ވައްކަމުގެ މައްސަލާގައި ހައްޔަރުކުރި މީހާ
އިނގިލި ބުރިކޮށްލަން އުޅުނު މައްސަލައެއްގައި ހިމެނޭ މީހަކު ވައްކަމުގެ މައްސަލައެއްގައި ހައްޔަރުކޮށްފި
ހުޅުމާލޭގައި މީހަކު ރަހީނު ކުރުމަށް ފަހު އޭނާގެ އިނގިލި ބުރިކޮށްލަން އުޅުނު މައްސަލައިގައި ހައްޔަރު ކުރި މީހުންގެ ތެރޭގައި ހިމެނޭ މީހަކު އަނެއްކާ ވެސް ހައްޔަރުކޮށްފިއެވެ.
މި މައްސަލައިގައި ހައްޔަރުކޮށްފައިވަނީ މ. ކޮޅުފުށި، އާރެސް، ހަސަން ގާލިބް (38އ) އެވެ. ފުލުހުން ބުނީ އޭނާގެ ބަންދާ މެދު ގޮތެއް ނިންމުމަށް ކްރިމިނަލް ކޯޓަށް ހާޒިރުކުރުމުން، އެ ކޯޓުން ވަނީ އޭނާގެ ބަންދަށް 15 ދުވަހުގެ މުއްދަތެއް ޖަހާފައިވާ ކަމަށެވެ.
މި މައްސަލައިގައި އޭނާ ހައްޔަރުކުރިއިރު، ހުޅުމާލޭގައި މީހަކު ރަހީނުކުރި މައްސަލައަކާއި ގުޅިގެން އޭނާ ހައްޔަރުކުރުމަށް ދޫކޮށްލާފައި ހުއްޓައެވެ.
އޭނާގެ މައްޗަށް މީގެ ކުރިން ތުހުމަތު ކުރެވުނު ރަހީނު ކުރުމުގެ މައްސަލައަކީ ހުޅުމާލޭގެ ދެވަނަ ފިޔަވަހީގައި ހުންނަ ހިޔާ ޓަވަރުގެ H9-20-11 އެޕާޓްމަންޓުގައި 2024 ވަނަ އަހަރު ނޮވެމްބަރު މަހު 12 މީހުން ވެގެން މީހަކު ރަހީނުކޮށް އިނގިލި ބުރިކޮށްލަން އުޅުނު މައްސަލައެވެ. ފުލުހުން ބުނީ، ރަހީނުކޮށްފައިވާ މީހާ ސަލާމަތްކުރީ އޭނާގެ ބޯ ބޭލުމަށްފަހު، އިނގިލި ބުރިކުރަން އުޅެނިކޮށް ކަމަށެވެ. އަދި އެ މީހުންގެ މައްޗަށް ދައުވާ ކުރުމަށް ފޮނުވާފައި ވަނިކޮށް އޭގެ ފަހުން ގާލިބް ވަނީ ބަންދުން ދޫކޮށްލާފައެވެ.
ގާލިބަކީ ކުށުގެ ރެކޯޑް އޮތް މީހެއް ކަމަށް ވެސް އޭނާ ބަންދުކުރަން އަމުރުކޮށް ނެރުނު ކޯޓު އަމުރުގައި ބުނެފައި ވެއެވެ.