ރައީސް އިބްރާޙިމް މުޙައްމަދު ޞާލިޙްގެ ސަރުކާރުން އެއްވެސް ރަށެއްގައި ހިންގާ އެއްވެސް މަޝްރޫއެއް ހުއްޓާލަން، ނުވަތަ މަޑުޖައްސާލަން ބުނެފައި ނުވާނެކަމަށް، އިންތިހާބީ ރައީސް ޑރ. މުޙައްމަދު މުއިއްޒު ވިދާޅުވެއްޖެއެވެ. ޑރ. މުއިއްޒު އިތުރަށް ވިދާޅުވީ، އެބޭފުޅާގެ ފަރާތުން ވެސް އެއްވެސް ބޭފުޅަކު މިކަމަށް ނާންގާނެކަމަށެވެ. 

ނަމަވެސް، މިއީ ސަރުކާރު ބަދަލުވާ ދުވަސްކޮޅުކަމަށް ވާތީ، މި މުއްދަތުގައި 10 ކަމެއް ނުކުރުމަށް އެދި އިންތިހާބީ ރައީސް ޑރ. މުއިއްޒުވަނީ ރައީސުލްޖުމްހޫރިއްޔާއަށް ސިޓީފުޅެއް ފޮނުވާފައެވެ. އޭގެ ތެރޭގައި އާ ޕްރޮޖެކްޓްތައް އިއުލާން ކުރުމާއި، ވަޒީފާގެ އޮނިގަނޑާއި މުސާރައިގެ އޮނިގަނޑަށް ބަދަލުގެނައުން އަދި އާ އިންވެސްޓްމެންޓްތައް ފެށުން ހިމެނެއެވެ.

މީގެ އިތުރުން ސަރުކާރު ބަދަލުވުމުގެ މަރުހަލާ ހިނގާ މި ދަނޑިވަޅުގައި ސިވިލް ސަރވިސް ކޮމިޝަނުން އިދާރާތަކަށް ފޮނުވި ސަރކިއުލާގައި ވަނީ މަޤާމުތަކަށް އިޢުލާންކުރުމާއި، ވަޒީފާތަކަށް މުވައްޒަފުން ހަމަޖެއްސުމާއި، މަޤާމުގެ ކުރިއެރުން ދިނުމާގުޅޭ މަސައްކަތްތައް ކުރިޔަށްގެންދިއުމުގެ އިތުރަށް އިދާރާތަކުގެ އިދާރީ އޮނިގަނޑު އެކުލަވާލުމުގައި ވަކި ގޮތަކަށް އަމަލުކުރަން އަންގާފައެވެ. 

މީގެ އިތުރުން އިންޓަރނަލީ އިޢުލާންކޮށްގެން ވަޒީފާގެ ކުރިއެރުން ދިނުމަށް ހަމަޖެހިފައިވާ އޮނިގަނޑުތަކުގެ މަޤާމުތަކަށް މިހާތަނަށްކޮށްފައިވާ އިޢުލާންތަކާ ގުޅިގެން ކުރިއެރުންދިނުން މަޑުޖައްސައިލުމަށާއި، އެކި އިދާރާތަކަށް ކޮންޓްރެކްޓް، ވޭޖް އަދި ކޮންސަންޓެންސީ އުޞޫލުން މީހުން ނެގުން މަޑު ޖައްސާލުމަށްވެސް ސަރުކާރުގެ އިދާރާތަކަށް ސިވިލް ސަރވިސް ކޮމިޝަނުން ވަނީ އަންގާފައެވެ.