މާލޭގައި ހުންނަ ހުވަދޫ ޖަގަހައިގައި ބުރާސްފަތި ދުވަހުގެރޭ ބޭއްވި އެމްޑީޕީގެ ކެމްޕެއިން ޖަލްސާގައި ރައީސް އިބްރާޙިމް މުޙައްމަދު ޞާލިޙް ވާހަކަފުޅު ދައްކަވަމުން، އެ ދުވަހުގެ ޑޯ-ޓު-ޑޯ ހަރަކާތުގެ ތަޖުރިބާއެއް ޙިއްސާ ކުރެއްވެވިއެވެ. ރައީސްއާއި ޑޯ-ޓު-ޑޯ އިން ބައްދަލުވީ އެމް.ޑީ.ޕީ. އުފެއްދުމުގައި އިސްކޮށް އުޅުއްވި ވިޔަފާރިވެރިއަކާއެވެ.  

ރައީސް ޙިއްސާ ކުރެއްވެވި ގޮތުން، އެ ވިޔަފާރިވެރިޔާ ހުރީ ވަރަށް ބޮޑަށް މާޔޫސް ވެފައެވެ. އެއީ ފުރަތަމަ ބުރުގައި ވޯޓު ލާން ނުދެވި އަދި އެ ބުރުގެ ނަތީޖާ ލިބުނު ގޮތުންނެވެ. އަދި މި ނަތީޖާއާއެކު، އެ ވިޔަފާރިވެރިޔާގެ ކުރިމަތިން 2018 ގެ ކުރީގެ މަންޒަރުތައް މިއަދު ސިފަވާން ފަށައިފިކަމަށް ރައީސްއާ ޙިއްސާ ކުރެއްވެވިކަމަށް ވިދާޅުވިއެވެ. 

ދެން އެއަށްފަހު ރައީސްއާ ޙިއްސާ ކުރެއްވީ އެ ވިޔަފާރިވެރިޔާ ގެޔަށް ގެންނަ ފައިސާ، އަނެއްދުވަހު ބެންކަށް ޖަމާކުރަން އުފުލަން ޖެހޭ ބުރައިގެ ވާހަކައެވެ.

އެހެންކަމުން، ކުރިމަތިން މި ތަޞައްވުރު ކުރެވޭ މަންޒަރު ހަޤީގަތަކަށް ވުމަށް ނޭދޭތީ، ދެވަނަ ބުރުގައި ޖާނާއި މާލާއި ހޭދަކޮށްގެން ވެސް، އަލުން އަނބުރާ އެ ބިރުވެރިކަން ރާއްޖެއަށް ނުގެނައުމަށް ކުރެވެން އޮތް ހުރިހާކަމެއް ކުރާނެކަމަށް އެ ވިޔަފާރިވެރިޔާ ދެންނެވިކަމަށް ރައީސް ޙިއްސާކުރެއްވެވިއެވެ.

މީގެ އިތުރުންވެސް، ޑޯ-ޓު-ޑޯގައި މިފަދަ އެތަކެއް ބަޔަކާއި ދިމާވާ ކަމަށާއި، ދެވަނަ ބުރުގައި އެ އެންމެން ވެސް ވޯޓު ލާން ނިކުމެ، އެ ބިރުވެރިކަމުން ރާއްޖެ ސަލާމަތް ކުރުމަށް ކުރެވެން ހުރި ހުރިހާ މަސައްކަތެއް ކުރައްވާނެކަމަށް ރައީސްއަށް ދަންނަވާފައިވާކަމަށް ވިދާޅުވިއެވެ. 

މި ޖަލްސާގައި ރޭ އެމްޑީޕީއާ ގުޅިވަޑައިގެންނެވި ކުރީގެ މަޖިލިސް މެމްބަރ އިލްހާމް އަޙްމަދާއިއެކު ޖަލު ގޮޅީގައި ކުރެވުނު އިޙްސާސްތަކެއް ވެސް ރައީސް ވަނީ ޙިއްސާ ކުރައްވާފައެވެ. ރައީސް ފާހަގަ ކުރެއްވެވި ގޮތުން އޭރު ޖަލުގައި ދައުލަތެއް އުފެއްދޭހާ ލީޑަރުން ތިއްބެވިއެވެ. އެގޮތުން އުއްތަމަ ފަނޑިޔާރާއި، ސްޕްރީމް ކޯޓުގެ ފަންޑިޔާރަކާއި، ދެ ޕްރޮސެކިއުޓަރ ޖެނެރަލުންނާއި، ދެ ޕޮލިސް ކޮމިޝަނަރުންނާއި، ރައްޔިތުންގެ މަޖިލީހުގެ މެމްބަރުންނާއި، މަޖިލީހުގެ މައިނޯރިޓީ ލީޑަރާއި، ވިޔަފާރި ވެރިންނާއި އަދި ކުރީގެ ރައީސް، ރައީސް މައުމޫނު ވެސް އިންނެވިކަމަށް ޙިއްސާ ކުރެއްވެވިއެވެ. އަދި އޭރުގެ ސަރުކާރު ބަލިކުރެވެވީ، އެ އެންމެން ނިކުމެ، އެންމެން އެކަތި ގަނޑަކަށް ވެގެންކަމަށް ވިދާޅުވިއެވެ.