުމްރާގެ އަޅުކަން އަދާކުރާނެއެވެ. އޭގެތެރޭގައި މުޅި ރަމަޟާން މަހުގެ ޢުމްރާވެރިންނާ އަދި ފަހު 15އަށް ދަތުރުކުރާ މީހުން ހިމެނެއެވެ. ހައްޖު ކޯޕަރޭޝަން އިތުރުން، އަމިއްލަ ކުންފުނިތަކާއެކުވެސް މިފަހަރު ރޯދަ ޢުމްރާއަށް ގިނަ ބަޔަކު ވަނީ ގޮސްފައެވެ.