ހުރިހާ ދާއިރާއެއްގެ މުވައްޒަފުންގެ މުސާރަ ވެސް އަންނަ އަހަރުގެ ޖެނުއަރީ މަހުން ފެށިގެން ބޮޑުވާނެ ކަމަށާއި އެކަން އަންނަ އަހަރަށް ލަފާކުރާ ބަޖެޓްގައި ހިމަނާނެ ކަމަށް ރައީސް އިބްރާހިމް މުހައްމަދު ސޯލިހު ވިދާޅުވެއްޖެ އެވެ. ރައީސް މިހެން ވިދާޅުވީ ރޭ ގަލޮޅުގައި ބޭއްވި ކެމްޕެއިން ޖަލްސާގައި ވާހަކަ ދައްކަވަމުންނެވެ.

ރައީސް ވިދާޅުވީ ތައުލީމީ އަދި ސިއްހީ ދާއިރާގެ މުވައްޒަފުންގެ މުސާރައަށް ހެޔޮ ބަދަލެއް ގެނެވިއްޖެ ކަމަށާއި އެހެން ދާއިރާތަކުގެ މުވައްޒަފުންގެ މުސާރައަށް ވެސް އަންނަ އަހަރުން ފެށިގެން ހެޔޮ ބަދަލެއް އަންނާނެ ކަމަށެވެ.

އޭގެތެރޭގައި، ސިފައިންނާއި ފުލުހުންނާއި ޝަރުއީ ދާއިރާ އާއި ސިވިލް ސާވިސް އާއި މިނިވަން މުއައްސަސާތަކާއި އިމިގްރޭޝަނާއި ކަސްޓަމްސް އާއި ކައުންސިލްތަކާއި އިމާމުންނާއި މުދިމުންގެ މުސާރައަށް ބަދަލު ގެނައުން ހިމެނޭ ކަމަށް ރައީސް ވިދާޅުވި އެވެ.

"މި އަންނަ މަހު މަޖިލީހަށް ހުށަހަޅާ 2024 ވަނަ އަހަރުގެ ބަޖެޓްގައި އިރާދަކުރެވިއްޔާ މިކަން ހިމަނައި އަޅުގަނޑުމެން ފާސްކުރާނަން،" ރައީސް ވިދާޅުވި އެވެ.

ދޮރުން ދޮރަށް ހިންގަވައި ކުރިއަށްގެންދާ ކެންޕެއިން ހަރަކާތްތަކުގައި ލިބިވަޑައިގަންނަވާ އެއް ޝަކުވާއަކީ ސްޓޫޑެންޓް ލޯނު ދެއްކުމުގައި ދަތިވެ، އެ ނުދެއްކުމުގެ ސަބަބުން ކޯޓަށް ދާންޖެހޭ ހިސާބުގައި ތިބެން ޖެހުން ކަމަށް ރައީސް ވަނީ ވިދާޅުވެފައެވެ. އެހެންކަމުން މިކަމަށް ހައްލެއް ގެނެސްދެއްވުމަށް ސްޓޫޑެންޓް ލޯނު ވަކި އުސޫލަކުން މާފު ކުރެވޭނެ ގޮތްތަކެއް ހެދުމުގެ މަސައްކަތް ކުރައްވަމުން ގެންދަވާކަމަށްވެސް ރައީސް ވަނީ ވިދާޅުވެފައެވެ.  

ރައީސް ވިދާޅުވީ، އެމަނިކުފާނުގެ ޓީމް އޮތީ ރިޔާސީ އިންތިހާބުގެ ދެވަނަ ބުރަކަށް ވެސް ތައްޔާރުވެގެން ކަމަށާއި އެކަމަށް ވިސްނައި ޕްލޭން ވެސް ކޮށްގެން ކަމަށެވެ. ކަންބޮޑުވާން ޖެހޭ އެއްވެސް ކަމެއް ނެތް ކަމަށެވެ.